ខេត្តក្រចេះ ៖ តំបន់រ៉ែមាស នៅចំណុចភ្នំព្រិច ក្នុងឃុំស្វាយជ្រះ ស្រុកស្នួល កំពុងតែប្រឈមមុខនិងការបំផ្លាញយ៉ាងរង្គាល ក្រោមស្នាដៃរបស់ក្រុមឈ្មួញមួយក្តាប់តូច កំពុងបោះទីតាំងយ៉ាងរឹងមាំ ។ នៅតំបន់នោះ ជាព្រៃភ្នំត្រូវពួកគេកាយលុងដីយករ៉ែមាសយ៉ាងគគ្រឹកគគ្រេងដោយប្រើប្រាស់សុទ្ធតែសម្ភារទំនើបៗ ដូចជាស្ពានសម្រាប់ដឹកជញ្ជូនដីរ៉ែ និងសារធាតុគីមីរាប់ធុងធំៗ ដោយមានការ
ខេត្តក្រចេះ ៖ តំបន់រ៉ែមាស នៅចំណុចភ្នំព្រិច ក្នុងឃុំស្វាយជ្រះ ស្រុកស្នួល កំពុងតែប្រឈមមុខនិងការបំផ្លាញយ៉ាងរង្គាល ក្រោមស្នាដៃរបស់ក្រុមឈ្មួញមួយក្តាប់តូច កំពុងបោះទីតាំងយ៉ាងរឹងមាំ ។ នៅតំបន់នោះ ជាព្រៃភ្នំត្រូវពួកគេកាយលុងដីយករ៉ែមាសយ៉ាងគគ្រឹកគគ្រេងដោយប្រើប្រាស់សុទ្ធតែសម្ភារទំនើបៗ ដូចជាស្ពានសម្រាប់ដឹកជញ្ជូនដីរ៉ែ និងសារធាតុគីមីរាប់ធុងធំៗ ដោយមានការប្រើប្រាស់កម្លាំងកម្មកររាប់សិបនាក់ ដើម្បីកែច្នៃចម្រាញ់យកមាស ធ្វើដូចមានច្បាប់ពីរាជរដ្ឋាភិបាល ។
ប្រភពព័ត៌មានពីតំបន់រ៉ែភ្នំព្រិចបាននិយាយថា ការជីកដីកាយយករ៉ែរបស់ក្រុមឈ្មួញមួយចំនួននៅតំបន់នេះ គឺកើតមានជាយូរមកហើយ ដោយសកម្មភាពរបស់ពួកគេបានធ្វើឡើងក្នុងព្រៃ ជ្រកក្រោមស្លាកអតីតទីតាំងក្រុមហ៊ុនវិនិយោគថ្មម៉ាបមិនច្បាស់លាស់មួយ ។ សកម្មភាពនេះក៏មានការបង្ក្រាបរបស់មន្ត្រីជំនាញខ្លះៗផងដែរ តែហាក់ដូចជាមានកម្រិត ។
ប្រជាពលរដ្ឋដែលប្រកបរបររករ៉ែមាសដោយដៃ ជាទម្លាប់ប្រពៃណីសម្រាប់ជីវភាពគ្រួសារនៅតំបន់នោះ កំពុងមានការព្រួយបារម្ភទៅលើការបាត់បង់ធនធានធម្មជាតិទូទៅនៅតំបន់ភ្នំព្រិច ហើយជាងនេះទៅទៀត ពួកគាត់មានការព្រួយបារម្ភលើសត្វពាហនៈ ដែលតែងតែកើតជំងឺឈឺងាប់ជាបន្តបន្ទាប់ ។ ក្រោយពីសត្វគោក្របីដែលជាកម្លាំងអូសទាញរបស់ពួកគាត់សម្រាប់បង្កបង្កើនផល បានទៅផឹកទឹកព្រែកអូរដែលលាយឡំទៅដោយសារធាតុគីមីបំពុលបរិស្ថានរបស់ក្រុមអ្នកច្នៃរ៉ែបង្ហូរចូល ។
គេសង្កេតឃើញថា កន្លងមកអាជ្ញាធរស្រុក និងមន្ត្រីជំនាញនៃមន្ទីរឧស្សាហកម្មខេត្តធ្លាប់បានចុះទៅបង្ក្រាបដល់ទីតាំងតំបន់រ៉ែអនាធិបតេយ្យនោះជាច្រើនលើកច្រើនសាដែរ កាលពីចុងឆ្នាំ២០១២កន្លងទៅ តែការចុះបង្ក្រាបនោះគឺធ្វើឡើងបានតែមួយភ្លែតប៉ុណ្ណោះ ។ ក្នុងសកម្មភាពបង្ក្រាបរបស់អាជ្ញាធរនាពេលនោះ ត្រូវគេមើលឃើញថា សមត្ថកិច្ចពុំបានចាប់ឃាត់ខ្លួនជនណាម្នាក់នៅក្នុងជំនួញរ៉ែខុសច្បាប់នេះទេ គឺបានត្រឹមតែចាប់ដកហូតឧបករណ៍កែច្នៃរ៉ែមួយចំនួនតែប៉ុណ្ណោះ ទុកចោលក្នុងព្រៃព្រោះដឹកចេញមិនរួចខុសពីឈ្មួញដែលដឹកចូលទៅបាន ។ ជាងនេះទៅទៀតភាពស្ងប់ស្ងាត់នៃការឈប់រុករករ៉ែនោះ ត្រូវគេដឹងថាបានផ្អាកមួយរយៈពេលដែរ ។ ប៉ុន្តែរហូតមកទល់និងពេលនេះ ត្រូវគេដឹងថា ក្នុងតំបន់នោះកំពុងតែកើតជាតំបន់រុករករ៉ែយ៉ាងអនាធិបតេយ្យពេញបន្ទុកទៀតហើយ និងមានទ្រង់ទ្រាយធំជាងមុនថែមទៀត ។
តំបន់រុករករ៉ែមាសអនាធិបតេយ្យនេះ ត្រូវក្រុមជនខិលខូចបានធ្វើសកម្មភាពនៅក្នុងព្រៃឆ្ងាយពីទីប្រជុំជន និងធ្វើការកាយយកដីរ៉ែដាក់ចូលអាងធំៗ ដែលមានលាយទឹកផ្សំជាមួយសារធាតុគីមីដើម្បីចម្រាញ់យកមាស ហើយកាកសំណល់ដែលនៅសល់បានបង្ហូរចោលទៅក្នុងទឹកព្រែក និងអូរនៅក្បែរនោះ ។
ប្រភពព័ត៌មានបាននិយាយថា ប្រសិនបើអ្នកស្រុកតំបន់នោះធ្វើអាជីវកម្មរែងរ៉ែដោយដៃមានលក្ខណៈតូចតាចសម្រាប់គ្រួសារដូចតាមទម្លាប់ជាយូរមកហើយ តែងត្រូវបានអាជ្ញាធរបង្ក្រាប និងព្រមានឱ្យធ្វើកិច្ចសន្យា គឺកៀបគ្នាខ្លាំងណាស់ ។ ប៉ុន្តែសម្រាប់ពួកឈ្មួញធំៗវិញគ្មានអ្នកណាអើពើយកភ្នែកមើលពីទោសកំហុសទាំងនោះទេ ។ ក្នុងសកម្មភាពរបស់ឈ្មួញធ្វើអាជីវកម្មរ៉ែមាសនោះ គេដឹងថាមិនមានអាជ្ញាប័ណ្ណស្របច្បាប់ពីស្ថាប័នណាមួយ អនុញ្ញាតឱ្យពួកគេធ្វើអាជីវកម្មនោះឡើយ ។
ជុំវិញការធ្វើរ៉ែអនាធិបតេយ្យដោយមានប្រើប្រាស់សារធាតុគីមី កំពុងបំពុលទឹកព្រែក និងស្ទឹងអូរនោះ លោក ណុប ចន្ធី ប្រធានមន្ទីរបរិស្ថានបានឱ្យដឹងកាលពីព្រឹកថ្ងៃទី១៧ មិថុនា ដោយលោកបានអះអាងថា រឿងរ៉ែគីមីនេះគឺមាននៅតែមន្ទីរឧស្សាហកម្មរ៉ែ និងថាមពលទេដែលជាអ្នកចាត់វិធានការ ព្រោះមន្ត្រីរបស់លោកមានតិច និងបានចុះទៅបំពេញការងារតែនៅតាមបណ្ដាស្រុកប៉ុណ្ណោះ ។
លោក អីុវ ច័ន្ទសេរី អនុប្រធានមន្ទីរឧស្សាហកម្មរ៉ែ និងថាមពលខេត្តទទួលបន្ទុកការិយាល័យរ៉ែបានប្រាប់ដែរថា ចំពោះសកម្មភាពរុករករ៉ែអនាធិបតេយ្យ និងសកម្មភាពរបស់ជនខិលខូចទាំងនោះ លោកកំពុងតែដាក់ឯកសារជូនទៅថ្នាក់ខេត្ត សុំយោបល់សម្រេច ដើម្បីឈានទៅធ្វើការបង្ក្រាបរឹបអូសនៅថ្ងៃខាងមុខនេះ ហើយកសាងសំណុំរឿងចាត់ការតាមនីតិវិធី ច្បាប់ ។ ការប្ដេជ្ញាចិត្តរបស់មន្ត្រីខាងលើនេះសង្ឃឹមថា អាចសង្គ្រោះតំបន់ភ្នំព្រិចដែលមានធនធានរ៉ែដ៏មហាសាលចេញពីកណ្ដាប់ដៃជនទុច្ចរិតមិនខាន ព្រោះជនទុច្ចរិតទាំងនេះមិនមែនអ្នកភូមិទេ គឺជាក្រុមឈ្មួញដែលទៅពីទីឆ្ងាយធ្វើជាថៅកែ ទើបអាចមានឧបករណ៍ធំៗបែបនេះ ។ គេមានជំនឿថា បើមានឆន្ទះបង្ក្រាបមែន ប្រាកដជាអស់នូវការបំផ្លាញធំបែបនេះមិនខាន៕
ចែករំលែកព័តមាននេះ