រាជធានីភ្នំពេញ ៖ ចាប់តាំងពីដើមឆ្នាំ២០១៣នេះមក ការរកទទួលទានផ្នែកវិស័យអចលនទ្រព្យនៅកម្ពុជា អ្នកជំនាញ និងអ្នកវាយតម្លៃលើវិស័យនេះ បានពោលសរសើរថា ជាឆ្នាំដែលល្អប្រសើរសម្រាប់វិស័យអចលនទ្រព្យនៅ កម្ពុជា ។ កន្លងមក នៅពេលជិតដល់រដូវកាលបោះឆ្នោតជ្រើសរើសតំណាងរាស្រ្ដ សកម្មភាពជួញដូរដីធ្លី ដូចជាការទិញ-លក់ដីធ្លីជាដើម ពុំសូវមានសកម្មភាពខ្លាំង
រាជធានីភ្នំពេញ ៖ ចាប់តាំងពីដើមឆ្នាំ២០១៣នេះមក ការរកទទួលទានផ្នែកវិស័យអចលនទ្រព្យនៅកម្ពុជា អ្នកជំនាញ និងអ្នកវាយតម្លៃលើវិស័យនេះ បានពោលសរសើរថា ជាឆ្នាំដែលល្អប្រសើរសម្រាប់វិស័យអចលនទ្រព្យនៅ កម្ពុជា ។ កន្លងមក នៅពេលជិតដល់រដូវកាលបោះឆ្នោតជ្រើសរើសតំណាងរាស្រ្ដ សកម្មភាពជួញដូរដីធ្លី ដូចជាការទិញ-លក់ដីធ្លីជាដើម ពុំសូវមានសកម្មភាពខ្លាំងក្លាទេ តែបច្ចុប្បន្ននេះ ទោះបីជានៅតែប្រមាណជិត២ខែទៀត មានព្រឹត្ដិការណ៍បោះឆ្នោតជ្រើសរើសតំណាងរាស្រ្ដ ក៏សកម្មភាពទិញ-លក់ ជួញដូរដីធ្លីនៅមានភាពល្អប្រសើរ និងចេះតែបន្ដកើនឡើងជាលំដាប់ ។ ជាក់ស្ដែង ក្នុងរាជធានីភ្នំពេញ ការសាងសង់ និងទិញ-លក់អចលនទ្រព្យផ្សេងៗចេះតែបន្ដយ៉ាងរលូន ដោយពុំមានបញ្ហាអ្វីទេ ។
លោក គីម ហេង នាយកគ្រប់គ្រងក្រុមហ៊ុនអចលនទ្រព្យ Khmer Real Estate មានប្រសាសន៍ថា វិស័យដីធ្លីបច្ចុប្បន្ននេះមានកំណើនឡើងគួរសម បើប្រៀបធៀបនឹងរយៈពេលដូចគ្នាកាលពីឆ្នាំមុន ចំពោះដីប្រភេទឧស្សាហកម្មដូចជាដីនៅតាមផ្លូវជាតិលេខ៣ និងលេខ៤ ដែលសំបូរទៅដោយបណ្ដុំរោងចក្រមានកំណើនគួរឱ្យកត់សម្គាល់ ។ ចំពោះដីលំនៅឋានដែលគេសម្រាប់សាងសង់ជាបុរី និងផ្ទះល្វែងឃើញថា មានការកើនឡើងច្រើន ហើយកើនឡើងខ្លាំងជាងដីប្រភេទឧស្សាហកម្ម ។ ជាក់ស្ដែងគ្រាន់តែគម្រោងសាងសង់បុរីពីរ គឺបុរីពិភពថ្មី និងបុរីប៉េង ហួត ត្រូវការទិញដីច្រើនណាស់ ហើយនៅមានគម្រោងសាងសង់របស់បុរីផ្សេងៗជាច្រើនទៀតនៅតាមជាយក្រុង នៅជិតៗក្រុងកំពុងសាងសង់ ។
កត្ដាទាំងអស់នេះហើយ ដែលធ្វើឱ្យដីលំនៅឋានមានការកើនឡើងចន្លោះពី២០%ទៅ៣០% ក្នុងរយៈពេលដូចគ្នាឆ្នាំ២០១២ និងឆ្នាំ២០១៣ ។ ដោយឡែកដីនៅតំបន់ពិសេសក្នុងរាជធានីភ្នំពេញ ដូចជានៅបឹងកេងកង១ បឹងកេងកង២ អូឡាំពិក ទួលស្វាយព្រៃ ទួលគោក មាត់ទន្លេជាដើម ជាដីដែលស្ថិតនៅតាមបណ្ដោយផ្លូវធំៗ ក្នុងរយៈដូចគ្នាគឺវាមានការកើនឡើងខ្ពស់ផងដែរ គឺប្រហែលជា៣០% ។ លោកបន្ដថា ការបោះឆ្នោតជារឿងដែលសំខាន់ ហើយមនុស្សភាគច្រើនចេះតែគិតថាខ្លាចមានបញ្ហា តែតាមពិតទៅប្រទេសកម្ពុជាធ្លាប់ឆ្លងកាត់ការបោះឆ្នោតនេះ៥ដងរួចមកហើយ មិនមែនជាលើកទី១ទេ រឿងនេះអ្នកវិនិយោគជាតិ និងអន្ដរជាតិជាច្រើនគេបានគិតពីបញ្ហានេះ ហើយគេក៏ដឹងហើយថា នឹងមិនមានអ្វីកើតឡើងចំពោះប្រទេសកម្ពុជាទេ ។ សព្វថ្ងៃមានភ្ញៀវជាច្រើនទាក់ទងទៅក្រុមហ៊ុនលោកផ្ទាល់ដើម្បីទិញ និងលក់ដីធ្លី និងអចលនទ្រព្យផ្សេងៗ ។ ភាគច្រើននៃដីដែលអ្នកវិនិយោគទិញសម្រាប់សាងសង់ជាលំនៅឋាន ខុនដូរ វីឡាជាដើម ព្រោះថាសព្វថ្ងៃនេះ ទោះបីជាខុនដូ ផ្ទះល្វែងសាងសង់ច្រើនយ៉ាងណាក៏ដោយ តែជារៀងរាល់ឆ្នាំមានប្រជាពលរដ្ឋដែលមកពីបណ្ដាខេត្ដផ្លាស់ទីលំនៅមកភ្នំពេញ ដូចជាសិស្ស និស្សិត មកបន្ដការសិក្សា ហើយរាល់តម្រូវការទាំងអស់នេះហើយ ទើបសព្វថ្ងៃផ្ទះល្វែងស្ទើរតែគ្រប់កន្លែងសាងសង់ស្ទើរតែពុំទាន់ផង ។
លោក សាញ់ សាឡែន នាយកគ្រប់គ្រងក្រុមហ៊ុនសាឡែនរៀលធី ក៏បានឱ្យដឹងដែរថា នៅពេលនេះដីធ្លីនៅរាជធានីភ្នំពេញ ហាក់មិនមានអ្វីប្រែប្រួលធ្លាក់ចុះដូចការព្រួយបារម្ភជិតដល់ពេលបោះឆ្នោតទេ ។ ដីនៅតំបន់ខ្លះមានតែបន្ដការកើនឡើង ហើយនៅតំបន់ខ្លះទៀតនៅទ្រឹងដដែល មិនធ្លាក់ចុះទេ ។ ទោះបីជាជិតបោះឆ្នោត ការរកទទួលទានខាងវិស័យអចលនទ្រព្យ ជាពិសេសដីធ្លីនៅតែដំណើរការទៅជាធម្មតា គ្រាន់តែសកម្មភាពមិនសូវជាខ្លាំងដូចមុន តែក៏មិនខ្សោយពេកដែរ ។ លោកលើកឡើងថា កាលពីការបោះឆ្នោតអាណត្ដិមុនៗ ការទិញ-លក់វិស័យអចលនទ្រព្យនៅពេលជិតបោះឆ្នោតមានបញ្ហាមែន តែនៅពេលនេះ ទោះបីការបោះឆ្នោតជិតមកដល់ហើយក្ដី ក៏ការរកទទួលទានខាងវិស័យអចលនទ្រព្យមិនមានអ្វីផ្លាស់ប្ដូរទេ ព្រោះថា អ្នកនយោបាយសព្វថ្ងៃភាគច្រើនមានចរិតចាស់ទុំ គិតពីផលប្រយោជន៍ជាតិ ហើយអ្នកដែលគេរកស៊ីខាងវិស័យនេះ ក៏គេដឹងដែរថាវានឹងមិនមានអ្វីកើតឡើងក្នុងប្រទេសកម្ពុជាទេ ។
បច្ចុប្បន្ននេះ តម្លៃដីធ្លីនៅតាមតំបន់មួយចំនួនក្នុងរាជធានីភ្នំពេញ ដូចជានៅតំបន់ពិសេសលេខ១ តំបន់ទន្លេបាសាក់ មានតម្លៃរហូតដល់៥.០០០ដុល្លារអាមេរិកក្នុងមួយម៉ែត្រការ៉េ តំបន់លេខ២ ដូចជាដូនពេញមានតម្លៃរហូតដល់៤.០០០ដុល្លារអាមេរិកក្នុងមួយម៉ែត្រការ៉េ និងលេខ៣ ដូចជាតំបន់បឹងកេងកង មានតម្លៃចន្លោះពី៣.០០០ដុល្លារទៅ៤.០០០ដុល្លារអាមេរិកក្នុងមួយម៉ែត្រការ៉េ ។ ក្រៅពីតំបន់ទាំងអស់នេះ កន្លែងខ្លះមានតម្លៃនៅលើ២.០០០ដុល្លារអាមេរិក និងតំបន់ខ្លះទៀតអាចស្ថិតនៅក្រោម២.០០០ដុល្លារក៏មាន ដូចជាតំបន់នៅតាមជាយក្រុង ក្នុងសង្កាត់ភ្នំពេញថ្មី ខណ្ឌសែនសុខ ។
លោកសង្ឃឹមថា នៅពេលបោះឆ្នោតហើយ វិស័យដីធ្លីនឹងមានភាពល្អប្រសើរជាងនេះទៀត ហើយចំពោះអ្នកដែលចង់រកទទួលទានខាងវិស័យនេះពិតជាមានភាពវិជ្ជមានសម្រាប់ពួកគេ ព្រោះថាដីធ្លីនឹងមិនធ្លាក់ចុះវិញនោះទេ វានឹងបន្ដការកើនឡើងទៅទៀត ៕
ចែករំលែកព័តមាននេះ