រាជធានីភ្នំពេញ ៖ សាលាឧទ្ធរណ៍បានបន្តបើកសវនាការជំនុំជម្រះលើករណីស្ត្រីជាប់ចោទឈ្មោះយ៉ោម បុប្ផា អ្នកភូមិបឹងកក់ នៅរសៀលថ្ងៃទី១៤ មិថុនា ។ ស្ត្រីជាប់ចោទរូបនេះត្រូវបានសាលាដំបូងរាជធានីភ្នំពេញ សម្រេចផ្តន្ទាទោស ដាក់ពន្ធនាគារ៣ឆ្នាំ កាលពីខែធ្នូ ឆ្នាំ២០១២ ក្នុងបទចោទប្រកាន់រឿងព្រួតគ្នា វាយបុរសពីរនាក់ជាអ្នករត់ម៉ូតូឌុបបណ្តាលឱ្យរងរបួសធ្ងន់ ។ ក្នុងសវនាការ ចៅក្រមបានសាកសួរសាក្សីមួយចំនួនទាក់ទិននឹងការប្រព្រឹត្តល្មើសរបស់ស្ត្រីជាប់ចោទរូបនេះ ។
ខណៈពេលដំណើរការសវនាការនេះ ក្រុមអ្នកភូមិបឹងកក់បានលើកគ្នាទៅប្រមូលផ្តុំស្រែកតវ៉ាទាមទារឱ្យមានការដោះលែងជនជាប់ចោទ ឈ្មោះយ៉ោម បុប្ផា នៅមុខសាលាឧទ្ធរណ៍ផងដែរ ។ ចំណែកក្រុមអ្នករត់ម៉ូតូឌុប ក៏នាំគ្នាទៅទាមទារឱ្យតុលាការកាត់ទោស អ្នកស្រីយ៉ោម បុប្ផា ដោយចាត់ទុកថា ករណីស្ត្រីបឹងកក់រូបនេះមិនមែនកើតចេញពីបញ្ហាដីធ្លីនោះទេ តែគឺជាបទល្មើសព្រហ្មទណ្ឌសុទ្ធសាធ ។
សំណុំរឿងរបស់អ្នកស្រីយោ៉ម បុប្ផា ត្រូវបានសាលាឧទ្ធរណ៍ លើកយកមកជំនុំជម្រះ កាលពីរសៀលថ្ងៃទី៥ មិថុនា កន្លងមក ។ កាលណោះ ចៅក្រមបានសាកសួរចប់សព្វគ្រប់លើអ្នកស្រី យ៉ោម បុប្ផា និងបុរសអ្នករត់ម៉ូតូឌុបពីរនាក់ ហើយនៅថ្ងៃទី១៤ មិថុនា ចូលដល់ការសាកសួរសាក្សីបន្ថែមទៀតក្នុងការដាក់បន្ទុកលើជនជាប់ចោទ ។
ជនជាប់ចោទ យ៉ោម បុប្ផា អាយុ២៩ឆ្នាំ ត្រូវបានចាប់ខ្លួននៅថ្ងៃទី៤ កញ្ញា ឆ្នាំ២០១២ ពីបទចោទប្រកាន់ថា អ្នកស្រីបានចូលរួមប្រើអំពើហិង្សាដោយចេតនា ដោយការវាយបុរសអ្នករត់ម៉ូតូឌុបពីរនាក់ឱ្យរងរបួស ។ កាលពីព្រឹកថ្ងៃទី២៧ ខែធ្នូ ឆ្នាំ២០១២ ជនជាប់ ចោទឈ្មោះ យ៉ោម បុប្ផា ត្រូវបានសាលាដំបូងរាជធានីភ្នំពេញ ផ្ដន្ទាទោសដាក់ពន្ធនាគារ៣ឆ្នាំ និងតម្រូវឱ្យបង់លុយជំងឺចិត្ដទៅបុរសអ្នករត់ម៉ូតូឌុបពីរនាក់ សរុប៦០លានរៀល ៕
ចែករំលែកព័តមាននេះ