ខេត្តពោធិ៍សាត់ ៖ ភិក្ខុមួយអង្គនាម ប៊ូ ច័ន្ទមុនី គង់នៅវត្តបន្ទាយដី សង្កាត់បន្ទាយដី ក្រុងពោធិ៍សាត់ ដែលត្រូវព្រះចៅអធិការ គ្រូសូត្រស្តាំ គ្រូសូត្រឆ្វេង និងព្រះសង្ឃក្នុងវត្តមូលមតិជាឯកច្ឆន្ទបណ្តេញចេញដោយសារតែភិក្ខុមួយអង្គនេះនិមន្តទៅណាមកណាគ្មានច្បាប់អនុញ្ញាតត្រឹមត្រូវ ។
ខេត្តពោធិ៍សាត់ ៖ ភិក្ខុមួយអង្គនាម ប៊ូ ច័ន្ទមុនី គង់នៅវត្តបន្ទាយដី សង្កាត់បន្ទាយដី ក្រុងពោធិ៍សាត់ ដែលត្រូវព្រះចៅអធិការ គ្រូសូត្រស្តាំ គ្រូសូត្រឆ្វេង និងព្រះសង្ឃក្នុងវត្តមូលមតិជាឯកច្ឆន្ទបណ្តេញចេញដោយសារតែភិក្ខុមួយអង្គនេះនិមន្តទៅណាមកណាគ្មានច្បាប់អនុញ្ញាតត្រឹមត្រូវ ។ ជាពិសេសបានចោទប្រកាន់ថា មិនស្តាប់ព្រះមេគណខេត្ត ព្រះចៅអធិការវត្តនិងធ្វើអ្វីៗប្រាស់ចាកពីវិន័យសង្ឃរួមទាំងមានប្រវត្តិមិនល្អច្រើនទៀតដែលមិនអាចទទួលយកបាន ។
នេះជាការចោទប្រកាន់ទៅលើព្រះសង្ឃខាងលើដែលជាហេតុនាំទៅដល់ការសម្រេចបណ្តាញចេញពីវត្ត។ ប៉ុន្តែអ្វីដែលគួរឱ្យកត់សម្គាល់នោះ គឺនៅថ្ងៃទី៩ មិថុនា ព្រះសង្ឃក្នុងវត្តបាននាំគ្នារើអីវ៉ាន់របស់ភិក្ខុអង្គនោះចេញពីក្នុងកុដិមកដាក់នៅខាងក្រៅ រួចចាប់អូសដោយបង្ខំឱ្យនិមន្តចេញ និងបិទទ្វារកុដិតែម្តង ។ ភិក្ខុ ប៊ូ ច័ន្ទមុនី មានថេរដីកាថា ការធ្វើបែបនេះ គឺសាហាវដូចពួកបុ៉ល ពត អ៊ីចឹង គ្មានមន្ត្រីធម្មការ អាជ្ញាធរ ឬសមត្ថកិច្ចណាដឹងឮ ឬមកចូលរួមទេ គឺផ្តាច់ការតែម្តង ហើយសកម្មភាពនេះបានធ្វើតាមបញ្ជារបស់ភិក្ខុសាំង សាន់ គ្រូសូត្រស្តាំដែលមានព្រះមេគណខេត្ត អ៊ុក ជុំ នៅពី
ក្រោយ ។
សង្ឃអង្គនេះប្រាប់កោះសន្តិភាពថា ទោះបីរើសម្ភារបិទទ្វារចាក់សោកុដិមិនឱ្យគង់នៅក៏អាត្មាមិនទៅណាដែរ ព្រោះអាត្មាគ្មានកំហុសចាកធម៌វិន័យទេ លុះត្រាតែមានលិខិតស្នាមពីថ្នាក់លើទើបព្រមនិមន្តចេញ ។ សម្ភារទាំងអស់ដែលត្រូវបានរើមកដាក់កណ្តាលវាលពីមុខកុដិនេះ អាត្មារក្សាទុកកន្លែងនោះដដែលមិនយកទៅណាទេ ទុកបង្ហាញញាតិញោម និងថ្នាក់លើ ហើយបើមានការបាត់បង់ ឬភ្លៀងទទឹកខូចខាតអាត្មានឹងប្តឹងឱ្យសងទៅតាម
ច្បាប់។ ភិក្ខុ ប៊ូ ច័ន្ទមុនី បន្តទៀតថា ការបណ្តេញអាត្មាចេញនេះ គ្មានរឿងអ្វីក្រៅពីការច្រណែននិន្ទាពីរឿងលាភសក្ការនោះទេ ។
ដោយឡែក ភិក្ខុសាំង សាន់ គ្រូសូត្រស្តាំមានថេរដីកាថា ការធ្វើបែបនេះគឺតាមបញ្ជារបស់ព្រះពោធិវង្សាវិមល អ៊ុក ជុំ ព្រះមេគណខេត្ត និងជាចៅអធិការវត្តបន្ទាយដី ព្រោះភិក្ខុ ប៊ូ ច័ន្ទមុនី នេះមានអាកប្បកិរិយាមិនសមរម្យជាភិក្ខុសង្ឃភាវៈក្នុងព្រះពុទ្ធសាសនា ដូចជា ការនិមន្តទៅណាមកណាគ្មានច្បាប់ទម្លាប់ ធ្វើអ្វីស្រេចតែអំពើចិត្ត ការនិយាយស្តីព្រហើនកោងកាច គ្មានស្គាល់ចាស់ទុំ ពិសេសមានចាក់សាក់ និងដាំត្បូង ៤ទៅ៥គ្រាប់ ជាប់នឹងធ្មេញទៀតផង ។
ដោយមានអាកប្បកិរិយាបែបនេះនិងបានដឹងប្រវត្តិមិនល្អពីមុនមកផង ព្រះមេគណខេត្ត ព្រះចៅអធិការ និងមន្ត្រីធម្មការបានប្រជុំសម្រេចបណ្តេញភិក្ខុ ប៊ូ ច័ន្ទមុនី ចេញតាំងពីថ្ងៃទី៣ ធ្នូ ២០១២ មកម៉្លេះ តែភិក្ខុអង្គនេះរឹងរូសមិនព្រមចេញ ។ លុះមកដល់រសៀលថ្ងៃទី៩ មិថុនា ទើបសង្ឃក្នុងវត្តសម្រេចនាំគ្នារើអីវ៉ាន់ភិក្ខុអង្គនេះចេញចាក់សោកុដិមិនឱ្យចូលគង់នៅទៀតទេ ។ ព្រះពោធិវង្សាវិមល អ៊ុក ជុំ ព្រះមេគណខេត្ត និងជាព្រះចៅអធិការវត្តបន្ទាយដី មានថេរដីកាថា ភិក្ខុ ប៊ូ ច័ន្ទមុនី នេះត្រូវបានអប់រំណែនាំជាច្រើនលើកច្រើនសាមកហើយតែមិនស្តាប់ ហើយក្នុងនាមអាត្មាជាមេគណខេត្ត មានសិទ្ធិសម្រេចដេញមិនចាំបាច់ថ្នាក់លើឯកភាពទេ ដើម្បីកុំឱ្យជះឥទ្ធិពលអាក្រក់ដល់វត្ត និងវិស័យព្រះពុទ្ធសាសនា ។
ប្រជាពលរដ្ឋដែលជាពុទ្ធសាសនូបត្ថម្ភបានចាប់អារម្មណ៍ថា ក្នុងនាមជាពុទ្ធបរិស័ទមិនចង់ឃើញរឿងរ៉ាវអវិជ្ជមានណាមួយកើតមានក្នុងទីអារាមជាកន្លែងសក្ការបូជានោះទេ ។ ប៉ុន្តែជាការពិត គឺមិនអាចចៀសផុតពីការផ្ទុះអធិករណ៍នោះទេ ដោយសារតែភិក្ខុសង្ឃក៏ជាមនុស្សបុថុជ្ជនដែរ តែងតែជាប់ជំពាក់ទៅដោយធម៌រាគៈ ទោសៈ និងមោហៈក្នុងខ្លួន ខ្លះមិនខាន ។ មិនអាចស្វែងរកការពន្យល់បានទេថា តើភិក្ខុសង្ឃដែលត្រូវបណ្តេញចេញពីវត្តនេះនឹងទៅគង់ទីណាវិញ ។ លោកអាចារ្យមួយរូប បាននិយាយថា ការបណ្តេញចេញពីវត្តរបស់ភិក្ខុសង្ឃអង្គនេះ មិនទាន់ឈានដល់ការបរាជិកនោះទេ គឺលោកអាចទៅគង់នៅវត្តណាមួយផ្សេងទៀតបាន ហើយបើសិនជាលោកបរាជិកមែននោះ គឺត្រូវតែផ្សឹកឱ្យទៅជាគ្រហស្ថតែម្តង ៕
ចែករំលែកព័តមាននេះ