រាជធានីភ្នំពេញ ៖ ក្រុមយុវពលរដ្ឋឆ្នើមនៃអង្គការយុវតារាកម្ពុជាចំនួន៦០នាក់ ទទួលបានវិញ្ញាបនបត្រពីលោកបណ្ឌិត ហ៊ុន ម៉ាណែត សមាជិកក្រុមប្រឹក្សាភិបាលអង្គការយុវតារាកម្ពុជា ដែលបានរៀបចំធ្វើឡើងនៅវិទ្យាស្ថានអន្ដរទ្វីបអាមេរិកាំង កាលពីព្រឹកថ្ងៃព្រហស្បតិ៍ទី១៣ មិថុនា ។
រាជធានីភ្នំពេញ ៖ ក្រុមយុវពលរដ្ឋឆ្នើមនៃអង្គការយុវតារាកម្ពុជាចំនួន៦០នាក់ ទទួលបានវិញ្ញាបនបត្រពីលោកបណ្ឌិត ហ៊ុន ម៉ាណែត សមាជិកក្រុមប្រឹក្សាភិបាលអង្គការយុវតារាកម្ពុជា ដែលបានរៀបចំធ្វើឡើងនៅវិទ្យាស្ថានអន្ដរទ្វីបអាមេរិកាំង កាលពីព្រឹកថ្ងៃព្រហស្បតិ៍ទី១៣ មិថុនា ។
លោកបណ្ឌិត ហ៊ុន ម៉ាណែត មានប្រសាសន៍ថា យុវពលរដ្ឋឆ្នើមទាំង៦០នាក់នេះ បានឆ្លងកាត់ការចូលរួមសេវាកម្មស្ម័គ្រចិត្ដអស់រយៈពេលមួយឆ្នាំនៅតាមសហគមន៍នានានៅតាមបណ្ដាខេត្ដមួយចំនួន និងទទួលបានស្នាដៃជាច្រើនសម្រាប់ប្រជាពលរដ្ឋខ្មែរ និងសង្គមជាតិទាំងមូល ។ អង្គការយុវតារាកម្ពុជាត្រូវបានបង្កើតឡើងកាលពីឆ្នាំ២០០៨ ហើយបានចូលរួមបម្រើសេវាកម្មស្ម័គ្រចិត្ដយ៉ាងសកម្មជាមួយប្រជាពលរដ្ឋនៅតាមសហគមន៍នានា បានចែករំលែកបទពិសោធន៍ និងផ្លាស់ប្ដូរខ្សែជីវិតយុវជន និងកុមារក្រីក្រជាច្រើនឱ្យពួកគេទទួលបានការសិក្សា អប់រំ ហើយក៏ឈានទៅដល់ការលុបំបាត់អំពើហិង្សាក្នុងគ្រួសារ រហូតដល់ទៅ៧០ភាគរយទៀតផង ។
លោក ឌុន វត្ថា តំណាងអ្នកស្ម័គ្រចិត្ដរបស់អង្គការយុវតារាកម្ពុជា បានឱ្យដឹងថា ក្រុមរបស់លោកបានចូលរួមការងារស្ម័គ្រចិត្ដនៅភូមិក្រូចឆ្មារ ឃុំក្រូច ស្រុកក្រូចឆ្មារ ខេត្ដកំពង់ចាម ជាលើកដំបូង និងបានជួបផលវិបាកខ្លះៗដែរ ។ប៉ុន្ដែក្រោយពីរូបលោកបានចូលជ្រៅជាមួយប្រជាពលរដ្ឋ និងបានពន្យល់ណែនាំ អប់រំនូវអ្វីដែលមានសារប្រយោជន៍សម្រាប់ខ្លួនឯង សម្រាប់គ្រួសារ និងសម្រាប់សង្គមជាតិទាំងមូលអស់រយៈពេលជាច្រើនថ្ងៃរួចមក ឃើញថាប្រជាពលរដ្ឋជាច្រើនយល់ដឹងកាន់តែខ្លាំង ។
លោកបណ្ឌិត ហ៊ុន ម៉ាណែត មានប្រសាសន៍បន្ថែមថា យុវជនគឺជាសសរទ្រូងរបស់ប្រទេសជាតិ ធ្វើអ្វីត្រូវតែធ្វើមុនគេ ហើយបើហ៊ាននិយាយគឺត្រូវតែធ្វើ ពេលនេះគឺជាពេលវេលាមួយរបស់យុវជនយើងទាំងអស់គ្នា ត្រូវកសាងខ្លួន កសាងគ្រួសារ និងសង្គមជាតិយើង ហើយត្រូវផ្សារភ្ជាប់ខ្លួនជាមួយប្រទេសជាតិ និងសង្គម។ បើមិនបានធ្វើអ្វីឱ្យមានការរីកចម្រើនទេ ក៏កុំធ្វើអ្វីដែលបង្កផលវិបាកដល់សង្គម ។ លោកក៏សូមអំពាវនាវដល់យុវជនយើងទាំងអស់ចូលរួមបម្រើក្នុងកម្មភាពឱ្យបានផុលផុស ព្រោះថាបច្ចុប្បន្នប្រទេសយើងទទួលបានសុខសន្ដិភាពពេញលេញ ។ ដូច្នេះ ពេលនេះគឺជាពេលវេលាមួយ ដែលយុវជនទាំងអស់ត្រូវចូលរួមធ្វើអ្វីដែលល្អសម្រាប់ខ្លួនឯង សម្រាប់គ្រួសារ និងសម្រាប់សង្គមជាតិ ៕
ចែករំលែកព័តមាននេះ