រាជធានីភ្នំពេញ ៖ បន្ទាប់ពីមានករណីឆបោកក្នុងរូបភាពជាច្រើនទាក់ទងនឹងការទទួលបានរង្វាន់ផោវ័រ ប៊ែង (Power Bank) ប្រជាពលរដ្ឋដែលបានរងគ្រោះពីអំពើនេះបានអំពាវនាវឲ្យប្រជាជនដទៃទៀតបង្កើនការប្រុងប្រយ័ត្ន ។
លោក គីម ហុក ជាបុគ្កលិកបម្រើការងារនៅក្រុមហ៊ុនមួយក្នុងក្រុងភ្នំពេញ បានឲ្យដឹងនៅព្រឹកថ្ងៃទី៧ វិច្ឆិកា ថា កន្លងមកធ្លាប់មានក្រុមហ៊ុនបានទូរស័ព្ទមកលោក ដោយប្រាប់ថាត្រូវរង្វាន់ផោវ័រ ប៊ែង ប៉ុន្តែលោកបានបដិសេធមិនទទួល ដោយយល់ថា វាមិនចាំបាច់ ។ ម្យ៉ាងទៀត គ្មានក្រុមហ៊ុនណាឲ្យផលិតផល ដោយមិនគិតថ្លៃនោះទេ ហើយនៅសុខៗ ក៏គ្មានសំណាងឯណាមកត្រូវរង្វាន់ ដោយមិនមានសកម្មភាពអ្វីនោះដែរ ។
លោកបន្តថា ៖« ខ្ញុំមិនដឹងក្រុមហ៊ុនមកពីណាខ្លះទេ បានទូរស័ព្ទមកជាច្រើនដងថា ខ្ញុំមានសំណាងត្រូវរង្វាន់ ឲ្យទៅយកPower Bank តែខ្ញុំតែងតែបដិសេធ និងប្រាប់ថា រវល់ »។
ដោយឡែក លោក នុត សាវី បច្ចុប្បន្នរស់នៅរាជធានីភ្នំពេញ បានលើកឡើងស្រដៀងគ្នាថា ទាក់ទងបញ្ហានេះ ក្រុមហ៊ុនក៏ធ្លាប់ទូរស័ព្ទមកលោកចំនួនពីរលើកដែរថា ត្រូវរង្វាន់ខាងលើ ដោយប្រាប់ឲ្យទៅយកនៅក្រុមហ៊ុន ស្ថិតនៅតំបន់ក្រុងតាខ្មៅ ខេត្តកណ្តាល ។លោកបន្តថា ៖« ប៉ារបស់ខ្ញុំបានចាញ់បោក ក្រុមហ៊ុននេះដែរ គឺមានស្នាក់ការនៅក្រុងតាខ្មៅ និងបានចំណាយអស់ជាង១០០ដុល្លារ ដោយសារពួកគេបង្ខំឲ្យគាត់ទិញផលិតផល »។ កាលពីថ្ងៃទី៦ វិច្ឆិកា បន្ទាប់ពីមានការប្តឹងពីប្រជាពលរដ្ឋទាក់ទងនឹងការឆបោកនេះ សមត្ថកិច្ចខេត្តកំពង់ធំ សហការជាមួយព្រះរាជអាជ្ញាខេត្ត បានចុះបង្ក្រាបក្រុមហ៊ុន DUVERA KITCHEN Cambodia ដែលជាក្រុមហ៊ុនបានបោកប្រាស់ប្រជាពលរដ្ឋ ឲ្យទៅយកផោវើ ប៊ែង តាមរយៈការប្រាប់ប្រជាពលរដ្ឋថា ពួកគេទទួលបានរង្វាន់នេះ ប៉ុន្តែពេលប្រជាពលរដ្ឋទៅដល់ ពួកគេបានបង្ខំឲ្យប្រជាពលរដ្ឋទិញសម្ភារដែលមានតម្លៃដល់រាប់ពាន់ដុល្លារអាមេរិក ។
អ្នកនាំពាក្យក្រសួងពាណិជ្ជកម្ម លោក ឡុង កែមវិចិត្រ បានមានប្រសាសន៍ថា ក្រុមហ៊ុន DUVERA KITCHEN (CAMBODIA) CO., LTD ដែលត្រូវបានសម្ថកិច្ចបង្ក្រាបនៅខេត្តកំពង់ធំនោះ គឺបានចុះបញ្ជីនៅក្រសួងពាណិជ្ជកម្ម តែក្រសួងបានចុះបញ្ជីបង្កើតក្រុមហ៊ុន ហើយអនុញ្ញាតឲ្យធ្វើសកម្មភាពអាជីវកម្មដែលតាមច្បាប់អនុញ្ញាត ។ ប៉ុន្តែសកម្មភាពខាងលើនេះ គឺជាសកម្មភាពឆបោក ដែលមិនមានពាក់ព័ន្ធនឹងសកម្មភាពអាជីវកម្មដែលចុះបញ្ជី នៅក្រសួងពាណិជ្ជកម្មនោះទេ ។
លោកបន្តថា ៖« សកម្មភាពខាងលើគឺជាល្បិចឆបោករបស់បុគ្គលដែលគ្រប់គ្រងក្រុមហ៊ុននោះ ។ ចំណែកក្រុមហ៊ុន គឺជានីតិបុគ្គល ដូច្នេះវិធានការលើនីតិបុគ្គល ត្រូវមានចំណាត់ការពីតុលាការ ។ បើករណីនេះត្រូវបានរកឃើញថាជាករណីឆបោកពីតុលាការ ក្រសួងពាណិជ្ជកម្ម អាចដកអាជ្ញាប័ណ្ណគ្រប់គ្រងក្រុមហ៊ុននោះចេញពីបញ្ជី »៕
ចែករំលែកព័តមាននេះ