យោងតាមប្រសាសន៍របស់លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិបានបញ្ជាក់ថា កម្ពុជា-ថៃ បានឯកភាពគ្នាបង្កើតតំបន់សេដ្ឋកិច្ចពិសេសនៅខេត្តកោះកុង និងខេត្តបន្ទាយមានជ័យ ។
យោងតាមប្រសាសន៍របស់លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិបានបញ្ជាក់ថា កម្ពុជា-ថៃ បានឯកភាពគ្នាបង្កើតតំបន់សេដ្ឋកិច្ចពិសេសនៅខេត្តកោះកុង និងខេត្តបន្ទាយមានជ័យ ។ ការលើកឡើងរបស់លោកឧបនាយករដ្ឋមន្ត្រី គឺធ្វើឡើងក្នុងសន្និសីទសារព័ត៌មាន កាលពីព្រឹកថ្ងៃទី១១ មិថុនា ២០១៣ ក្រោយបញ្ចប់កិច្ចប្រជុំគណៈកម្មការចម្រុះការអភិវឌ្ឍតំបន់ព្រំដែនកម្ពុជា-ថៃ ដែលបានរៀបចំនៅទីស្តីការក្រសួងការបរទេស ។
លោកឧបនាយករដ្ឋមន្ត្រី ហោ ណាំហុង មានប្រសាសន៍ថា ការបង្កើតតំបន់សេដ្ឋកិច្ចនោះ គឺដើម្បីពង្រីក និងពង្រឹងនូវទំនាក់ទំនងសេដ្ឋកិច្ចតាមតំបន់ព្រំដែននៃប្រទេសទាំង២។ ទន្ទឹមនោះប្រទេសថៃក៏បានសន្យាទទួលទិញកសិផលរបស់កសិករខ្មែរ ដែលរួមមានពោត ដំឡូងឈើតាមតម្លៃទីផ្សារដោយគ្មានការរិតដ្បិតនោះឡើយ ។ ទាក់ទងនឹងបញ្ហាតភ្ជាប់រវាងតំបន់ព្រំដែនកម្ពុជា-ថៃ លោកឧបនាយករដ្ឋមន្ត្រីបានបញ្ជាក់ថា ភាគីទាំងពីរបានឯកភាពគ្នាជំរុញការសិក្សាដើម្បីស្ថាបនាតំបន់ស្ទឹងបត់ដែលជាច្រកថ្មីឱ្យក្លាយជាច្រកដឹកទំនិញឆ្លងកាត់រវាងកម្ពុជា និងថៃ ព្រោះការបើកច្រកថ្មីនេះមានសារសំខាន់ និងចាំបាច់ណាស់ ខណៈដែលទំហំពាណិជ្ជកម្មប្រទេសទាំង២កាន់តែមានកំណើនខ្ពស់ពីមួយថ្ងៃទៅមួយថ្ងៃ ។
ចំណែកច្រកប៉ោយប៉ែតនឹងរក្សាទុកគ្រាន់តែជាច្រកទេសចរណ៍ ព្រោះវិស័យទេសចរណ៍កាន់តែមានកំណើនគួរឱ្យកត់សម្គាល់ផងដែរ ។ ទន្ទឹមនោះប្រទេសថៃ ក៏បានត្រៀមជួយកសាងផ្លូវលេខ៤៨ពីកោះកុងមកផ្លូវជាតិលេខ៤ និងត្រៀមខ្លួនរួមចំណែកក្នុងការពង្រីកផ្លូវជាតិលេខ៥ និងលេខ៦ដើម្បីសម្រួលការតភ្ជាប់គមនាគមន៍ និងដឹកជញ្ជូន ៕
ចែករំលែកព័តមាននេះ