រាជធានីភ្នំពេញ ៖ ពាក្យបណ្តឹងរបស់លោក ជុំ ម៉ី អតីតអ្នករងគ្រោះនៅគុកទួលស្លែង ដែលនៅរស់រានមានជីវិតពីគុកទួលស្លែង និងជាតំណាងឱ្យប្រជាពលរដ្ឋទូទាំងប្រទេសដែលបានរួចផុតពីរបបកម្ពុជាប្រជាធិបតេយ្យ នៅព្រឹកថ្ងៃទី១៤ មិថុនា បានដាក់ពាក្យប្តឹងលោក កឹម សុខា ប្រធានស្តីទីគណបក្សសង្គ្រោះជាតិ ចូលសាលាដំបូងរាជធានីភ្នំពេញ ហើយពាក្យបណ្តឹងនោះត្រូវបានការិយាល័យរដ្ឋបាលបោះត្រាចូលទទួលស្គាល់ជាផ្លូវការ ។
លោក គួយ ធុនណា មេធាវីការពារក្តីឱ្យលោក ជុំ ម៉ី បានយកពាក្យបណ្តឹងនោះទៅដាក់ចូលតុលាការដែលមានខ្លឹមសារថា តាមរយៈខ្សែអាត់សំឡេងលោក កឹម សុខា បញ្ជាក់ថា គុកទួលស្លែងជាកន្លែងសិប្បនិម្មិត បន្ទាប់មកលោក កឹម សុខា បែរជានិយាយថា ជាការកាត់តទៅវិញ ។ ក្រោយពេលលោក កឹម សុខា និយាយបែបនេះ ធ្វើឱ្យអតីតអ្នករងគ្រោះក្នុងគុកទួលស្លែង ដែលនៅរស់រានមានជីវិតជាច្រើននាក់ ក៏ដូចជាប្រជាពលរដ្ឋខ្មែរដែលរងគ្រោះក្នុងរបបកម្ពុជាប្រជាធិបតេយ្យទូទាំងប្រទេស មានការឈឺចាប់ និងបានផ្ទុះកំហឹងរហូតឈានដល់ការប្រមូលផ្តុំគ្នារាប់ម៉ឺននាក់ធ្វើបាតុកម្មដោយអហិង្សា កាលពីថ្ងៃទី៩ មិថុនាកន្លងទៅ ដោយមានការទាមទារឱ្យលោក កឹម សុខា សុំទោសជាសាធារណៈ ។
បុ៉ន្តែផ្ទុយទៅវិញ បែរជាលោក កឹម សុខា គេចវេះមិនទទួលខុសត្រូវរាល់ទង្វើដែលបានខ្លួនបានធ្វើនោះឡើយ ហើយបែរទៅជាចោទថា សំឡេងនោះជាការកាត់ត ។ ប្រការយ៉ាងដូច្នេះហើយទើបបានជាលោក ជុំ ម៉ី ពឹងលោក គួយ ធុនណា ឱ្យធ្វើជាមេធាវីការពារក្តីដើម្បីរៀបចំដាក់ពាក្យប្តឹងលោក កឹម សុខា ទៅតុលាការឱ្យចាត់ការតាមច្បាប់ ។
ពាក្យបណ្តឹងរបស់លោក ជុំ ម៉ី បានបញ្ជាក់យ៉ាងច្បាស់ថា សំឡេងលោក កឹម សុខា និយាយទាំងប៉ុន្មានដែលថា គុកទួលស្លែងជាកន្លែងសិប្បនិម្មិតនោះ គឺលោកថតសំឡេងដោយផ្ទាល់ដៃ ហើយគ្មានអ្នកណាយកទៅកាត់តទេ ។ មន្ត្រីសាលាដំបូងរាជធានីភ្នំពេញបានបញ្ជាក់ប្រាប់អ្នកយកព័ត៌មានកោះសន្តិភាពដែរថា ការិយាល័យរដ្ឋបាល នឹងដាក់ពាក្យបណ្តឹងនេះជូនលោកប្រធាន ដើម្បីមានចំណាត់ការឱ្យលោកចៅក្រមចេញដីកាកោះហៅលោក កឹម សុខា មកសាកសួរបន្ថែម ប៉ុន្តែមិនទាន់កំណត់ពេលណានៅឡើយទេ ។
មុននេះមួយថ្ងៃ សម្តេចតេជោ ហ៊ុន សែន បានអំពាវនាវដល់លោក ជុំ ម៉ី ក៏ដូចជាអ្នកមានកំហឹងជាទូទៅលើសម្តីដែលនិយាយថា គុកទួលស្លែងជាកន្លែងសិប្បនិម្មិត សូមផ្អាកការធ្វើបាតុកម្មប្រឆាំងលោក កឹម សុខា ដោយសារតែខ្លាចមានការរំខានដល់ដំណើរការបោះឆ្នោតដែលខិតជិតចូលមក
ដល់ ។ សម្តេចតេជោ ក៏បានច្រានចោលការចោទប្រកាន់ថា មហាបាតុកម្មមនុស្សរាប់ម៉ឺននាក់នោះគឺគណបក្សប្រជាជនជាអ្នករៀបចំ ដោយសម្តេចបានសង្កត់ធ្ងន់ថា បើសិនជាគណបក្សប្រជាជនជាអ្នករៀបចំវិញ ប្រហែលលោក កឹម សុខា រត់ចូលទូតណាមួយហើយព្រោះវានឹងក្លាយជាមហាបាតុកម្មដ៏ធំបំផុត។
នៅថ្ងៃទី១៣ មិថុនាកន្លងមកនោះដែរ លោក ជុំ ម៉ី ក៏បានចេញសេចក្តីថ្លែងការណ៍របស់លោកពីការខកចិត្តចំពោះការឆ្លើយតបក្នុងនាមគណបក្សសង្គ្រោះជាតិ ដែលការពារសម្តីលោក កឹម សុខា ។ ខាងក្រោមនេះ គឺជាការថតចម្លងសេចក្តីថ្លែងការណ៍របស់លោក ជុំ ម៉ី ។
ចែករំលែកព័តមាននេះ