ខេត្តបន្ទាយមានជ័យ ៖ ឡានធំដឹកខ្សាច់ដឹកថ្មសុទ្ធតែប្រភេទយីឌុបភ្លៅ៥ បាន និងកំពុងបំផ្លាញផ្លូវបង្ក ភាពក្តៅក្រហាយ ដល់អ្នកក្រុងប៉ោយប៉ែត ដែលរស់នៅតាមដងផ្លូវបេតុងមួយចំនួន ព្រោះពួកគាត់ជាម្ចាស់ ថវិកានៃការអភិវឌ្ឍន៍ផ្លូវទាំងនោះឡើង១០០%។…
ខេត្តបន្ទាយមានជ័យ ៖ ឡានធំដឹកខ្សាច់ដឹកថ្មសុទ្ធតែប្រភេទយីឌុបភ្លៅ៥ បាន និងកំពុងបំផ្លាញផ្លូវបង្ក ភាពក្តៅក្រហាយ ដល់អ្នកក្រុងប៉ោយប៉ែត ដែលរស់នៅតាមដងផ្លូវបេតុងមួយចំនួន ព្រោះពួកគាត់ជាម្ចាស់ ថវិកានៃការអភិវឌ្ឍន៍ផ្លូវទាំងនោះឡើង១០០%។ ករណីនេះគេឃើញកើតមានទាំងរដូវប្រាំង និងរដូវវស្សា ហើយប្រយោជន៍បានទៅគ្រួសារបុគ្គល(អ្នកទិញលក់ខ្សាច់ និងថ្ម) តាមស្តង់នីមួយក្នុងក្រុងមួយនេះ។ តាមដងផ្លូវបេតុងកន្លែងខ្លះស្រុតខូចជាបណ្តើរៗភាគច្រើនមានស្នាមប្រេះ ជាក់ស្តែងផ្លូវបេតុងតភ្ជាប់ ពីផ្លូវជាតិលេខ៥ឆ្ពោះទៅសាលាសង្កាត់ប៉ោយប៉ែត ហើយកន្លងមកក៏កន្លែងខ្លះក្លាយជាជង្ហុកដែរ តែអាជ្ញាធរជួសជុលឡើងវិញឯផ្លូវបេតុងខ្លះទៀតថ្វីត្បិតតែមិនទាន់ស្រុតខូច ប៉ុន្តែបើអាជ្ញាធរមិនទប់ស្កាត់ ពួករថយន្តធំទាំងនេះទេថ្ងៃក្រោយប្រាកដជាពលរដ្ឋក្តៅក្រហាយជាក់ជាមិនខាន។
អាជ្ញាធរភូមិម្នាក់និយាយថា គួរសួរខាងស្ថានីយ៍ថ្លឹងរថយន្តព្រោះរថយន្តដឹកខ្សាច់ និងថ្មទាំងនោះបើកមក ពីខេត្ត ផ្សេងពិសេសមកពីខេត្តពោធិសាត់(ខ្សាច់)។ ពលរដ្ឋចង់ឲ្យអាជ្ញាធរមានវិធានការក្តៅលើបញ្ហានេះ ព្រោះផ្លូវបេតុងដែលអភិវឌ្ឍន៍ឡើងស្ទើរតែទាំងអស់ក្នុងទីប្រជុំជនមួយនេះសុទ្ធសឹងជាប្រាក់របស់ពួកគាត់សុទ្ធៗ១០០%។ ពួកគាត់លើកឡើងថា “កុំចាប់តែពេលឡានជាប់ផុង” ព្រោះអាមិនជាប់មានច្រើនគ្រឿងណាស់ ហើយថាបើពេលនេះវាមិនទាន់ខូចក៏គង់តែថ្ងៃក្រោយខូចដែរ ព្រោះឃើញនឹងភ្នែកស្រាប់ហើយ ផ្លូវចាប់ផ្តើមមានស្នាមប្រេះ។ ពលរដ្ឋបន្តថា បើអាជ្ញាធរមិនមានវិធានការក្តៅលើរថយន្តធំ និងដឹកធ្ងន់ទាំងនេះទេ ពេលផ្លូវខូចពួកគាត់ មិនចំណាយប្រាក់ចូលរួមអភិវឌ្ឍន៍ជាថ្មីទៀតឡើយ។
ជួបមន្ត្រីក្រុមប្រឹក្សាសង្កាត់ប៉ោយប៉ែតម្នាក់ និងមេភូមិនៅទីតាំងរថយន្តជាប់ផុងនិយាយថា ជាគោលការណ៍គឺមេរបស់ពួកគាត់ បញ្ជាឲ្យចាប់ផាកពិន័យជួសជុលកន្លែងជាប់នោះវិញ។ គួរបញ្ជាក់ថា ផ្លូវបេតុងនៅក្រុងប៉ោយប៉ែតស្ទើរ១០០% ជាថវិការបស់ពលរដ្ឋសុទ្ធសាធដែលខំបេះពីមាត់ពីក ព្រោះតែពួកគាត់ចង់ចូលរួមអភិវឌ្ឍន៍សង្គម។ បញ្ហានេះអាជ្ញាធរមិនគួរប្រើវិធានការលំៗតទៅទៀតឡើយ៕
ចែករំលែកព័តមាននេះ