ខេត្តបាត់ដំបង ៖ រថយន្តមួយគ្រឿងរបស់លោកនាយកវិទ្យាល័យនេតយ៉ង់ ត្រូវក្មេងអន្ធពាលដែលគេសង្ស័យថាជាសិស្សបានប្រើដុំថ្មគប់បំបែកកញ្ចក់ផ្នែកខាងក្រោយខ្ទេច កាលពីវេលាម៉ោងជាង៩ព្រឹកថ្ងៃទី១៣ មិថុនា ខណៈដែលលោកចតទុកក្នុងបរិវេណនៃវិទ្យាល័យនេតយ៉ង់ ក្នុងសង្កាត់ព្រែកព្រះស្តេច ក្រុងបាត់ដំបង ។
ខេត្តបាត់ដំបង ៖ រថយន្តមួយគ្រឿងរបស់លោកនាយកវិទ្យាល័យនេតយ៉ង់ ត្រូវក្មេងអន្ធពាលដែលគេសង្ស័យថាជាសិស្សបានប្រើដុំថ្មគប់បំបែកកញ្ចក់ផ្នែកខាងក្រោយខ្ទេច កាលពីវេលាម៉ោងជាង៩ព្រឹកថ្ងៃទី១៣ មិថុនា ខណៈដែលលោកចតទុកក្នុងបរិវេណនៃវិទ្យាល័យនេតយ៉ង់ ក្នុងសង្កាត់ព្រែកព្រះស្តេច ក្រុងបាត់ដំបង ។ រថយន្តនោះម៉ាកកាមរីឆ្លាម ពណ៌ស្លែ ពាក់ស្លាកលេខភ្នំពេញ 2A-6056 ជារបស់លោក សេង គន្ធ នាយកវិទ្យាល័យនេត
យ៉ង់ ។
សាក្សីដែលឃើញផ្ទាល់ភ្នែកបាននិយាយថា ពេលកើតហេតុគេឃើញយុវជនម្នាក់ក្នុងឯកសណ្ឋានមិនមែនជាសិស្សបានដើរចូលមកក្នុងបរិវេណវិទ្យាល័យ សំដៅរថយន្តលោកនាយក ដោយមានកាន់ដុំថ្មក្នុងដៃផងដែរ ។ ពេលដើរទៅក្បែររថយន្ត យុវជននោះបានលើកដុំថ្មគប់ពេញទំហឹងទៅលើកញ្ចក់រថយន្តផ្នែកខាងក្រោយ ហើយក៏បានរត់គេចចេញក្រៅវិញ ដែលមានបក្សពួកម្នាក់កំពុងបញ្ឆេះម៉ូតូចាំជាស្រេចនៅខាងក្រៅវិទ្យាល័យ រួចជិះគេចខ្លួនបាត់ទៅ ។ លោក សេង គន្ធ នាយកវិទ្យាល័យនេតយ៉ង់ និងជាម្ចាស់រថយន្តបានប្រាប់ពីរឿងរ៉ាវខ្លះៗមុនពេលកើតហេតុថា ក្រោយពីលោកបើករថយន្តទៅចតក្នុងបរិវេណវិទ្យាល័យរួច លោកក៏ដើរចូលកន្លែងធ្វើការ ។
ពេលនោះលោកបានឃើញយុវជន៥នាក់ស្លៀកពាក់មិនមែនជាសិស្សដើរចូលក្នុងសាលា ទៅបង្កជម្លោះជាមួយសិស្សក្នុងវិទ្យាល័យ លោកក៏បានរារាំង និងបណ្តេញយុវជនអន្ធពាលទាំងនោះឱ្យបំបែកហ្វូងចេញអស់ទៅ ។ រីឯរូបលោកក៏ចូលទៅកន្លែងធ្វើការនៅខាងក្រោយ ។ លុះនៅម៉ោង៩និង៣០នាទី មានសិស្សមកប្រាប់ថា រថយន្តរបស់លោកនាយកត្រូវគេគប់បែកកញ្ចក់ខ្ទេចអស់ហើយ ។ ឮដូច្នេះលោកក៏ចេញមកមើលឃើញបែកកញ្ចក់មែន និងរកឃើញដុំថ្មមួយដុំធំនៅក្នុងរថយន្តទៀតផង ទើបលោករាយការណ៍ប្រាប់សមត្ថកិច្ចតែម្តង ហើយលោកបានដាក់ពាក្យបណ្តឹងទៅកាន់សមត្ថកិច្ចឱ្យចាត់វិធានការហើយ ។
សិស្សនៃវិទ្យាល័យនេះនិយាយដែរថា ជនដៃដល់នោះគឺគ្មានអ្នកណាក្រៅពីបក្សពួកទាំង៥នាក់ដែលបានចូលមកបង្កជម្លោះក្នុងសាលាទេ ដែលត្រូវលោកនាយកបណ្តេញចេញនោះ ។ ពួកគេបញ្ជាក់ថា មុនពេលជនដៃដល់ចូលទៅគប់រថយន្តនោះ គេឃើញក្រុមនោះជិះម៉ូតូ២គ្រឿង ដោយ១គ្រឿងជិះគ្នា២នាក់ឈប់ខាងមុខវិទ្យាល័យ ។ រីឯ១គ្រឿងទៀតជិះហួសទៅចាំក្បែររង្វង់មូលលោកតាដំបងគ្រញូង ។ លុះជនដៃដល់គប់បំបែកកញ្ចក់រថយន្តរួចក៏ឡើងជិះម៉ូតូឌុបគ្នាគេចខ្លួនជាបន្តបន្ទាប់ភ្លាមៗដែរ ។
មន្ត្រីនគរបាលក្រុងដែលកំពុងចាត់ការលើករណីនេះបាននិយាយថា កំពុងហៅសិស្សវិទ្យាល័យនេតយ៉ង់មួយចំនួនដែលមានវិវាទជាមួយក្រុមយុវជនទាំង៥នាក់នោះទៅសាកសួរហើយ ដើម្បីឈានដល់ការវែកមុខជនដៃដល់ ព្រោះបើផ្អែកលើព្រឹត្តិការណ៍ដែលលោកនាយកវិទ្យាល័យបានអះអាង គឺជនមួយក្រុមនោះអាចជាប់ពាក់ព័ន្ធក្នុងសំណុំរឿងនេះ ។ សូមបញ្ជាក់ថា វិទ្យាល័យចំនួន៣ក្នុងក្រុងបាត់ដំបងត្រូវគេកត់សម្គាល់ថា កំពុងត្រូវក្រុមសិស្សអន្ធពាលទាំងប្រុស ទាំងស្រីអុកឡុកស្ទើររាល់ថ្ងៃ ក្នុងនោះមានវិទ្យាល័យនេតយ៉ង់ វិទ្យាល័យព្រះមុនីវង្ស និងវិទ្យាល័យសម្តេចឪ ។
ក្រុមបង្កជម្លោះតែងធ្វើសកម្មភាពលឿនបំផុត ដែលសមត្ថកិច្ចមិនអាចបង្ក្រាបពួកគេបានទាន់ពេល ។ លោកគ្រូ អ្នកគ្រូតែងត្អូញត្អែរអំពីការលំបាកក្នុងការអប់រំពួកគេ ដោយសារខ្លាចមានការគុំកួនសងសឹកពីក្រុមសិស្សអន្ធពាលទាំងនោះវិញ ។ ជាក់ស្តែង ដូចជាករណីរថយន្តលោកនាយកវិទ្យាល័យនេតយ៉ង់ខាងលើនេះជាដើម ។ ដូច្នេះមានតែពឹងលើសមត្ថកិច្ចប៉ុណ្ណោះ ដែលអាចជួយប្រដៅក្រុមសិស្សអន្ធពាលតាមបណ្តាវិទ្យាល័យទាំងនេះបាន ៕
ចែករំលែកព័តមាននេះ