រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា បង្គន់អនាម័យ និងបន្ទប់ទឹកចំនួន៦៤៨បង្គន់ ក្នុងនោះបង្គន់អនាម័យចំនួន៤៩៨បន្ទប់ និងបន្ទប់ទឹកចំនួន១៥០បន្ទប់ត្រូវបានអង្គភាពជំនាញរបស់មន្ទីរសាធារណការ និងដឹកជញ្ជូនរាជធានីភ្នំពេញដាក់ពង្រាយទៅតាមគោលដៅដែលបានកំណត់ និងកម្មករជិត៣០០នាក់ ក្នុងការងារអនាម័យ និងថែទាំសួនច្បារក្នុង ដើម្បីត្រៀមទទួល និងជួយសម្រួលដល់ប្រជាពលរដ្ឋដែលអញ្ជើញចូលរួមក្នុងព្រះរាជពិធីព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកឆ្នាំ២០១៨នេះ ។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញបានឲ្យដឹងថា ក្នុងព្រះរាជពិធីបុណ្យអំទូកខាងមុខនេះមន្ទីរបានរៀបចំដាក់បង្គន់អនាម័យពង្រាយនៅតាមដងផ្លូវសាធារណៈ និងតំបន់ជុំវិញមាត់ទន្លេទាំងត្រើយខាងលិច និងខាងកើត ពិសេសនៅតាមសួនច្បារនានា ដើម្បីទទួលប្រជាពលរដ្ឋដែលអញ្ជើញមកទស្សនា និងកម្សាន្តក្នុងព្រះរាជពិធីបុណ្យអុំទូក ។
លោកបន្តថា បង្គន់អនាម័យ និងបន្ទប់ទឹកចំនួន៦៤៨ បង្គន់នោះត្រូវបានដាក់ពង្រាយរួមមាន៖ ទី១- បង្គន់ថ្មដែលមានស្រាប់ មានចំនួន១៦២បន្ទប់ គឺដាក់នៅសួនមុខដរអរិយក្សត្រមានចំនួន ១៣បន្ទាប់ ,សួនខាងត្បូងក្រុមសម្តេចឪមាន០៨បន្ទប់ ,សួនក្រមង៉ុយមាន០៨បន្ទប់ ,សួនកុមារវត្តបុទុមវត្តីមាន១៣បន្ទប់ ,សួនមុខវត្តបុទុមវតីមាន២០បន្ទប់ ,សួនច្បារមុខវាំង (ខាងត្បូងព្រះអង្គដង្កើរ) មាន១៨ ,សួនកុមារវត្តភ្នំ (ខាងក្នុងបរិវេណ) មាន០៩បង្គន់ ,សួនលោកយាយពេញចំនួន០៤ ,ទីលានប្រជាធិបតេយ្យចាស់មាន០៨បន្ទប់ ,ទីលានប្រជាធិបតេយ្យថ្មី មាន២០បន្ទប់, សួនខាងកើតក្រសួងការពារជាតិ (ក្តាន់ពីរ) មាន០៨បន្ទប់ ,វាលមេរុខាងកើតមាន០៦, វាលមេរុខាងលិច០៦ , សួនព្រះនាងប្រាជ្ញាបារមីមាន២១បន្ទប់ ។ ទី២ – បង្គន់ចល័តមានស្រាប់មានចំនួន១៦បង្គន់ ក្នុងនោះខាងមុខស្ថានទូតបារាំងចំនួន០២បង្គន់, ខាងជើងជាប់របង CDC មាន០២ ,ខាងត្បូងជាប់របងសាលាចតុមុខមាន០២ , ផ្សាររាត្រីមាន០៤ ,សួនឆ្នេរទន្លេមាន០២, សួនខាងត្បូងស្ពានភ្លោះកោះពេជ្រមាន០៤ ។
ទី៣ – តាំងត្រូវដាក់បង្គន់ចល័តមានចំនួន៧០បង្គន់ គឺសួនច្បារមាត់ទន្លេ (ខាងត្បូងតេជោយ៉ត) មានចំនួន១៨បង្គន់, សួនច្បារមាត់ទន្លេ (ខាងកើតផ្សារចាស់) មានចំនួន១០បង្គន់ ,សួនមាត់ទន្លេ (មុខCDC) មាន០៤ ,ក្នុងតំបន់កំពង់ផែមាន១០ បង្គន់ ,ក្នុងតំបន់កំពង់ផែ (ទូកក្រុចឆ្មា) នៅគល់ស្ពានមាន០៦បង្គន់ ទីបញ្ជាការទូក (OCIC) មាន០៣ ,បញ្ជាការនគរបាល និងកងរាជអាវុធហត្ថមាន០៤ ជាប់របងឌ្រីមលែនមាន០៦ ,ត្រៀមបំរុងទុកចំនួន០៩បង្គន់ ។ ទី៤ -ទីតាំងបង្គន់ជីករណ្តៅសម្រាប់កីឡាករអុំទូកនៅជ្រោយចង្វារត្រើយខាងកើត (OCIC) មាន២៥០បង្គន់ ក្នុងនោះបង្គន់ចំនួន១៥០ និងបន្ទប់ទឹកចំនួន១០០បន្ទប់ ទី៥- ទីតាំងឃ្លាំងសាំងសូគីម៉ិច សម្រាប់កីឡាករអុំទូកមានចំនួន១៥០បង្គន់ ក្នុងនោះបង្គន់១០០ និងបន្ទប់ទឹកមានចំនួន៥០បន្ទប់ផងដែរ ។
លោក សាំ ពិសិដ្ឋ បានបញ្ជាក់ថា ក្រៅពីរៀបចំបង្គន់អនាម័យខាងលើនេះមន្ទីរក៏បានដាក់ពង្រាយប្រព័ន្ធភ្លើងចម្រុះពណ៌នៅតាមដើមឈើ និងបង្គោលភ្លើងសម្រាប់លំអរ និងបំភ្លឺក្នុងរាជធានីឲ្យបានច្រើនថែមទៀត ដើម្បីជួយលើកសោភណ្ឌភាពទីក្រុងឲ្យសក្តិសមនឹងព្រះរាជពិធី និងតាមផែនការណែនាំរបស់គណៈកម្មាធិការជាតិរៀបចំបុណ្យក៏ដូចជា រដ្ឋបាលរាជធានីភ្នំពេញតែម្តង ។
ចំណែកលោក សំ សាមុត ប្រធានអង្គភាពសួនច្បារ និងរុក្ខជាតិរាជធានីភ្នំពេញបានឲ្យដឹងថា ព្រះរាជពិធីព្រះរាជពិធីបុណ្យអុំទូកបណ្តែតប្រទីប និងសំពះព្រះខែ អកអំបុកឆ្នាំ២០១៨នេះ អង្គភាពរបស់លោកបានរៀបចំកម្លាំងប្រចាំការសម្រាប់បោសសំអាត និងប្រមូលសំរាមតាមសួនច្បារមានចំនួន២៩០នាក់ ដោយចាប់ផ្តើមបោសសំអាតចាប់ពីម៉ោង១២យប់ រហូតដល់ម៉ោង៧ព្រឹក និងបានត្រៀមសម្ភារៈគ្រប់គ្រាន់រួចហើយ ។ សូមបញ្ជាក់ថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកឆ្នាំ២០១៨នេះមានរយៈពេល៣ថ្ងៃ ដែលនឹងប្រព្រឹត្តទៅចាប់ពីថ្ងៃទី២១-២២ និងថ្ងៃទី២៣ វិច្ឆិកា ៕
ចែករំលែកព័តមាននេះ