រាជធានីភ្នំពេញ ៖ បើទោះបីជាក្នុងពេលបច្ចុប្បន្ន ខ្សែភាពយន្តខ្មែរហាក់មានការងើបឡើងបន្តិចក៏ដោយ ប៉ុន្តែបណ្តាផលិតករមួយចំនួនសម្តែងក្តីបារម្ភចំពោះភាពតូចចង្អៀតនៃទីផ្សារភាពយន្តនៅក្នុងប្រទេសកម្ពុជា ដែលហាក់មិនសូវជាអំណោយផលក្នុងការវិនិយោគលើវិស័យនេះឡើយ ។
រាជធានីភ្នំពេញ ៖ បើទោះបីជាក្នុងពេលបច្ចុប្បន្ន ខ្សែភាពយន្តខ្មែរហាក់មានការងើបឡើងបន្តិចក៏ដោយ ប៉ុន្តែបណ្តាផលិតករមួយចំនួនសម្តែងក្តីបារម្ភចំពោះភាពតូចចង្អៀតនៃទីផ្សារភាពយន្តនៅក្នុងប្រទេសកម្ពុជា ដែលហាក់មិនសូវជាអំណោយផលក្នុងការវិនិយោគលើវិស័យនេះឡើយ ។
ផលិតករភាពយន្ត អ្នកស្រី ពាន់ ភួងបុប្ផា អះអាងប្រាប់អ្នកសារព័ត៌មានក្នុងឱកាសបើកសម្ពោធខ្សែភាពយន្តខ្នាតធំរឿងកុមារី២៥ឆ្នាំ វគ្គ២ កាលពីពេលថ្មីៗកន្លងទៅនេះថា កន្លងមក ផ្នែកសិល្បៈវប្បធម៌នេះ បានក្លាយជាចំណុចមួយរសើបបំផុត ហើយរាជរដ្ឋាភិបាលកម្ពុជាបានចេញសេចក្តីប្រកាសថា មិនអនុញ្ញាតឱ្យយកពន្ធទៅលើវិស័យមួយនេះឡើយ ប៉ុន្តែរហូតមកដល់ពេលនេះ អ្នកស្រីមិនដឹងថា មានការប្រែប្រួល ឬយ៉ាងណាទេ ។
អ្នកស្រី ពាន់ ភួងបុប្ផា បញ្ជាក់ថា សព្វថ្ងៃ វិស័យភាពយន្ត គឺមិនមានអ្នកដែលជួយយើងក្រៅតែអំពីផលិតករខ្លួនឯងដែលខិតខំពុះពាររហូតផលិតករខ្លះធ្វើឡើងក្រខ្លួនក៏មាន ចំណែកមួយចំនួនបានជោគជ័យគឺគេគ្រាន់បើ ប៉ុន្តែអ្នកស្រីយល់ថា ការបណ្តាក់ទុនលើវិស័យមួយនេះហាក់មិនសូវបានចំណេញដូចវិស័យសិល្បៈផ្សេងៗទៀតឡើយ ។ អ្នកស្រីបន្ថែមថា ដោយឈរលើកត្តានេះបានធ្វើឱ្យអ្នកដែលចង់វិនិយោគទៅលើវិស័យភាពយន្តនៅកម្ពុជាកាន់តែមានការខើចទៅៗ ដោយសារក្នុងប្រទេសយើងមិនមានស្ទូឌីយោ ធំៗ ដូចនៅក្នុងប្រទេសគេឡើយ ហេតុនេះ គឺពិបាកក្នុងការបោះទុនច្រើនក្នុងវិស័យនេះ ព្រោះវាពិបាកប្រមូលថវិកាយកទៅវិញ ។ ដោយឡែក បូករួមជាមួយនឹងទីផ្សារនៅក្នុងប្រទេសយើងតូចចង្អៀតផងនោះ រឹតតែធ្វើឱ្យគេពិបាកក្នុងការវិនិយោគលើវិស័យនេះ ។
ផលិតកររូបនេះនិយាយថា ម៉្យាងទៀត បច្ចុប្បន្នរោងភាពយន្តនៅក្នុងស្រុកមួយចំនួនគឺមានសម្ពាធខ្លាំងជាមួយម្ចាស់ផលិតករទៅលើបញ្ហានៃការចាក់បញ្ចាំងខ្សែភាពយន្តម្តងៗ ដែលកត្តាមួយនេះក៏អាចជះឥទ្ធិពលធ្វើឱ្យវិស័យភាពយន្តខ្មែរធ្លាក់ចុះទៅវិញដែរ ។ រោងភាពយន្តមួយចំនួន គឺយកតម្លៃផ្តាច់ក្នុងមួយថ្ងៃ ដែលធ្វើឱ្យផលិតករអាចទទួលយកបានក្នុងការចរចាតម្លៃគ្នានោះ ប៉ុន្តែសម្រាប់រោងភាពយន្តមួយចំនួនទៀត គឺគេគិតតម្លៃដោយចែកគ្នា៥០ភាគរយម្នាក់ ដែលបញ្ហាមួយនេះហាក់មិនសូវជាមានភាពយុត្តិធម៌សម្រាប់អ្នកផលិតឡើយ ។
ត្រង់ចំណុចនេះ អ្នកស្រី ពាន់ ភួងបុប្ផា បានស្នើសុំឱ្យម្ចាស់រោងភាពយន្តទាំងនោះមេត្តាពិចារណាឡើងវិញទៅលើបញ្ហាមួយនេះ ប្រសិនបើអាច អ្នកស្រីសុំឱ្យម្ចាស់រោងភាពយន្តយកតម្លៃទាបជាងម្ចាស់ផលិតករត្រឹមរយៈពេលបញ្ចាំង២សប្តាហ៍ ចំណែកនៅសប្តាហ៍ទី៣ គឺចាំយកស្មើគ្នា ។ ការធ្វើបែបនេះ គឺធ្វើឱ្យផលិតករអាចរស់បានដោយសារតែយើងអាចយកលុយទាំងនេះទៅផលិតរឿងថ្មីបន្ថែមទៀត ប្រសិនបើផលិតករ ផលិតរឿងមួយបានហើយ តែគ្មានបានយកលុយទៅវិញ តើយើងបានអ្វីសម្រាប់ផលិតរឿងថ្មីទៀត ។
ទោះជាយ៉ាងណាក្តី ទាក់ទងទៅនឹងការផលិតខ្សែភាពយន្តវិញ អ្នកស្រី ពាន់ ភួងបុប្ផា បានសំណូមពរឱ្យគ្រប់ផលិតករទាំងអស់ យកចិត្តទុកដាក់ក្នុងការផលិតខ្សែភាពយន្តមួយឱ្យមានគុណភាព និងសម្រិតសម្រាំងនូវស្នាដៃរបស់ខ្លួនមុននឹងចេញបញ្ចាំងឱ្យទស្សនិកជនទស្សនា ។ ប្រសិនបើយើងយល់ថា ជោគជ័យហើយចេះតែផលិតទាំងប្រថុយប្រថាននោះ វាក៏ជាបញ្ហាធ្វើឱ្យកុនខ្មែរធ្លាក់ចុះទៅវិញបានដែរ ។
អ្នកស្រី ពាន់ ភួងបុប្ផា បានស្នើសុំឱ្យរាជរដ្ឋាភិបាល កុំយកពន្ធទៅលើវិស័យភាពយន្ត ខណៈពេលដែលអាជីពនៃផលិតករខ្មែបច្ចុប្បន្នកំពុងតែមានភាពផុយស្រួយនោះ ។ ទាក់ទងបញ្ហានេះដែរ លោក ស៊ិុន ច័ន្ទសាយ៉ា ប្រធាននាយកដ្ឋានភាពយន្តនៃក្រសួងវប្បធម៌ និងវិចិត្រសិល្បៈ ធ្លាប់មានប្រសាសន៍ថា បច្ចុប្បន្ន ការផលិតខ្សែភាពយន្តខ្មែរហាក់មានការងើបឡើងវិញជាបណ្តើរៗ បន្ទាប់ពីមានការធ្លាក់ចុះដ៏គួរឱ្យព្រួយបារម្ភ ក្នុងរយៈពេលប៉ុន្មានឆ្នាំចុងក្រោយនេះ ។ ទោះជាយ៉ាងណាក្តី លោកបញ្ជាក់ថា នាពេលបច្ចុប្បន្ន ការផលិតខ្សែភាពយន្តខ្មែរ នៅមិនទាន់គ្រប់គ្រាន់សម្រាប់ទីផ្សារនៅឡើយទេ ហេតុនេះក្រសួងបានជំរុញ និងលើកទឹកចិត្តដល់បណ្តាផលិតករទាំងអស់ឱ្យបន្តផលិតខ្សែភាពយន្តថ្មីៗបន្ថែម ក្នុងពេលដែលរាជរដ្ឋាភិបាលកម្ពុជា ក៏បានខិតខំស្វែងរកអ្នកវិនិយោគរោងកុនបន្ថែមទៀត ដោយសង្ឃឹមថា នាពេលអនាគត រោងកុននៅក្នុងស្រុកនឹងមានការកើនឡើងបន្ថែមទៀត ៕
ចែករំលែកព័តមាននេះ