ខេត្តសៀមរាប ៖ កិច្ចប្រជុំលើកទី៣ របស់ក្រុមបច្ចេកទេសប្រែប្រួលអាកាសធាតុនាថ្ងៃទី១២ ខែវិច្ឆិកា ឆ្នាំ២០១៨ នៅក្រុងសៀមរាប ដែលសហការរៀបចំដោយក្រសួងបរិស្ថាន និងគាំទ្រដោយកម្មវិធីសម្ព័ន្ធភាពប្រែប្រួលអាកាសធាតុកម្ពុជាក្រោមវត្តមានលោក ទិន…
ខេត្តសៀមរាប ៖ កិច្ចប្រជុំលើកទី៣ របស់ក្រុមបច្ចេកទេសប្រែប្រួលអាកាសធាតុនាថ្ងៃទី១២ ខែវិច្ឆិកា ឆ្នាំ២០១៨ នៅក្រុងសៀមរាប ដែលសហការរៀបចំដោយក្រសួងបរិស្ថាន និងគាំទ្រដោយកម្មវិធីសម្ព័ន្ធភាពប្រែប្រួលអាកាសធាតុកម្ពុជាក្រោមវត្តមានលោក ទិន ពន្លក អគ្គលេខាធិការក្រុមប្រឹក្សាជាតិអភិវឌ្ឍដោយចិរភាព ដោយមានការចូលរួមពីសំណាក់ប្រធានមន្ទីរជុំវិញខេត្តផងដែរ ។
លោក ទិន ពន្លក អគ្គលេខាធិការក្រុមប្រឹក្សាជាតិអភិវឌ្ឍដោយចិរភាពមានប្រសាសន៍ថា នៅក្នុងយុទ្ធសាស្ត្រចតុកោណដំណាក់កាលទី៤នៃរាជរដ្ឋាភិបាលកម្ពុជាអាណត្តិទី៦ បានកំណត់ថា បញ្ហាប្រែប្រួលអាកាសធាតុ គឺជាកត្តារាំងស្ទះដល់ជាអភិវឌ្ឍជាតិ ខណៈដែលយុទ្ធសាស្ត្រចតុកោណដំណាក់កាលទី៤នេះបានកំណត់បញ្ហាប្រែប្រួលអាកាសធាតុស្តីការអភិវឌ្ឍប្រកបដោយចិរភាព និងបរិយាប័ន្ន និងស្តីពីការធានាចិរភាពបរិស្ថាន ការរៀបចំខ្លួនឆ្លើយតប ការប្រែប្រួលអាកាសធាតុ នៅក្នុងមុំទី៤ ។
លោកមានប្រសាសន៍ទៀតថា ដើម្បីអនុវត្តន៍យុទ្ធសាស្ត្រនេះរាជរដ្ឋាភិបាលកម្ពុជាផ្តោតជាទិភាព ដើម្បីអនុវត្តបន្តផែនការយុទ្ធសាស្ត្រជាតិស្តីពីការអភិវឌ្ឍបៃតងសម្រាប់២០១៣ ដល់ឆ្នាំ២០៣០ ផែនការយុទ្ធសាស្ត្រឆ្លើយតបទៅនឹងការប្រែប្រួលអាកាសធាតុកម្ពុជាសម្រាប់ឆ្នាំ២០១៨ ដល់ឆ្នាំ២០២៣ យុទ្ធសាស្ត្រ និងផែនការសកម្មភាពបរិស្ថានជាតិសម្រាប់ឆ្នាំ២០១៦ ដល់ឆ្នាំ២០២៣ និងផែនការយុទ្ធសាស្ត្ររ៉េដបូកការប្រើប្រាស់មូលនិធិបរិស្ថានឲ្យមានប្រសិទ្ធភាព ដើម្បីធានាការអភិវឌ្ឍសេដ្ឋកិច្ចបំភាយកាបូនតិចធន់នឹងការប្រែប្រួលអាកាសធាតុ ។
លោក ទិន ពន្លក អគ្គលេខាធិការក្រុមប្រឹក្សាជាតិអភិវឌ្ឍដោយចិរភាព មានប្រសាសន៍យ៉ាងដូច្នេះនៅក្នុង ។ លោក ទិន ពន្លក បង្ហាញថា រាជរដ្ឋាភិបាលកម្ពុជាផ្តោតអាទិភាពឲ្យមានការអនុវត្តបន្តនូវយុទ្ធសាស្ត្រសំខាន់ៗចំនួន៤ ដែលទាក់ទងទៅនឹងការអភិវឌ្ឍបៃតងការប្រែប្រួលអាកាសធាតុ និងបរិស្ថាន ។ កិច្ចប្រជុំនេះត្រូវបានពិនិត្យ និងអនុម័តលើកំណត់ហេតុនៃកិច្ចប្រជុំលើកទី២ របស់ក្រុមការងារបច្ចេកទេសប្រែប្រួលអាកាសធាតុដែលបានធ្វើឡើងនៅខេត្តបាត់ដំបង កាលពីក្នុងអំឡុងខែមិថុនា ឆ្នាំ២០១៨ កន្លងទៅ និងត្រូវបានពិភាក្សាផងដែរស្តីអំពីការដោះស្រាយបញ្ហាប្រែប្រួលអាកាសធាតុក្នុងផែនការយុទ្ធសាស្ត្រអភិវឌ្ឍជាតិ និងពិនិត្យមើលបច្ចុប្បន្នភាព លើកិច្ចខិតខំប្រឹងប្រែង ដើម្បីបញ្ជ្រាបបញ្ហាប្រែប្រួលអាកាសធាតុទៅក្នុងផែនការយុទ្ធសាស្ត្រអភិវឌ្ឍជាតិ ២០១៩-២០២៣ ដោយរាប់បញ្ចូលទាំងការផ្តល់នូវគោលការណ៍បច្ចេកទេសជូនដល់ក្រសួងវិស័យ សម្រាប់រៀបចំធាតុចូលក្នុងផែនការយុទ្ធសាស្ត្រអភិវឌ្ឍជាតិ និងផែនការយុទ្ធសាស្ត្រអភិវឌ្ឍតាមវិស័យ ។
គួររំលឹកដែរថា នៅក្នុងកិច្ចប្រជុំលើកទី២របស់ក្រុមការងារបច្ចេកទេសប្រែប្រួលអាកាសធាតុ កាលពីអំឡុង ខែមិថុនា ឆ្នាំ២០១៨ នៅខេត្តបាត់ដំបងកន្លងមកនេះកិច្ចប្រជុំបានកំណត់អភិក្រមសម្រាប់ការរៀបចំរបាយការណ៍វឌ្ឍនភាពនៃការអនុវត្តផែនការសកម្មភាពការប្រែប្រួលអាកាសធាតុ ( CCAPs ) និងបច្ចុប្បន្នភាពនៃការធ្វើសុក្រឹតភាពសូចនាករ គោលដៅអភិវឌ្ឍដោយចិរភាពទី១៣ ៕
ចែករំលែកព័តមាននេះ