រាជធានីភ្នំពេញ ៖ ទោះបីជាបច្ចុប្បន្នភាពជំងឺគ្រុនឈាមមានការថយចុះគួរឱ្យកត់សម្គាល់ក៏ដោយ ប៉ុន្តែមន្ត្រីជំនាញអះអាងថា ជារៀងរាល់ឆ្នាំ ជំងឺគ្រុនឈាមបានផ្តាច់ជីវិតកុមារជាមធ្យមពី៧០ទៅ៨០នាក់ ដែលបញ្ហានេះទាំងអស់គ្នាត្រូវបង្កើនស្មារតីប្រុងប្រយ័ត្នជានិច្ច ។
រាជធានីភ្នំពេញ ៖ ទោះបីជាបច្ចុប្បន្នភាពជំងឺគ្រុនឈាមមានការថយចុះគួរឱ្យកត់សម្គាល់ក៏ដោយ ប៉ុន្តែមន្ត្រីជំនាញអះអាងថា ជារៀងរាល់ឆ្នាំ ជំងឺគ្រុនឈាមបានផ្តាច់ជីវិតកុមារជាមធ្យមពី៧០ទៅ៨០នាក់ ដែលបញ្ហានេះទាំងអស់គ្នាត្រូវបង្កើនស្មារតីប្រុងប្រយ័ត្នជានិច្ច ។
លោក ច ម៉េងចួ ប្រធានមជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់ប៉ារ៉ាស៊ីតសាស្ត្រ-បាណនសាស្ត្រ មានប្រសាសន៍ថា ចំនួនករណីគ្រុនឈាមនៅកម្ពុជាក្នុង៥ខែនាដើមឆ្នាំ២០១៣នេះ មាន៣០៥១នាក់ ក្នុងនោះស្លាប់១៨នាក់ គឺថយចុះ៥០% បើប្រៀបធៀបរយៈពេល៥ខែ ដូចគ្នានាឆ្នាំ២០១២ ដែលមាន៦០៧៧នាក់ ។ ដោយឡែក ក្នុង១ខែឧសភា ឆ្នាំ២០១៣នេះ ករណីគ្រុនឈាមមាន៧១% តិចជាងខែឧសភា ឆ្នាំ២០១២ ។ ទោះបីជាយ៉ាងណាក៏យើងនៅតែត្រូវបន្តការប្រុងប្រយ័ត្នជានិច្ច ព្រោះថា កន្លងមកជារៀងរាល់ឆ្នាំ ទោះក្នុងឆ្នាំដែលគ្មានការផ្ទុះជំងឺរាតត្បាតទូទាំងប្រទេសក៏ដោយ ក៏ជំងឺនេះតែងផ្តាច់ជីវិតកុមារជាមធ្យម៧០ ឬ៨០នាក់ដែរក្នុង១ឆ្នាំៗ ។
លោកបន្តថា ៧១% នៃករណីឈឺ ៥ខែនាដើមឆ្នាំ២០១៣ ជាកុមារអាយុ៥-១៤ឆ្នាំ ។ អត្រាឈឺក្នុងប្រជាជន១សែននាក់ មាន២០,៩ ក្នុងនោះខេត្តដែលមានអត្រាឈឺខ្ពស់ ភាគច្រើនជាខេត្តនៅជាប់ ឬជិតព្រំដែនថៃ និងខេត្តតាមឆ្នេរសមុទ្រ ចំណែកខេត្តកម្ពុជាតាមព្រំដែនវៀតណាម មានអត្រាឈឺទាប ។ អត្រាខុសគ្នារវាងខេត្តក្នុងប្រទេសកម្ពុជានេះអាចពាក់ព័ន្ធនឹងបរិយាកាសជិតខាង ។ ករណីគ្រុនឈាមនៅប្រទេសថៃ ៥ខែកើន៣ដងលើសចំនួនឈឺរយៈពេលដូចគ្នានាឆ្នាំ២០១២ ដោយភាគច្រើននៅភាគឦសាន ។ ក្នុងរយៈពេល៥ខែនាដើមឆ្នាំ២០១៣ នៅប្រទេសសិង្ហបុរី គ្រុនឈាមកើន៤៦១% លើសចំនួនក្នុង៥ខែដើមឆ្នាំ២០១២ ។ ប្រទេសឡាវកើន៤១៧% គិតត្រឹមថ្ងៃទី២៦ មេសា ។
ប្រទេសវៀតណាម កើន២៣% ត្រឹមថ្ងៃទី២០ មេសា ។ នៅដើមឆ្នាំ២០១៣នេះ ប្រទេសតំបន់អាស៊ានដែលមានអត្រាជំងឺគ្រុនឈាមក្នុងប្រជាជន១សែននាក់ ខ្ពស់ជាងកម្ពុជាក្នុងរយៈពេលដូចគ្នា គឺសិង្ហបុរីស្មើ៥,៨ដងនៃអត្រាកម្ពុជា ឡាវ ស្មើ២,៩ដងនៃអត្រាកម្ពុជា ហ្វ៊ីលីពីន មាន២,៣ដងនៃអត្រាកម្ពុជា ថៃស្មើ២ដងនៃអត្រាកម្ពុជា ម៉ាឡេស៊ីស្មើ១,៩ដងនៃអត្រាកម្ពុជា ចំណែកវៀតណាមមានអត្រាលើសកម្ពុជាបន្តិចបន្តួច ។
លោក ច ម៉េងចួ បានបញ្ជាក់ថា អន្តរាគមន៍ជាគន្លឹះឆ្លើយតបនឹងជំងឺគ្រុនឈាម គឺបំបាត់ជម្រកមូសខ្លា និងបញ្ជូនអ្នកជំងឺ ជាពិសេសកុមារក្តៅខ្លួនទៅមន្ទីរពេទ្យសាធារណៈឱ្យបានទាន់ពេល ហើយអន្តរាគមន៍ទាំងនេះត្រូវចាប់ដំបូងបង្អស់ពីគ្រួសារនីមួយៗ និងការចូលរួមរបស់សហគមន៍នីមួយៗ ។ អាស្រ័យហេតុនេះ លោកសូមអំពាវនាវដោយទទូចសុំស្ថាប័នពាក់ព័ន្ធ អាជ្ញាធរមូលដ្ឋានគ្រប់លំដាប់ថ្នាក់ និងបណ្តាញសារព័ត៌មានទាំងអស់ មេត្តាជួយជំរុញចលនាទាំងនេះ ដើម្បីបញ្ចៀសកុមារពីគ្រោះមរណៈដោយការផ្ទុះរាតត្បាតគ្រុនឈាម ។
នៅក្នុង២១សប្តាហ៍កន្លងមកនេះ៧១% នៃករណីគ្រុនឈាមសរុប ជាកុមារអាយុពី៥-១៤ឆ្នាំ ដែលភាគច្រើនកំពុងរៀនក្នុងសាលាបឋមសិក្សា ។ ហេតុនេះការចូលរួមរបស់លោកគ្រូ អ្នកគ្រូ និងសិស្សានុសិស្ស ជាផ្នែកមួយដ៏សំខាន់ណាស់ ក្នុងការប្រយុទ្ធនឹងជំងឺគ្រុនឈាម ព្រោះថាការយល់ដឹងរបស់សិស្សានុសិស្សអំពីគ្រុនឈាមមានប្រយោជន៍សំខាន់ដល់សាមីខ្លួនផង សម្រាប់មាតាបិតា និងប្អូនៗរបស់ពួកគេនៅផ្ទះផង ៕
ចែករំលែកព័តមាននេះ