រាជធានីភ្នំពេញ ៖ អតីតហ្វ្រេស៊ីហ្គើលចំណាត់ថ្នាក់លេខ៤ ឆ្នាំ២០០៩ នាងមាន សុនីតាបានអះអាងពាក់ព័ន្ធការចោទប្រកាន់លើរូបនាងថាជាតារាសម្ដែងមួយរូបដែលរើសអើងផលិតកម្ម ។ ការចោទប្រកាន់នោះ បន្ទាប់ពីមួយរយៈចុងក្រោយនេះគេសង្កេតឃើញនាងត្រូវម្ចាស់ផលិតកម្មដ៏ល្បីល្បាញគឺអ្នកស្រីពាន់ ភួងបុប្ផា ផ្ចុងផ្ដើមឱ្យសម្ដែងជាតួឯកជាបន្ដបន្ទាប់ ធ្វើឱ្យកេរ្ដិ៍ឈ្មោះក្នុងវិស័យ
រាជធានីភ្នំពេញ ៖ អតីតហ្វ្រេស៊ីហ្គើលចំណាត់ថ្នាក់លេខ៤ ឆ្នាំ២០០៩ នាងមាន សុនីតាបានអះអាងពាក់ព័ន្ធការចោទប្រកាន់លើរូបនាងថាជាតារាសម្ដែងមួយរូបដែលរើសអើងផលិតកម្ម ។ ការចោទប្រកាន់នោះ បន្ទាប់ពីមួយរយៈចុងក្រោយនេះគេសង្កេតឃើញនាងត្រូវម្ចាស់ផលិតកម្មដ៏ល្បីល្បាញគឺអ្នកស្រីពាន់ ភួងបុប្ផា ផ្ចុងផ្ដើមឱ្យសម្ដែងជាតួឯកជាបន្ដបន្ទាប់ ធ្វើឱ្យកេរ្ដិ៍ឈ្មោះក្នុងវិស័យសិល្បៈរបស់នាងកាន់តែរីកសាយភាយមួយកម្រិតថែមទៀត ។ កត្ដានេះអាចចាត់ទុកជាដើមចមមួយនាំឱ្យគេសន្និដ្ឋានទៅលើរូបនាងថា រើសអើងចំពោះបណ្ដាផលិតកម្មនានាដែលចង់បានរូបនាងទៅថត ដោយសារតែនាងត្រូវចងជើងជាប់ជាមួយផលិតកម្មរបស់អ្នកស្រីពាន់ ភួងបុប្ផា ។
ពាក់ព័ន្ធបញ្ហាចោទប្រកាន់នោះ តារាសម្ដែងមាន សុនីតា បដិសេធថានាងមិនរើសអើងចំពោះផលិតកម្មផ្សេងក្រៅពីផលិតកម្មរបស់អ្នកស្រីពាន់ ភួងបុប្ផា ទេ ។ នៅក្នុងជំនួបផ្ទាល់ក្នុងពេលសម្ពោធខ្សែភាពយន្ដខ្នាតធំរឿង «កុមារី២៥ឆ្នាំ»វគ្គ២ កាលពីពេលថ្មីៗនេះ តួឯកស្រីក្នុងរឿង «បេះដូងអ្នកការពារ» និងរឿង «នាយឡប់ជំពប់ស្នេហ៍» រូបនេះបញ្ជាក់ថា កន្លងមកនាងបានទទួលដំណឹងពីការចោទប្រកាន់លើរូបនាងថារើសអើងផលិតកម្ម ឬក៏មិនព្រមទទួលថតចំពោះបណ្ដាផលិតកម្មផ្សេងក្រៅពីផលិតកម្មរបស់អ្នកស្រីពាន់ ភួងបុប្ផា ដោយសារអ្នកស្រីជួយលើកតម្ដើងឱ្យនាងមានឱកាសសម្ដែងជាតួឯកក្នុងខ្សែភាពយន្ដរបស់អ្នកស្រីជាបន្ដបន្ទាប់ ។
ត្រង់ចំណុចនេះមាន សុនីតា បញ្ជាក់ថា មូលហេតុដែលនាងបដិសេធចំពោះការថតឱ្យផលិតកម្មមួយចំនួននោះ គឺដោយសារតែក្នុងអំឡុងពេលនេះនាងបានសម្រេចចិត្ដងាកមកចាប់យកការសិក្សាបន្ដទៀត បន្ទាប់ពីបានព្យួរការសិក្សាមួយរយៈក្នុងពេលដែលនាងចាប់ផ្ដើមទទួលថតខ្សែភាពយន្ដ ។ នាងនិយាយថា ក្នុងពេលថ្មីៗនេះ នាងទើបតែបញ្ចប់ការថតរឿង «អ្នកមានគុណ» ដែលកំពុងតែចាក់បញ្ចាំងតាមកញ្ចក់ទូរទស្សន៍ស៊ីធីអិន ។ ក្នុងពេលនាងថតចប់ខ្សែភាពយន្ដនេះ នាងទៅបន្ដការសិក្សារបស់នាងទៀត ហេតុនេះប្រសិនបើនាងទទួលយកការថតខ្សែភាពយន្ដណាមួយបន្ដទៀតនោះ គឺអាចនឹងប៉ះពាល់ដល់ការសិក្សា ដូច្នេះនាងត្រូវតែបដិសេធរាល់ការស្នើសុំណាមួយនៅក្នុងអំឡុងពេលនេះ ដោយសារថានាងនឹងមានពេលគ្រប់គ្រាន់សម្រាប់ការសម្ដែង ។ តារារូបនេះបន្ថែមថា មូលហេតុដែលធ្វើឱ្យគេភាន់ច្រឡំមកលើរូបនាង ថាទទួលថតឱ្យតែផលិតកម្មរបស់អ្នកស្រីពាន់ ភួងបុប្ផានោះ គឺដោយសារតែពេលថ្មីៗនេះនាងទើបតែថតឱ្យផលិតកម្មរបស់អ្នកស្រីពាន់ ភួងបុប្ផា បានចំនួន២រឿងជាប់គ្នា ហើយគេមិនបានឃើញវត្ដមានរបស់នាងសម្ដែងនៅក្នុងផលិតកម្មផ្សេងក្រៅពីនេះ ។
តារាស្រីរូបនេះនិយាយថា «សម្រាប់នាងខ្ញុំគឺមិនបានគិតរើសអើងឡើយ ពោលគឺនាងខ្ញុំទទួលថតគ្រប់ផលិតកម្ម ប្រសិនបើមានពេលគ្រប់គ្រាន់សម្រាប់ថតឱ្យពួកគាត់ ។ វាជាពេលគាប់ជួនខ្លះដែរ ក្នុងពេលដែលនាងខ្ញុំព្រមទទួលយកការសម្ដែងឱ្យអ្នកស្រីពាន់ ភួងបុប្ផាហើយនោះ ស្រាប់តែមានផលិតកម្មមួយផ្សេងទៀតបានទាក់ទងមកដែរ ហើយទាមទារឱ្យថតភ្លាមៗ ទើបនាងខ្ញុំបដិសេធចោល ។ នាងខ្ញុំគិតថា ការងារសម្ដែងមិនចង់ទទួលយកពីរក្នុងពេលតែមួយទេ ដោយសារតែការសម្ដែងរឿងតែមួយនោះគឺយើងមានពេលគ្រប់គ្រាន់ហ្វឹកហាត់សម្ដែងឱ្យមានគុណភាពសម្រាប់អ្នកទស្សនា តែប្រសិនបើយើងទទួលយកការងារពីរ ឬបីក្នុងពេលតែមួយនោះ គឺធ្វើឱ្យយើងហត់នឿយ ហើយការសម្ដែងក៏មិនសូវជាបានល្អដែរ» ។
មាន សុនីតា ប្រកាសថា នាងនឹងរយាលពេលក្នុងការសម្ដែងនៅក្នុងអំឡុងពេលនេះ ដោយសារតែនាងត្រូវប្រើពេលវេលាឱ្យបានច្រើនងាកមកការសិក្សាក្នុងនាមជានិស្សិតឆ្នាំទី៣ ផ្នែកជំនួញ នៅសាកលវិទ្យាល័យបញ្ញាសាស្រ្ដ ។ ពាក់ព័ន្ធទៅនឹងបញ្ហាស្នេហាវិញ បើទោះបីជាកន្លងមក មាន សុនីតា បានពើបប្រទះទៅនឹងព័ត៌មានស្នេហាជាបន្ដបន្ទាប់ក៏ដោយ ប៉ុន្ដែតារាសម្ដែងរូបនេះបដិសេធដោយអះអាងថា បេះដូងរបស់នាងគឺនៅទំនេរមិនទាន់មានម្ចាស់ឃុំគ្រងនៅឡើយទេ ៕
ចែករំលែកព័តមាននេះ