ខេត្តស្វាយរៀង ៖ ប្រជាពលរដ្ឋភូមិថ្នល់កែង សង្កាត់បាទី ក្រុងបាវិត មានការព្រួយបារម្មណ៍ និងខឹងសម្បារក្រុមហ៊ុនជីកដីយកអាចម៍ដី ជីករណ្តៅ នៅជិតទួលបុរាណ ធ្វើឲ្យបាក់ដីទួលបុរាណ…
ខេត្តស្វាយរៀង ៖ ប្រជាពលរដ្ឋភូមិថ្នល់កែង សង្កាត់បាទី ក្រុងបាវិត មានការព្រួយបារម្មណ៍ និងខឹងសម្បារក្រុមហ៊ុនជីកដីយកអាចម៍ដី ជីករណ្តៅ នៅជិតទួលបុរាណ ធ្វើឲ្យបាក់ដីទួលបុរាណ និងប៉ះខឿនផ្នូរសពដូនតារបស់គាត់តាំងពីបុរាណមក ដោយពួកក្រុមហ៊ុនជីកដីទាំងនោះគ្មានខ្លាចញញើតអាជ្ញាធរក្រុងសង្កាត់ឡើយ ។
ប្រជាពលរដ្ឋបានអំពាវនាវសូមឲ្យមន្ទីរវប្បធម៌ និងវិចិត្រសិល្បៈខេត្ត ក៏ដូចអាជ្ញាធរក្រុងខេត្តមន្ទីររ៉ែ និងថាមពលខេត្ត ចុះទៅអន្តរាគមន៍បញ្ឈប់អាជ្ញាប័នក្រុមហ៊ុនអាជីវកម្មនោះដើម្បីការពារទួលបុរាណមួយនេះទុកជាកន្លែងប្រជាពលរដ្ឋធ្វើពិធីបុណ្យប្រពៃណី និងរក្សាធាតុដូនតាផង ។
លោកចៅសង្កាត់បាទីបានឲ្យដឹងថា ពិតជាមានករណីក្រុមហ៊ុនជីករណ្តៅយកអាចម៌ដីលក់ធ្វើឲ្យប៉ះពាល់ដល់ទួលបុរាណពិតប្រាកដមែន ក៏ប៉ុន្តែក្រោយពីប្រជាពលរដ្ឋប្តឹងនៅថ្ងៃទី៦ ខែវិច្ឆិកា ឆ្នាំ២០១៨ កន្លងទៅ លោកបានសុំឲ្យម្ចាស់អាជីវកម្មនោះផ្អាកការជីកយកអាចម៌ដីសិនរង់ចាំការដោះស្រាយពីអាជ្ញាធរក្រុង ។ ហើយចំពោះក្រុមហ៊ុននោះមិនដឹងឈ្មោះអីទេ គេគ្រាន់តែប្រាប់ថា ពួកគេមកជីករណ្តៅដីនេះតាមរយៈលោកអនុភូមិថ្នល់កែង ។
ករណីក្រុមហ៊ុនជីករណ្តៅយកអាចម៌ដីប៉ះពាល់ទួលបុរាណនេះលោកអភិបាលរងក្រុងបាវិតបានមានប្រសាសន៍ថា សាលាក្រុងបាវិតមិនបានដឹងទេ ហើយបើមានករណីនេះមែនលោកនឹងចុះទៅពិនិត្យមើល ។
ទាក់ទិនបញ្ហាខាងលើនេះដែរលោក សាក់ អនុប្រធានការិយាល័យរ៉ែ និងថាមពល នៃមន្ទីររ៉ែ និងថាមពលខេត្តស្វាយរៀងបានឲ្យ កោះសន្តិភាព ដឹងថា លោកមិនបានដឹងទេ ករណីខាងលើនេះលោកបានបញ្ជាក់ថា នៅខេត្តស្វាយរៀងគ្មានក្រុមហ៊ុនធ្វើអាជីវកម្មជីករណ្តៅដីទេ មានតែ អាជីវ ករធ្វើអាជីវកម្មជីករណ្តៅដីយកអាចម៌ដីឲ្យក្រុមហ៊ុនអចលនៈទ្រព្យ ឬរោងចក្រសហគ្រាស ។
មន្ត្រីសាលាក្រុងបាវិតម្នាក់សុំមិនបញ្ចេញឈ្មោះបានបង្ហើបឲ្យដឹងថា មានអាជីវករខ្លះបានធ្វើសកម្មភាពអាជីវកម្មជីករណ្តៅយកអាចម៌ដីបានបញ្ចប់គ្រប់តាមអាជ្ញាប័នក្រោម១ហិកតា ជម្រៅពី៥ម៉ែត្រទៅ៦ម៉ែត្រអស់ហើយ មិនសុំអាជ្ញាប័នថ្មីទេ គឺទៅធ្វើសកម្មភាពបន្តជីកដល់ក្បាលប្រែត និងពង្រីកទំហំលើសពី១ហិកតា ហើយនៅក្នុងរដ្ឋបាលក្រុងបាវិតមានរណ្តៅដីជាច្រើនជីកជម្រៅជ្រៅប្រជាពលរដ្ឋអ្នកឃ្វាលគោក្របីហៅថា សមុទ្រខៀវ ឬរណ្តៅមរណៈ ។
ចំពោះករណីជីករណ្តៅដីប៉ះពាល់ទួលបុរាណនៅភូមិថ្នល់កែងសង្កាត់បាទីក្រុងបាវិតនោះលោក ប៉ុក តក ប្រធានមន្ទីររ៉ែ និងថាមពល ខេត្តស្វាយរៀងមិនបានដឹងទេ និងមិនបានចេញអាជ្ញាប័នឲ្យដែរ ចាំលោកចាត់មន្ត្រីឲ្យចុះស្រាវជ្រាវរកក្រុមអ្នកជីករណ្តៅដីឲ្យមកដោះស្រាយជូនប្រជាពលរដ្ឋ ៕
ចែករំលែកព័តមាននេះ