ខេត្តបាត់ដំបង ៖ គ្រោះថ្នាក់ចរាចរណ៍រវាងម៉ូតូបុកជាមួយម៉ូតូបណ្តាលឱ្យរបួសធ្ងន់២នាក់និងស្រាលម្នាក់ ដែលហេតុការណ៍នេះបានកើតឡើងកាលពីវេលាម៉ោង៨និង១០នាទីយប់ថ្ងៃទី៤ ខែវិច្ឆិកា ឆ្នាំ២០១៨ នៅចំណុច ៥៧B ស្ថិតក្នុងភូមិបួរ ឃុំបួរ ស្រុកភ្នំព្រឹក ។
ភាគីម៉ូតូមួយគ្រឿងម៉ាកហុងដា ធុនសេ១០០ ពណ៌ខ្មៅ គ្មានស្លាកលេខ បើកបរដោយឈ្មោះ ជី សុខណាន ភេទប្រុស អាយុ៣១ឆ្នាំ មានទីលំនៅភូមិភ្នំប្រាំពីរ ឃុំបួរ ស្រុកភ្នំព្រឹក បានរងរបួសស្រាល ។ ចំណែកម៉ូតូមួយគ្រឿងទៀតជិះគ្នា២នាក់ម៉ាកហុងដាឌ្រីម ធុនC125 ពណ៌ខ្មៅ ស៊េរីឆ្នាំ២០១២ ពាក់ស្លាកលេខ បាត់ដំបង ១P-១៩៣៤ បើកបរដោយឈ្មោះ យី សារ័ត្ន ភេទប្រុស អាយុ៥៥ឆ្នាំ រស់នៅភូមិផ្ដាច់ព្រ័ត ឃុំបវេល ស្រុកបវេល បានរងរបួសធ្ងន់ រីឯអ្នករួមដំណើរឈ្មោះ ធួក ផល្លី ភេទស្រី អាយុ៤៥ ឆ្នាំ រស់នៅភូមិ.ឃុំជាមួយគ្នា បានរងរបួសធ្ងន់ ។
ប្រភពព័ត៌មានបានឱ្យដឹងថា ម៉ូតូមួយគ្រឿងម៉ាកហុងដាវ៉េវ បើកបរក្នុងស្ថានភាពស្រវឹង បើក ចូលទ្រូងផ្លូវរបស់ម៉ូតូម៉ាកហុងដា បណ្តាលឱ្យបុកគ្នាក្នុងទិសដៅបញ្ច្រាសគ្នា ធ្វើឱ្យអ្នកបើកបរម៉ូតូម៉ាកវ៉េវរងរបួសធ្ងន់ ចំណែកអ្នកបើកបរម៉ូតូម៉ាកហុងដា និងអ្នករួមដំណើរបានរងរបួសធ្ងន់ ។ ជនរងគ្រោះទាំង៣នាក់ត្រូវបានសមត្ថកិច្ចបញ្ជូនទៅព្យាបាលនៅមន្ទីពេទ្យបង្អែកស្រុកសំពៅលូន ។
ក្រោយពេលកើតហេតុ សមត្ថកិច្ចបានចុះធ្វើការវាស់វែង និងត្រួតពិនិត្យកន្លែងកើតហេតុ រួច បានយកម៉ូតូទាំង២គ្រឿងមករក្សាទុកនៅប៉ុស្តិ៍នគរបាលរដ្ឋបាលបួរ រង់ចាំការដោះស្រាយតាមនីតិវិធី ៕
ចែករំលែកព័តមាននេះ