ខេត្តបាត់ដំបង ៖ ជនមិនស្គាល់មុខដែលមានបក្សពួកយ៉ាងតិច២នាក់ បានចូលលួចសម្ភារ ពេទ្យដែលមានតម្លៃរាប់ម៉ឺនដុល្លារ និងលុយជាង១០លានរៀលពីក្នុងគ្លីនិករ៉ាក់ ដែលជាគ្លីនិករបស់អង្គការមួយសម្រាប់ពិនិត្យសុខភាព និងរោគស្ត្រី មានទីតាំងនៅក្នុងភូមិព្រែកមហាទេព សង្កាត់ស្វាយប៉ោ…
ខេត្តបាត់ដំបង ៖ ជនមិនស្គាល់មុខដែលមានបក្សពួកយ៉ាងតិច២នាក់ បានចូលលួចសម្ភារ
ពេទ្យដែលមានតម្លៃរាប់ម៉ឺនដុល្លារ និងលុយជាង១០លានរៀលពីក្នុងគ្លីនិករ៉ាក់ ដែលជាគ្លីនិករបស់អង្គការមួយសម្រាប់ពិនិត្យសុខភាព និងរោគស្ត្រី មានទីតាំងនៅក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ។
គេសង្ស័យថា សកម្មភាពចោរកម្មនេះអាចកើតឡើងនៅចន្លោះពីម៉ោង១២អធ្រាត្រដល់ម៉ោង៥ព្រឹកថ្ងៃទី១២ ខែវិច្ឆិកា បន្ទាប់ពីសន្តិសុខដេកលក់ ។ នេះបើតាមការសន្និដ្ឋានជាបឋម របស់សមត្ថកិច្ចដែលបានចុះត្រួតពិនិត្យ ។
សមត្ថកិច្ចនិយាយថា ហេតុការណ៍នេះបានធ្វើឲ្យមានការភ្ញាក់ផ្អើលនៅព្រឹកថ្ងៃទី១២ ខែ
វិច្ឆិកា ពេលបុគ្គលិកពេទ្យចូលដល់កន្លែងធ្វើការ ហើយឃើញបាត់បង់ឧបករណ៍ឬសម្ភារពេទ្យសំ
ខាន់ៗពីក្នុងបន្ទប់ ។ សមត្ថកិច្ចបានឲ្យដឹងទៀតថា មានបន្ទប់ចំនួន៣នៃអគារពេទ្យនេះ ត្រូវចោរចូលលួចសម្ភារពេទ្យនិងលួចលុយ គឺបន្ទប់ពិសោធន៍ចំនួន២ និងបន្ទប់ដាក់ទូដែក១ ដែលជាបន្ទប់ប្រធានគ្លីនិកនេះធ្វើការ ។
សមត្ថកិច្ចបញ្ជាក់ថា នៅតាមបន្ទប់នីមួយៗគេមិនឃើញមានស្នាមគាស់ទម្លុះទេ រីឯសោទ្វារឬបង្អួចក៏គ្មានស្នាមកាត់ឬគាស់ដែរ ។ គេសង្ស័យថា ជនដៃដល់អាចប្រើកូនសោចាក់បើកទ្វារតាមសម្រួលតែម្ដង ព្រោះគ្មានស្លាកស្នាមបន្សល់ទុកឲ្យមន្ត្រីជំនាញធ្វើកោសល្យវិច័យឡើយ ។
ជាមួយគ្នានេះ បុគ្គលិកពេទ្យមួយចំនួនដែលធ្វើការនៅក្នុងគ្លីនិករ៉ាក់នេះនិយាយថា ជាធម្ម
តានៅក្នុងគ្លីនិកមានសន្តិសុខម្នាក់ឈ្មោះ ស៊ន ភឿន ជាអ្នកយាមជាប្រចាំពេលយប់ តែគេមិន
ដឹងថា នៅយប់កើតហេតុនោះ សន្តិសុខរូបនេះដេកលក់ឬយ៉ាងណាទេ បានជាចោរចូលលួចសម្ភារក្នុងអគារមិនដឹងបែបនេះ?
បុគ្គលិកពេទ្យដដែលបានលើកឡើងថា បើពិនិត្យលើឧបករណ៍ឬសម្ភារពេទ្យ និងទូដែកដាក់លុយដ៏ធ្ងន់ផង ពួកចោរហាក់មិនងាយស្រួលក្នុងការលើកជញ្ជូនចេញពីក្នុងបន្ទប់ឡើយ ហើយក៏ត្រូវចំណាយកម្លាំងច្រើននាក់ និងចំណាយពេលយូរដែរទើបជញ្ជូនចេញអស់ ។ចុះហេតុអ្វីបានជាសន្តិសុខដេកមិនកម្រើកបន្តិចសោះអុីចឹង? ម្យ៉ាងទៀត តាមបន្ទប់នីមួយៗគេមិនឃើញមានស្នាមគាស់ទម្លុះទេ គឺសុទ្ធតែប្រើកូនសោចាក់បើកទ្វារចូលលួចតាមសម្រូលទៀត តើពួកចោរមកពីណាបានជាចូលស្រួលម្ល៉េះ ?
មន្ត្រីពេទ្យម្នាក់បានលើកឡើងបែបងឿងឆ្ងល់ដែរថា ក្រុមចោរហាក់ស្គាល់យ៉ាងច្បាស់ពីទី
កន្លែងផ្ទុកសម្ភារពេទ្យដែលមានតម្លៃថ្លៃ និងបន្ទប់ដាក់ទូដែកនៅជាន់ខាងលើ ។ អ្វីដែលគួរឲ្យចាប់អារម្មណ៍ខ្លាំងនោះ គឺនៅក្នុងបន្ទប់លេខ៩មានទូដែកចំនួន៣ តែលោកចោរលើកយកតែ១ទេ គឺលើកចំទូដែកធំដែលមានដាក់លុយ ។ តើក្រុមចោរនេះមកពីខាងណា បានជាស្គាល់ទីតាំងច្បាស់ម្ល៉េះ? ឬអាចជាដង្កូវចេញពីសាច់? ក្រុមចោរជញ្ជូនសម្ភារពេទ្យចេញតាមចិត្ត បែរជាមិនរំខានដល់ដំណេកសន្តិសុខ?
ជុំវិញការបាត់បង់នេះ អ្នកគ្រួពេទ្យម្នាក់ទំនងជាអ្នកទទួលខុសត្រូវនៅគ្លីនិក«រ៉ាក់»នោះ បាននិយាយប្រាប់សមត្ថកិច្ចថា មានបន្ទប់ចំនួន៣ដែលត្រូវចោរចូលលួចសម្ភារនិងលួចយកទូដែកដាក់លុយ ។
អ្នកគ្រួពេទ្យរូបនោះបានបង្ហាញរបាយការណ៍បឋមមួយ ដែលនិយាយពីសម្ភារបាត់បង់ក្នុងនោះមាន បន្ទប់លេខ១ បានបាត់ម៉ាស៊ីនអេកូសាស្ត្រ១គ្រឿង និងបាត់ទុយោសុង4Dចំនួន១ ។ បន្ទប់លេខ៩ បាត់ក្បាលកាមេរ៉ាសុវត្ថិភាព១ ហាតឌីស្ត(អង្គចងចាំ)ចំនួន១ និងទូដែក១ ដែលមានផ្ទុកលុយជាង១០លានរៀល និង៤៧៤ដុល្លារ ។ ដោយឡែក បន្ទប់លេខ១៤ បានបាត់ម៉ាស៊ីនCBCចំនួន១គ្រឿង និងម៉ាស៊ីន Biochimycolចំនួន១គ្រឿង ។
ទោះជាយ៉ាងណា អ្នកគ្រូពេទ្យរូបនេះ មិនបានប្រាប់អំពីតម្លៃជាក់លាក់នៃសម្ភារពេទ្យដែល
ត្រូវចោរលួចទាំងនោះទេ ។ ប៉ុន្តែជាចុងក្រោយអ្នកគ្រូពេទ្យរូបនេះ បែរជាចង់បិទបាំងនិងព្យា
យាមរារាំងមិនឲ្យផ្សព្វផ្យាយអំពីហេតុការណ៍នេះដោយសំអាងលើសិទ្ធិរបស់គាត់ ពេលឃើញអ្នកសារព័ត៌មានចុះទៅសួរនាំព្រោងព្រាត ។ គាត់បានព្រមានថា «បើអ្នកសារព័ត៌មានផ្សាយខុសត្រូវទទួលខុសត្រូវខ្លួនឯង» ។
ជុំវិញសម្ភារពេទ្យដែលត្រូវចោរលួចខាងលើនេះដែរ បើតាមគ្រូពេទ្យជំនាញប្រចាំនៅគ្លីនិកឯកជនមួយបានបង្ហើបថា ឧបករណ៍ឬសម្ភារពេទ្យដែលត្រូវចោរលួចខាងលើនេះ សុទ្ធតែមានតម្លៃខ្ពស់ៗបំផុត ជាពិសេសម៉ាស៊ីនអេកូសាស្ត្រតែម្ដង ដែលមានតម្លៃរាប់ម៉ឺនដុល្លារឯណោះ ។
ក្រោយកើតហេតុ មន្ត្រីនគរបាលជំនាញ និងនគរបាលការិយាល័យបច្ចេកទេវិទ្យាសាស្ត្រខេត្ត
បានទៅធ្វើការត្រួតពិនិត្យនិងសួរនាំអំពីរឿងរ៉ាវនេះ ។ ប៉ុន្តែមន្ត្រីបច្ចេកទេសហាក់មានការអល់អែកក្នុងការធ្វើកោសល្យវិច័យ ដោយសារតែទីតាំងកើតហេតុគ្មានបន្សល់ទុកនូវស្លាកស្នាម អ្វីទាំងអស់ ។
មន្ត្រីមួយរូបនិយាយថា គ្មានការគាស់ទម្លុះទេ រីឯទីកន្លែងដទៃទៀតក៏មិនមានបន្សល់ទុកស្លាក
ស្នាមអ្វីដែរ ព្រោះមុនពេលកម្លាំងជំនាញចុះទៅដល់ គេពិនិត្យឃើញនៅក្នុងបរិវេណនៃគ្លីនិកឬនៅតាមបន្ទប់នីមួយៗដែលមានបញ្ហា ត្រូវបានលុកលុយខ្ទេចខ្ទីដោយបុគ្គលិកពេទ្យនិងអ្នកទៅពិនិត្យជំងឺឡើងវ៉ល់អស់ទៅហើយ ។ ដូច្នេះ មន្ត្រីជំនាញជួបការលំបាកបន្តិចក្នុងការធ្វើកោសល្យវិច័យ ។
លោកឧត្តមសេនីយ៍ត្រី ជេត វណ្ណនី ស្នងការរងនគរបាលខេត្ត បានមានប្រសាសន៍ថា នៅក្នុងករណីនេះ ជនប្រព្រឹត្តអាចមានបក្សពួកលើសពី២នាក់ ។ បើតាមការស្រង់សម្តីសន្តិសុខនោះ
បានប្រាប់ថា ខ្លួនបានចូលដេកនៅវេលាម៉ោង១០ទៅម៉ោង១១នាយប់នោះ ដូច្នេះក្រុមចោរ
អាចចូលធ្វើសកម្មភាពក្រោយពេលសន្តិសុខរូបនេះដេកលក់ ។
លោកស្នងការរងថ្លែងថា លោកមិនទាន់អាចសន្និដ្ឋានបែបណានៅឡើយទេ ជុំវិញអំពើលួចដ៏ធ្ងន់ធ្ងរនេះ ។ ប៉ុន្តែលោកស្នងការ បានបញ្ជាឲ្យមន្ត្រីជំនាញហៅសន្តិសុខម្នាក់នោះទៅសាកសួរនៅស្នងការដ្ឋានខេត្តហើយ ។
លោកស្នងការរង ជេត វណ្ណនី បានបង្ហើបបន្តិចដែរថា បើតាមតម្រុយមួយចំនួនដែលមន្ត្រីជំនាញទទួលបាន ក្រៅពីហៅសន្តិសុខម្នាក់នោះទៅសាកសួរ នៅមានបុគ្គលិកពេទ្យខ្លះក៏ត្រូវហៅទៅសួរនាំដែរ ដើម្បីស្រាវជ្រាវរកអ្នកពាក់ព័ន្ធក្នុងករណីនេះ ព្រោះមានតម្រុយគួរឲ្យសង្ស័យខ្លះៗដែរ ៕
ចែករំលែកព័តមាននេះ