ខេត្តកំពង់ឆ្នាំង ៖ មិនដឹងថានោះជាអំពើសងសឹក ឬជាកម្មពៀរវេរានោះទេ នៅពេលបុរសជាប្តីចំណាស់អាយុ៧០ឆ្នាំត្រូវបានចាប់ខ្លួនដាក់ពន្ធនាគារពីបទចាប់ក្មេងស្រីអាយុ១៤ឆ្នាំរំលោភ ។ ស្រាប់តែនៅយប់ថ្ងៃដដែលនោះ ប្រពន្ធរបស់គាត់ដែលមានអាយុ២៧ឆ្នាំ និងមានផ្ទៃពោះ៧ខែទៅហើយ ត្រូវបានក្មេងពាល២នាក់ ក្នុងចំណោមក្រុមក្មេងពាល៥នាក់ បានចាប់អូសចេញពីខ្ទមចាំចម្ការយកទៅរំលោភយ៉ាងព្រៃផ្សៃ បណ្តាលឱ្យមានរបួសស្នាម និងធ្វើឱ្យប៉ះពាល់ដល់ទារកក្នុងផ្ទៃ មិនទាន់ដឹងថា មានវាសនាបែបណានៅឡើយទេ ។
ហេតុការណ៍នេះបានកើតឡើងកាលពីវេលាម៉ោងប្រមាណ៩យប់ ថ្ងៃទី៨ មិថុនា នៅខ្ទមចាំចម្ការរបស់ស្ត្រីរងគ្រោះ ស្ថិតក្នុងភូមិបឹងកក់ ឃុំលង្វែក ស្រុកកំពង់ត្រឡាច ។ ក្រោយពេលកើតហេតុ ដោយសារតែស្ត្រីរងគ្រោះជាមនុស្សមានសតិមិនល្អ និងនៅតែម្នាក់ឯង រួមជាមួយកូនដើមរបស់ប្តី២នាក់តូចៗ នាងមិនបានទៅប្តឹងនរណាទេ ប៉ុន្តែពេលបានជួបស្ត្រីម្នាក់ជាកូនប្រពន្ធដើមរបស់តាជាប្តី ទើបបាននាំមកប្តឹងនៅមន្ទីរកិច្ចការនារីខេត្ត នាព្រឹកថ្ងៃទី១០ មិថុនា ដើម្បីសុំឱ្យជួយរកយុត្តិធម៌ ។
លោកស្រី ប៉ាល់ យឿន ប្រធានកិច្ចការនារីខេត្ត ក្រោយពីបានដឹងនូវរឿងហេតុខាងលើនេះ លោកស្រីក៏បានចាត់មន្ត្រីកិច្ចការនារីខេត្ត ជូនជនរងគ្រោះទៅដាក់ពាក្យបណ្តឹងនៅស្នងការដ្ឋាននគរបាលខេត្ត និងដោយក្តីអាណិតអាសូរ ពេលត្រឡប់មកពីប្តឹងវិញ ក៏បានរៀបចំកន្លែងឱ្យស្ត្រីរងគ្រោះស្នាក់នៅ និងជួយឧបត្ថម្ភជីវភាពប្រចាំថ្ងៃជាបណ្តោះអាសន្នរហូតនាងសម្រាលកូនតូចរួច ។ ប្រការដែលលោកស្រី ប៉ាល់ យឿន ទទួលឱ្យស្នាក់នៅជាបណ្តោះអាសន្ន ព្រោះតែមានការបារម្ភថា បើឱ្យនាងត្រឡប់ទៅលំនៅឋានវិញ ក្រែងក្មេងពាលទាំងនោះគុំកួនធ្វើបាបនាងបន្ថែមទៀត ។
នៅចំពោះមុខមន្ត្រីកិច្ចការនារីខេត្ត និងការសាកសួររបស់មន្ត្រីប៉ូលិសព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ត ស្ត្រីរងគ្រោះបានឱ្យដឹងថា នៅព្រឹកថ្ងៃទី៨ មិថុនា ពេលដែលប៉ូលិសចាប់ប្តីយកទៅបាត់ យប់នោះនាងដេកជាមួយកូនតូច២នាក់របស់ប្រពន្ធដើម ស្រាប់តែម៉ោងប្រមាណ៩យប់ មានក្មេងមួយក្រុមមានគ្នា៥នាក់ ក្នុងនោះ៣នាក់បាននាំគ្នាទៅលួចចាប់មាន់របស់គាត់ ។ ចំណែក២នាក់ទៀតបានចូលចាប់នាងអូសចេញពីខ្ទមយកទៅក្បែរដំបូកមួយស្ថិតនៅខាងក្រោយខ្ទម រួចហើយចាប់នាងរំលោភបានសម្រេចម្តងម្នាក់ ។
នាងបញ្ជាក់ថា មុនពេលរំលោភ ពួកវាទាំង២នាក់បានវាយធ្វើបាប ខ្លះជិះលើផ្ទៃពោះ ខ្លះវាយនាងនឹងដៃ ។ នាងបានបង្ហាញស្នាមរបួសដែលពួកក្មេងពាលអូសកាត់ព្រៃដាច់រលាត់ខ្នង និងជាំមុខ ។ នាងបន្តថា ក្នុងពេលកើតហេតុនោះកូនៗទាំង២នាក់បានឃើញ និងភ័យខ្លាចរត់ទៅពួនក្នុងប្រឡាយក្បែរនោះ ។ មន្ត្រីប៉ូលិសខេត្តបាននិយាយថា សំណុំរឿងនេះត្រូវធ្វើការស្រាវជ្រាវស៊ើបអង្កេតជាបន្ទាន់ ព្រោះជាបទល្មើសឧក្រិដ្ឋ មិនអាចឱ្យជនល្មើសគេចខ្លួនបានឡើយ ។
ស្ត្រីឈ្មោះ ស ស៊ីប្រាង អាយុ៣៨ឆ្នាំ មានទីលំនៅភូមិចំការស្វាយ ឃុំសេដ្ឋី ស្រុកសាមគ្គីមានជ័យ ដែលត្រូវជាកូនរបស់ប្រពន្ធដើម និងជាអ្នកនាំស្ត្រីរងគ្រោះមកប្តឹងបាននិយាយថា កូនតូចៗទាំងពីរនាក់ដែលកំពុងរស់នៅជាមួយស្ត្រីរងគ្រោះ គឺគាត់បានយកមកចិញ្ចឹម ព្រោះស្ត្រីរងគ្រោះត្រូវបានមន្ទីរកិច្ចការនារីខេត្តអនុញ្ញាតឱ្យស្នាក់នៅក្នុងមន្ទីរជាបណ្តោះអាសន្នសិន ៕
ចែករំលែកព័តមាននេះ