រាជធានីភ្នំពេញ ៖ ផ្តើមចេញពីការជំពាក់លុយមិនព្រមសង ជាហេតុបណ្តាលឱ្យលោកឧកញ៉ាម្នាក់ពោរពេញទៅដោយទោសៈ បានបើករថយន្តម៉ាករ៉ង់រ៉ូវែរ បំបុករថយន្តម៉ាកកាមរីបាឡែន ពណ៌ទឹកប្រាក់ មួយគ្រឿង ដែលម្ចាស់ចតទុកនៅមុខផ្ទះឱ្យរងការខូចខាតទ្វារមួយចំហៀង និងមនុស្ស៣នាក់រងរបួសធ្ងន់ និងស្រាល កាលពីវេលាម៉ោង១១និង២០នាទីយប់ថ្ងៃទី១៦ មិថុនា នៅក្នុងបុរីមួយ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។ បច្ចុប្បន្ន សមត្ថកិច្ចកំពុងតាមប្រមាញ់រកលោកឧកញ៉ារូបនោះដែលគេស្គាល់ថាឈ្មោះញ៉ែម កុសល ។
លោកម៉ក់ ហុង អធិការប៉ូលិសខណ្ឌសែនសុខ ឱ្យដឹងថា ការកើតមាននូវហេតុការណ៍ខាងលើនេះ គឺផ្តើមចេញពីទំនាស់ ដោយសារជនរងគ្រោះជំពាក់ប្រាក់លោកឧកញ៉ាប្រមាណ២.០០០ដុល្លារសហអាមេរិក ហើយការកើតរឿងបើករថយន្តបំបុកបង្កឱ្យមានគ្រោះថ្នាក់នោះ គឺបន្ទាប់ពីមានការឈ្លោះប្រកែកគ្នាបែកផ្សែង ។
លោក កែម សុន្ទោត នាយប៉ុស្តិ៍នគរបាលសង្កាត់ភ្នំពេញថ្មីឱ្យដឹងថា លោកញ៉ែម កុសល ដែលគេស្គាល់ថាជាឧកញ៉ា បានបើករថយន្តមួយគ្រឿងម៉ាករ៉ង់រ៉ូវែរ បំបុករថយន្តម៉ាកកាមរីបាឡែន ពណ៌ទឹកប្រាក់ ដែលចតនៅមុខផ្ទះ និងបណ្តាលឱ្យគ្រោះថ្នាក់មនុស្ស៣នាក់ គឺ១- ឈ្មោះនី សាត ភេទប្រុស អាយុ៤៩ឆ្នាំ ជាប្តី របួសបាក់ជើងទាំងសងខាង ២-ឈ្មោះទេព លីហ្សា អាយុ៤១ឆ្នាំ ជាប្រពន្ធ និង៣-ឈ្មោះសាត នីតា ភេទស្រី អាយុ១៩ឆ្នាំ ជាកូន បាក់ក.ដៃស្ដាំ ។ ក្រុមគ្រួសារនេះប្រកបរបរលក់សាច់គោអាំងយីហោ «នីតា សាច់អាំង» នៅចំណុចផ្ទះកើតហេតុ ។ ចំណែកលោកឧកញ៉ា ដែលពេលនេះក្លាយទៅជាជនបង្ក ក៏មានទីលំនៅក្នុងបុរីខាងលើ និងជាមិត្ដភក្ដិជនរងគ្រោះដែរ ។
ប្រភពព័ត៌មានពីក្រុមគ្រួសារជនរងគ្រោះឱ្យដឹងថា មុនពេលកើតហេតុ លោកឧកញ៉ា ញ៉ែម កុសល បានបើករថយន្ដមកឈប់មុខផ្ទះ និងស៊ីផ្លេហៅ ហើយចុះមកគោះទ្វារផ្ទះជនរងគ្រោះឱ្យចេញមកក្រៅនិយាយគ្នាទាំងយប់ ។ ឯក្រុមគ្រួសារជនរងគ្រោះទាំងគ្រួសារបានបើកទ្វារផ្ទះចេញមក ក៏មានការប៉ះសម្ដីគ្នាយ៉ាងតឹងសរសៃកផងដែរ ។ ភ្លាមៗនោះ លោកឧកញ៉ាបានបើករថយន្តចេញទៅទាំងមានកំហឹង រួចក៏បត់ត្រឡប់មកក្រោយវិញ និងបើកយ៉ាងលឿនសំដៅបំបុកជនរងគ្រោះ ប៉ុន្ដែដោយសារក្រុមគ្រួសារជនរងគ្រោះឃើញទាន់ ក៏រត់គេច តែរត់មិនទាន់ក៏ត្រូវរថយន្ដលោកឧកញ៉ាបុក បណ្ដាលឱ្យរបួសប្ដី-ប្រពន្ធ និងកូន ។ ចំណែករថយន្ដបង្កហេតុក៏ជ្រុលទៅបុកថូផ្កាមុខផ្ទះ និងរានទេវតា ព្រមទាំងរថយន្ដម៉ាកកាមរីបាឡែនមួយគ្រឿង ពណ៌ទឹកប្រាក់ ពាក់ស្លាកលេខភ្នំពេញ2W-1376 បណ្តាលឱ្យខូចខាតអស់មួយចំហៀងខាងស្ដាំ ។
បើយោងតាមប្រភពព័ត៌មានខាងលើថា ក្រុមគ្រួសារជនរងគ្រោះជំពាក់ប្រាក់ត្រឹម២ពាន់ដុល្លារ ហើយលោកឧកញ៉ាមានកំហឹងបែបនេះដូចជាគ្មានអ្វីចំណេញសោះ ។ ផ្ទុយទៅវិញត្រូវបង់ខាតធ្ងន់ធ្ងរថែមទៀត ទាំងប្រាក់ និងកិត្ដិយស ដែលពាក្យចាស់និយាយថា «ប្រាក់ក៏បង់ ថង់ក៏ដាច» ។
សម្រាប់លោកឧកញ៉ា ញ៉ែម កុសល កោះសន្ដិភាពមិនអាចសុំការបំភ្លឺបានទេក្រោយពេលកើតហេតុ ៕
ចែករំលែកព័តមាននេះ