រាជធានីភ្នំពេញ ៖ នៅក្នុងពិធីបុណ្យឯករាជ្យជាតិខួបលើកទី៦៥ នៅថ្ងៃទី៩ ខែវិច្ឆិកា ខាងមុខនេះ នឹងមានអ្នកចូលរួមប្រមាណជាង២៦.០០០នាក់ ដោយក្នុងនោះរួមមានកម្លាំងមហាជននិងកម្លាំងសមត្ថកិច្ចចម្រុះ និងមានពិធីព្យុហយាត្រារបស់អង្គភាពពាក់ព័ន្ធនីមួយៗផងដែរ ។…
រាជធានីភ្នំពេញ ៖ នៅក្នុងពិធីបុណ្យឯករាជ្យជាតិខួបលើកទី៦៥ នៅថ្ងៃទី៩ ខែវិច្ឆិកា ខាងមុខនេះ នឹងមានអ្នកចូលរួមប្រមាណជាង២៦.០០០នាក់ ដោយក្នុងនោះរួមមានកម្លាំងមហាជននិងកម្លាំងសមត្ថកិច្ចចម្រុះ និងមានពិធីព្យុហយាត្រារបស់អង្គភាពពាក់ព័ន្ធនីមួយៗផងដែរ ។
នេះជាការលើកឡើងរបស់លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិក្នុងកិច្ចប្រជុំរបស់អគ្គស្នងការដ្ឋាននគរបាលជាតិ លើផែនការរៀបចំសន្តិសុខសណ្តាប់ធ្នាប់ បុណ្យឯករាជ្យជាតិថ្ងៃទី៩ ខែវិច្ឆិកា ខាងមុខនេះ កាលពីព្រឹកថ្ងៃទី៦ ខែវិច្ឆិកា នៅសាលប្រជុំអគ្គស្នងការដ្ឋាននគរបាលជាតិ ដោយមាន ការចូលរួមពីស្នងការនគរបាលខេត្តនិងរាជធានីដែលជាប់ពាក់ព័ន្ធនឹងកិច្ចការពារសន្តិសុខ សណ្តាប់ធ្នាប់ ។ ថ្ងៃបុណ្យឯករាជ្យជាតិ ៩ វិច្ឆិកា ឆ្នាំ២០១៨នេះ គឺជាខួប៦៥ឆ្នាំ ដែលកម្ពុជាទទួលបានឯករាជ្យពេញលេញពីប្រទេសបារាំងដែលធ្វើអាណានិគមនិយមលើប្រទេសកម្ពុជា ។
យោងតាមមន្ត្រីរៀបចំបានឲ្យដឹងថា កម្លាំងមហាជននិងកងកម្លាំងប្រដាប់អាវុធដែលចូលរួមនៅវិមានឯករាជ្យ មានចំនួន១៣.៩៥០នាក់ និងនៅមុខព្រះបរមរាជវាំងមានចំនួន១២.៣០០នាក់ ។ លោកនាយឧត្តមសេនីយ៍អគ្គស្នងការលើកឡើងថា ពិធីបុណ្យឯករាជ្យជាតិខួបលើកទី៦៥ ឆ្នាំនេះ ត្រូវយកចិត្តទុកដាក់បន្ថែមទៀតចំនួន៣ចំណុចគឺ ទី១-នៅវិមានឯករាជ្យ ទី២-នៅមុខព្រះបរមរាជវាំង និងទី៣-នៅតាមដង ផ្លូវ។ នៅវិមានឯករាជ្យនាព្រឹកថ្ងៃទី៩ ខែវិច្ឆិកា មានពិធីអុជទៀនជ័យ និងព្រះមហាក្សត្រស្តេចយាងត្រួតពល ដែលអមដំណើរដោយសម្តេចតេជោនាយករដ្ឋមន្ត្រី ហ៊ុន សែន មិទ្ទីញមហាជននៅមុខព្រះបរម រាជវាំង ។
សម្តេចតេជោ ហ៊ុន សែន នឹងគ្រោងឡើងថ្លែងសុន្ទរកថាផងដែរ ក្នុងពិធីដ៏មហោឡារិកនេះ ។ចំណែកនៅវិមានឯករាជ្យ សមត្ថកិច្ចរៀបចំការពារសុវត្ថិភាពតាំងពីថ្ងៃទី៨ ខែវិច្ឆិកា ព្រោះគេត្រូវដាក់កម្រងផ្កានៅវិមានឯករាជ្យ និងនៅព្រះបរមរូប ។ នៅព្រឹកថ្ងៃទី៩ ខែវិច្ឆិកា ពេលដែលព្រះមហាក្សត្រអុជទៀនជ័យ ហើយព្រះអង្គយាងទទួលបដិសណ្ឋារកិច្ចពីឥស្សរជនជាន់ខ្ពស់មួយចំនួន រួចហើយព្រះអង្គនឹងយាងត្រួត
ពលមួយជុំវិមានឯករាជ្យ ហើយនឹងយាងតាមព្រះទីនាំងជាមួយសម្តេចតេជោ ហ៊ុន សែន មកមុខព្រះបរម រាជវាំង ។
លោកនាយឧត្តមសេនីយ៍ នេត សាវឿនបញ្ជាក់ថា កិច្ចប្រជុំនេះផ្តោតទៅលើបញ្ហាប្រឈមនឹងសភាពការជាក់ស្តែង ដើម្បីរួមគ្នាដោះស្រាយ ហើយគោលបំណងធំតែមួយគត់ គឺធានាសុវត្ថិភាពឲ្យបាន១០០% ។ នេះជាកិច្ចការដែលយើងត្រូវធានាចំពោះរាជរដ្ឋាភិបាល ដើម្បីការរក្សាសន្តិសុខ សណ្តាប់ធ្នាប់ និងសុវត្ថិភាពឲ្យបានទាំងស្រុង ហើយគោលដៅរបស់យើងត្រូវយកចិត្តទុកដាក់នៅជុំវិញវិមានឯករាជ្យ និងតាមដងផ្លូវ ៕
ចែករំលែកព័តមាននេះ