ខេត្តសៀមរាប ៖ ជនបរទេសម្នាក់ដេកស្លាប់ នៅក្នុងបន្ទប់ផ្ទះជួលខណៈសំពាធឈាមឡើងគំហុកបណ្តាលឱ្យស្លាប់ភ្លាមៗបង្កឱ្យមានការភ្ញាក់ផ្អើលអ្នកជិតខាងរហូតដល់សមត្ថកិច្ចជំនាញ ចុះមកជួយធ្វើអន្តរាគមន៍ កាលពីវេលាម៉ោង២០និង០០នាទីយប់ ថ្ងៃទី០៧ ខែវិច្ឆិកា ឆ្នាំ២០១៨ ស្ថិតនៅក្នុងបន្ទប់ជួលក្នុងភូមិស្ទឹងថ្មី សង្កាត់ស្វាយដង្គំ ក្រុងខេត្តសៀមរាប ។
បើតាមប្រភពពីសមត្ថកិច្ចនគរបាលខេត្តបានឱ្យដឹងថា ដោយបានទទួលព័ត៌មានពីតំណាងម្ចាស់ផ្ទះជួលថា មានករណីជនបរទេសដេកស្លាប់ភ្លាមៗនៅក្នុងបន្ទប់ផ្ទះជួលនោះកម្លាំងយើងក៏បានចុះទៅដល់កន្លែងកើតហេតុ ដើម្បីពិនិត្យភ្លាមៗផងដែរ ។ ក្រោយការពិនិត្យសមត្ថកិច្ចនគរបាលជំនាញបានឱ្យដឹងថា ជនរងគ្រោះមានឈ្មោះ RIVERS DEAN STEPHEN ភេទប្រុស កើតឆ្នាំ ១៩៤៧ ជនជាតិអាមេរិក កាន់លិខិតឆ្លងដែនលេខ៥៦៦០៣៤២៨៤ មុខរបរចូលនិវត្តន៍បានដេកស្លាប់នៅក្នុងបន្ទប់ជួល ស្ថិតនៅភូមិស្ទឹងថ្មី សង្កាត់ស្វាយដង្គំ ក្រុងខេត្តសៀមរាប ។
តាមការសាកសួរតំណាងម្ចាស់ផ្ទះបានឱ្យដឹងថា ដោយមិនឃើញជនរងគ្រោះចេញពីក្នុងបន្ទប់ខ្លួនមានការសង្ស័យក៏បានទៅបើកទ្វារបន្ទប់មើល ស្រាប់តែឃើញជនរងគ្រោះដេកស្លាប់នៅក្នុងបន្ទប់ ហើយខ្លួនក៏បានរាយការណ៍ជូនសមត្ថកិច្ចតែម្តង ។ ផ្អែកតាមការស្រាវជ្រាវរបស់សមត្ថកិច្ចនគរបាលជំនាញ និងលោកវេជ្ជបណ្ឌិត អ៊ិត ឆបឆរ័ត្ន គ្រូពេទ្យ អមតុលាការបានសន្និដ្ឋានថា ជនរងគ្រោះបានស្លាប់រយៈពេលប្រហែលជាបីថ្ងៃមកហើយ ដោយសារជំងឺសំពាធឈាមឡើងគំហុកបណ្តាលឱ្យស្លាប់ ។
បច្ចុប្បន្នសាកសពជនរងគ្រោះត្រូវបានកម្លាំងជំនាញរៀបចំបញ្ជូនទៅតម្កល់ទុកនៅមន្ទីរពេទ្យមិត្តភាពខ្មែរ-សូវៀត (ពេទ្យរុស្ស៊ី) រាជធានីភ្នំពេញ តាមសំណូមពររបស់តំណាងស្ថានទូត ៕
ចែករំលែកព័តមាននេះ