ខេត្តរតនៈគីរី ៖ ស្ត្រីជនជាតិដើមភាគតិចច្រាយម្នាក់ខឹងប្ដីដើរផឹកស្រាស្រវឹងស្ទើរតែរាល់ថ្ងៃ បានសម្រេចចិត្តលេបថ្នាំពន្យាកំណើតអស់ចំនួន២៨គ្រាប់ បានជិត១ម៉ោង ក្រោយសន្លប់បែកពពុះមាត់ធ្វើឲ្យមានការភ្ញាក់ផ្អើលដល់ប្រជាពលរដ្ឋជនជាតិដើមភាគតិចដូចគ្នា ពេញ១ភូមិតែម្តងហេតុការណ៍នេះបានកើតឡើង វេលាម៉ោង៧និង៤៥នាទីល្ងាច នៅថ្ងៃទី១៥ ខែវិច្ឆិកា ឆ្នាំ២០១៨ ស្ថិតនៅភូមិចង ឃុំញ៉ាង ស្រុកអណ្ដូងមាស ។
បើតាមរបាយការណ៍របស់សមត្ថកិច្ចប៉ូលិសឃុំនឹងស្រុកបានឲ្យដឹងថា ស្ត្រីរងគ្រោះមានឈ្មោះ ក្លាន ភៀន ភេទស្រី អាយុ៣៦ឆ្នាំ ជនជាតិភាគតិចច្រាយ មានកូន៣នាក់ មានមុខរបកសិកររស់នៅភូមិឃុំកើតហេតុខាងលើ ។
ទាក់ទិននឹងរឿងខាងលើនេះត្រូវបានសមត្ថកិច្ចប៉ូលិសឲ្យដឹងថា នៅមុនពេលកើតហេតុប្ដីស្ត្រីរងគ្រោះបានចេញពីផ្ទះទៅផឹកស្រា នៅផ្ទះអ្នកជិតខាងប្រហែលជាម៉ោង៤រសៀលដល់ម៉ោងកើតហេតុ ប្ដីបានត្រឡប់មកផ្ទះវិញ ពេលមកដល់ផ្ទះភ្លាមស្ត្រីជាប្រពន្ធបានជេនឹងស្ដីបន្ទោសខ្លាំងៗក៏កើតជាជម្លោះពាក្យសម្ដីឡើង ហើយបុរសជាប្ដីបានខឹងប្រពន្ធយ៉ាងខ្លាំងដើរចូលទៅក្នុងផ្ទះយកម៉ាស៊ីនត្រងឌឺន័មកអារច្រៀកឈើកូនក្រលឹងជាង១០ដុំកម្ទេចចោល ស្ត្រីជាប្រពន្ធឃើញប្ដីធ្វើបែបនេះក៏បានដើរទៅឃាត់ប្ដី ហើយសមត្ថកិច្ចបានបន្តទៀតថា ពេលស្ត្រីជាប្រពន្ធឃាត់ និងហាមមិនឲ្យកាត់បំផ្លាញឈើទុកសម្រាប់ផ្ទះ តែលោកប្ដីមិនបានស្ដាប់ប្រពន្ធទេធ្វើសកម្មភាពអារឈើរហូតដល់ខូចខាតខ្ទេចខ្ទីអស់គ្មានសល់ធ្វើឲ្យស្ត្រីជាប្រពន្ធខឹងយ៉ាងខ្លាំង បានដើរចូលទៅក្នុងផ្ទះយកថ្នាំពន្យាកំណើតចំនួន២៨គ្រាប់លេបទាំងអស់ បានរយៈពេលជិត១ម៉ោង ស្រាប់ស្ត្រីរងគ្រោះបានដួលប្រកាច់បែកពពុះមាត់សន្លប់បាត់បង់ស្មារតី ។
ក្រោយពីកើតហេតុត្រូវបានប្ដី និងបងប្អូនដឹកជនរងគ្រោះមកជួយសង្រោះនៅមន្ទីរពេទ្យបង្អែកខេត្តទាំងយប់ ។ បច្ចុប្ប្នស្ត្រីរងគ្រោះកំពុងសម្រាកព្យាបាលនៅមន្ទីរពេទ្យបង្អែកខេត្ត បើតាមការឲ្យដឹងពីសំណាក់លោកគ្រូពេទ្យបង្អែកខេត្តថា ស្ត្រីរងគ្រោះពេលដឹកមកដល់មន្ទីរពេទ្យភ្លាមគ្រូពេទ្យបានបូមជាតិថ្នាំនឹងលាងក្រពះចេញអស់ហើយសុភាពជំងឺបានធូរស្រាលនឹងរួចផុតពីសេចក្ដីស្លាប់ផងដែរ ៕
ចែករំលែកព័តមាននេះ