បន្ទាយមានជ័យ ៖ មនុស្សម្នាក់បានស្លាប់ក្នុងហេតុការណ៍គ្រោះថ្នាក់ចរាចរណ៍រវាងរថយន្ត និងម៉ូតូបុកគ្នាពេញទំហឹង កាលពីម៉ោងជាង២២យប់ ថ្ងៃទី១៦ វិច្ឆិកានេះ លើដងផ្លូវជាតិលេខ៥ មុខស្ថានីយដឹកអ្នកដំណើរស៊ូជីង ភូមិអណ្តូងថ្មមាស សង្កាត់ផ្សារកណ្តាល ក្រុងប៉ោយប៉ែត ។
ជនរងគ្រោះឈ្មោះ ភឿន ថង ភេទប្រុស អាយុ២០ឆ្នាំ មានទីលំនៅភូមិកោះស្នួល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ។ ប្រភពថា ដំបូងជនរងគ្រោះបើកម៉ូតូម៉ាក MSX ពណ៌ក្រហម ពាក់ស្លាកលេខ ភ្នំពេញ1Q- 5673 ក្នុងទិសដៅពីកើតទៅលិច ខណៈឡើងជែងម៉ូតូ១គ្រឿងទៀត ស្របទិសក៏បុកជាមួយរថយន្តដែលបញ្ច្រាសទិសម៉ាកកូរ៉ូឡា ពណ៌ខ្មៅ ពាក់ស្លាកលេខ 2E- 4535 ពេញទំហឹង បណ្តាលឲ្យស្លាប់ និងអូសក្រោមរថយន្តប្រហែល៦០ទៅ៧០ម៉ែត្រ ។ យ៉ាងណាក៏ដោយសមត្ថកិច្ចជំនាញចរាចរណ៍ក្រុងប៉ោយប៉ែតប្រាប់ថា អ្នកបើកបររថយន្តបង្កឃាត់ខ្លួន ហើយឈ្មោះ លេង ច័ន្ទធូ ភេទប្រុស អាយុ២៤ឆ្នាំ មុខរបរជាងបិទស្គុតម៉ូតូរស់នៅភូមិ និងឃុំជ្រោយនាងនួន ស្រុកស្រីស្នំ ខេត្តសៀមរាប ។
ក្រោយវាស់វែងសមត្ថកិច្ចទាក់ទងហៅសាច់ញាតិយកសពទៅធ្វើបុណ្យតាមប្រពៃណីយ ។ យានយន្តពាក់ព័ន្ធទាំង២ត្រូវសមត្ថកិច្ចនាំយកទៅរក្សាទុកនៅប៉ុស្តិ៍រដ្ឋបាលនគរបាលសង្កាត់និមិត្ត ។ អ្នកបើកបររថយន្តបង្កសមត្ថកិច្ចអះអាងថា កំពុងសួរនាំ ដើម្បីកសាងសំណុំរឿងបញ្ជូនទៅករិយាល័យចរាចរណ៍ជើងគោកខេត្តចាត់ការបន្ត ៕
ចែករំលែកព័តមាននេះ