ខេត្តព្រះសីហនុ ៖ តំបន់សេដ្ឋកិច្ចពិសេសថ្មីមួយទៀតដែលលាតសន្ធឹងលើផ្ទៃដីប្រមាណជាង១៣០ហិកតា ស្ថិតនៅភូមិត្រពាំងមូល ឃុំជើងគោ ស្រុកព្រៃនប់ ត្រូវបានប្រកាសបើកការដ្ឋានសាងសង់ហើយ កាលពីថ្ងៃទី១៥ វិច្ឆិកា កន្លងមក…
ខេត្តព្រះសីហនុ ៖ តំបន់សេដ្ឋកិច្ចពិសេសថ្មីមួយទៀតដែលលាតសន្ធឹងលើផ្ទៃដីប្រមាណជាង១៣០ហិកតា ស្ថិតនៅភូមិត្រពាំងមូល ឃុំជើងគោ ស្រុកព្រៃនប់ ត្រូវបានប្រកាសបើកការដ្ឋានសាងសង់ហើយ កាលពីថ្ងៃទី១៥ វិច្ឆិកា កន្លងមក ។ តំបន់សេដ្ឋកិច្ចពិសេសថ្មីនេះ នឹងស្រូបកម្លាំងពលកម្មរាប់ម៉ឺននាក់បន្ថែមទៀត ខណៈបច្ចុប្បន្ន នៅក្នុងភូមិសាស្ត្រស្រុកព្រៃនប់ មានតំបន់សេដ្ឋកិច្ចពិសេសបិតត្រាំងមួយរួចទៅហើយដែលកំពុងដំណើរការយ៉ាងរលូត និងផ្ដល់ការងារដល់កូនខ្មែរប្រមាណ២ម៉ឺននាក់ ។
អភិបាលក្រុមហ៊ុនតំបន់សេដ្ឋកិច្ចពិសេស ចេ ជាង បានឲ្យដឹងថា តំបន់សេដ្ឋកិច្ចពិសេសនេះ ជាបុត្រសម្ព័ន្ធរបស់ក្រុមហ៊ុន ខេមបូឌា ចេ ជាង ហ្គ៍រ ជី អេសអុីហ្សេត បានសាងសង់លើផ្ទៃដីចំនួន១៣៣ហិកតា ស្ថិតនៅតាមបណ្តោយផ្លូវជាតិលេខ៤ ក្នុងភូមិត្រពាំងមូល ឃុំជើងគោ ស្រុកព្រៃនប់ ខេត្តព្រះសីហនុ ។
លោកបន្ដថា ៖« តំបន់សេដ្ឋកិច្ចពិសេសនេះ មានចម្ងាយពីតំបន់វាលរេញប្រមាណជាង៥គីឡូម៉ែត្រ និងពីទីរួមខេត្តព្រះសីហនុប្រមាណជា៥៣គីឡូម៉ែត្រ ហើយជាជំហានដំបូង តំបន់សេដ្ឋកិច្ចនេះ នឹងអាចស្រូបយកកម្មករប្រមាណ១ម៉ឺននាក់ »។
លោក កឹម ស៊ីថន រដ្ឋលេខាធិការក្រសួងពាណិជ្ជកម្ម បានលើកឡើងថា ខេត្តព្រះសីហនុមានការអភិវឌ្ឍឥតឈប់ឈរ ។ ជាក់ស្តែង ពេលនេះ ខេត្តមានតំបន់សេដ្ឋកិច្ចពិសេសមួយថ្មីទៀតក្នុងទឹកដីស្រុកព្រៃនប់ ដែលជាការអភិវឌ្ឍក្រោមដំបូលសន្តិភាព សេដ្ឋកិច្ចរីកម្រើន ដោយមានសម្តេចតេជោ ហ៊ុន សែន ជាប្រមុខដឹកនាំដ៏ឈ្លាសវៃ និងប្រកបដោយគតិបណ្ឌិត ។ លោករដ្ឋលេខាធិការបញ្ជាក់ថា ៖« នេះជាតំបន់សេដ្ឋកិច្ចពិសេសទី២ បន្ទាប់តំបន់សេដ្ឋពិសេសបិតត្រាំង ដែលកំពុងដំណើរការយ៉ាងរលូន ដែលបានផ្ដល់ការងារជូនកម្មកររាប់ម៉ឺននាក់នៅទីនោះ » ។
បច្ចុប្បន្នខេត្តព្រះសីហនុបានក្លាយជាខេត្តមួយ ដែលបាននិងកំពុងទាក់ទាញអ្នកវិនិយោគចិនជាច្រើន ចូលទៅវិនិយោគនៅទីនោះ ដោយសារខេត្តនេះស្ថិតក្នុងគម្រោង « ខ្សែក្រវាត់មួយ ផ្លូវមួយ » របស់ចិន ក៏ដូចជា ស្របតាមផែនការរបស់រាជរដ្ឋាភិបាល ដែលបានដាក់ខេត្តនេះទាំងមូលជាតំបន់ឧស្សាហកម្ម នៅក្នុងគោលនយោបាយអភិវឌ្ឍន៍វិស័យឧស្សាហកម្មរបស់រាជរដ្ឋាភិបាល ដែលបានប្រកាសដាក់ឲ្យប្រើប្រាស់ ដោយសម្តេចតេជោ ហ៊ុន សែន នាយករដ្ឋមន្ត្រីកាលពីខែតុលា ឆ្នាំ២០១៥ ។
លោកបណ្ឌិត ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា បានថ្លែងកន្លងមកថា កំណើននៃការវិនិយោគរបស់ចិននៅកម្ពុជា ដោយសារទំនាក់ទំនងល្អរវាងរដ្ឋាភិបាលប្រទេសទាំងពីរ ដែលបានដាក់ចេញនូវយុទ្ធសាស្ត្រគ្រប់ជ្រុងជ្រោយ ស្របពេលចិនក៏ចង់ពង្រីកផលប្រយោជន៍សេដ្ឋកិច្ចក្នុងតំបន់អាស៊ានផងដែរ ហើយចិនអាចឈរជើង និងអាចយកកម្ពុជាជាចំណតមួយ ទាំងក្នុងទិដ្ឋភាពនយោបាយ សេដ្ឋកិច្ច និងភូមិសាស្ត្រនយោបាយ ខណៈដែលចិនមិនអាចឈរជើងជាមួយវៀតណាម ថៃ មីយ៉ាន់ម៉ា ដោយសារប្រទេសទាំងនោះជាកូនក្រមុំដែលបានងាកទៅរកអាមេរិក ។
លោកបន្តថា ៖« ពីមុនមក ចិនបានចាប់ដៃជាមួយមីយ៉ាន់ម៉ា ប៉ុន្តែពេលនេះមីយ៉ាន់ម៉ាបានងាកទៅអាមេរិក ដូច្នេះមានតែកម្ពុជាទេ ដែលចិនអាចឈរជើងបាន »។ លោកបន្ថែមថា ៖« ប្រវត្តិសាស្ត្រកម្ពុជា និងចិនក៏មានភាពយូរអង្វែងដែរ ស្របពេលចិនបានដាក់ចេញគោលនយោបាយផ្លូវសូត្រ និងចិនមានប្រជាជនច្រើន លុយច្រើន គាត់ក៏បង្ហូរមកកាន់អាស៊ី និងអាហ្វ្រិក ដើម្បីផ្តល់ការងារនិងផលប្រយោជន៍សេដ្ឋកិច្ចដល់គាត់ »។
លោកបណ្ឌិត ហុង វណ្ណៈ បានបញ្ជាក់ថា ៖« ស្របពេលកម្លាំងធនធានរបស់កម្ពុជាមានកម្រិត ហេតុនេះយើងត្រូវទទួលជំនួយរបស់គេ ដើម្បីយកមកអភិវឌ្ឍន៍ប្រទេស តែបើគិតអវិជ្ជមានជារឿងផ្សេង ហើយបើគិតពីវិជ្ជមាន គឺយើងមានតម្រូវការធនធាន និងការវិនិយោគ ដើម្បីយកមកកសាងប្រទេស »។ លោកថា ៖« បើនិយាយពីចិនវិនិយោគនៅខេត្តព្រះសីហនុវិញ គឺចិនចូលចិត្តតំបន់សមុទ្រ តំបន់សមុទ្រជាគោលដៅរបស់ពួកគេ និងជាតំបន់ដែលមានសក្តានុពលសេដ្ឋកិច្ច »៕
ចែករំលែកព័តមាននេះ