ផ្អើលផ្លូវ២៧១ ខណៈស៊េរីទំនើប១គ្រឿងក្រឡាប់ឆេះខ្ទេចក្បែររបងវិទ្យាល័យជាស៊ីមសាមគ្គី
- ភ្នំពេញ
រាជធានីភ្នំពេញ ៖ បុរសម្នាក់សង្ស័យស្រវឹងបានបើករថយន្តស៊េរីទំនើបមួយគ្រឿងបោះពួយយ៉ាងលឿនដូចហោះ ហើយក៏រេចង្កូតទៅបុករបាំងថ្មពុះចែកទ្រូង និងបន្តឆ្លងទៅផ្លូវម្ខាងទៀតទៅបុកនិងដើមផ្ការំយោលមួយដើមរួមទាំងបុករបងសាលាជាស៊ីមសាមគ្គីអស់មួយផ្ទាំង បណ្តាលឲ្យរថយន្តក្រឡាប់ផ្ងារជើងបង្កជាអគ្គីភ័យឆាបឆេះរថយន្តអស់ទាំងស្រុង ។ ហេតុការណ៍នេះបង្កឲ្យមានការណ៍ភ្ញាក់ផ្អើលយ៉ាងខ្លាំងដល់ប្រជាពលរដ្ឋ និងសមត្ថកិច្ចកាលពីវេលាម៉ោង១០និង៥០នាទីយប់ ថ្ងៃទី៧…
ហេតុការណ៍នេះបង្កឲ្យមានការណ៍ភ្ញាក់ផ្អើលយ៉ាងខ្លាំងដល់ប្រជាពលរដ្ឋ និងសមត្ថកិច្ចកាលពីវេលាម៉ោង១០និង៥០នាទីយប់ ថ្ងៃទី៧ ខែវិច្ឆិកា ឆ្នាំ២០១៨ ត្រង់ចំណុចខាងមុខវិទ្យាល័យ ជា ស៊ីម សាមគ្គី តាមបណ្ដោយផ្លូវ២៧១ ស្ថិតក្នុងសង្កាត់ទឹកល្អក់ទី៣ ខណ្ឌទួលគោក។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរសម្នាក់ទំនងជាស្រវឹង បានបើកបររថយន្តមួយគ្រឿងម៉ាកឡង់គ្រីស័រ ស៊េរីឆ្នាំ២០១៨ ពណ៌ស ពាក់ស្លាកលេខ ភ្នំពេញ ២V-០០៧៩ ធ្វើដំណើរតាមបណ្តោយផ្លូវ២៧១ ក្នុងទិសដៅបើកមកពីស្តុបណូគាឆ្ពោះទៅស្ពានអាកាសស្ទឹងមានជ័យ និងក្នុងលឿនយ៉ាងលឿនដូចហោះ។
លុះមកដល់ចំណុចកើតដែលផ្លូវមានស្ថានភាពកោង ស្រាប់តែរថយន្តបង្កខាងលើបានរេចង្កូតទៅខាងឆ្វេងបុកនឹងរបាំងថ្មពុះចែកទ្រូងផ្លូវបណ្ដាលឲ្យបែកអស់មួយផ្ទាំងធំ តែរថយន្តបង្កនៅមិនទាន់អស់ល្បឿន ក៏ជ្រុលចង្កូតឆ្លងទៅផ្លូវបុកបង្គោលថ្មរបស់វិទ្យាល័យជាស៊ីមសាមគ្គីដែលសម្រាប់ថ្ពក់ច្រវាក់ដាក់ព័ទ្ធជុំវិញរបងវិទ្យាល័យនោះ បណ្ដាលឲ្យបាក់អស់បីដើម។
ប៉ុន្តែរថយន្តបង្កនៅតែមិនទាន់អស់ល្បឿនក៏ជ្រុលឡើងលើខឿនទៅបុកដើមផ្ការំយោលមួយដើម បណ្ដាលឲ្យបាក់ដាច់ជាពីរកំណាត់ ហើយរថយន្តបង្កក៏បានខ្ទាតផ្លោងទៅប៉ះនិងរបងសាលាមួយផ្ទាំងរងការខូចខាតបែកប្រេះ ទើបបណ្តាលឲ្យក្រឡាប់ផ្ងារជើងបែរក្បាលត្រឡប់ក្រោយគងលើដើមផ្ការំយោលមួយដើមទៀតរងការខូចខាតយ៉ាងដំណំ។
ប្រភពដដែលបន្តថា មួយស្ទុះក្រោយមកក៏ឃើញបុរសដែលជាអ្នកបើកបររថយន្តខាងលើ បានលូនចេញមកពីក្នុងរថយន្តរួចបានគេចខ្លួនចេញពីកន្លែងកើតហេតុបាត់ស្រមោល បន្ទាប់មកក៏ស្រាប់តែមានផ្សែង
ភ្លាមៗនោះក៏មានប្រជាពលរដ្ឋដែលរស់នៅក្បែរកន្លែងកើតហេតុបាននាំគ្នាយកបំពង់ពន្លត់អគ្គិភ័យមកបាញ់ពន្លត់អស់ពីរទៅបីបំពង់ដែរ ប៉ុន្តែអណ្ដាតភ្លើងនៅតែបន្តឆាបឆេះរថយន្តបង្កកាន់តែខ្លាំងៗឡើង។
ក្រោយពេលកើតហេតុ សមត្ថកិច្ចមូលដ្ឋានបានទាក់ទងទៅសមត្ថកិច្ចជំនាញឲ្យចុះមកធ្វើការស្ទូចយករថយន្តខាងលើទៅរក្សាទុកនៅឯការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំម្ចាស់ចូលខ្លួនមកធ្វើការដោះស្រាយទៅតាមផ្លូវច្បាប់នៅពេលក្រោយ៕
ចែករំលែកព័តមាននេះ