រាជធានីភ្នំពេញ ៖ ទណ្ឌិត កាំង ហ្កេកអា៊វ ហៅ ឌុច អតីតមេគុកទួលស្លែង ហៅមន្ទីរស-២១ ដែលជាគុកធំបំផុតនាសម័យកម្ពុជាប្រជាធិបតេយ្យ (ខ្មែរក្រហម) ត្រូវបានការិយាល័យសហព្រះរាជអាជ្ញាសាលាក្តីខ្មែរក្រហមប្រកាសឱ្យដឹងនៅថ្ងៃទី៦ មិថុនា ថា ទណ្ឌិតរូបនេះ ត្រូវបានផ្ទេរពីមន្ទីរឃុំឃាំងអង្គជំនុំជម្រះវិសាមញ្ញក្នុងតុលាការកកម្ពុជាទៅកាន់ពន្ធនាគារខេត្តកណ្តាល បន្ទាប់ពីបញ្ចប់ការផ្តល់សក្ខីកម្មរបស់ខ្លួនក្នុងសំណុំរឿង០០២ ។
កាំង ហ្កេកអ៊ាវ ហៅឌុច ត្រូវបានកាត់ទោសដោយសាលាក្តីឱ្យជាប់ពន្ធនាគារអស់មួយជីវិត ដូច្នេះទណ្ឌិតអតីតេមគុកទួលស្លែងរូបនេះ ត្រូវបន្តដេកក្នុងពន្ធនាគារខេត្តកណ្តាលរហូតអស់មួយជីវិត ។ យោងតាមសេចក្តីប្រកាសព័ត៌មានរបស់ការិយាល័យសហព្រះរាជអាជ្ញាបានឱ្យដឹងថា នៅថ្ងៃទី៣ កុម្ភៈ ឆ្នាំ២០១២ កាំង ហ្គេកអ៊ាវ ត្រូវបានផ្តន្ទាទោសដាក់ពន្ធនាគារអស់មួយជីវិតដោយអង្គជំនុំជម្រះតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ។
នៅថ្ងៃដដែលសហព្រះរាជអាជ្ញាបានដាក់សំណើមួយសុំឱ្យអនុវត្តទោសស្របទៅតាមវិធាន១១៣(១) នៃវិធានផ្ទៃក្នុង ។ សហព្រះរាជអាជ្ញាបានស្នើសុំថា៖
១-កាំង ហ្គេកអា៊វ ត្រូវបន្តនៅមន្ទីរឃុំឃាំងអ.វ.ត.ក រហូតដល់បញ្ចប់ការផ្តល់សក្ខីកម្មរបស់គាត់ក្នុងសំណុំរឿង០០២ ដែលបានកំណត់ពេលរួច
ហើយ ។ ២-ការផ្តល់ពន្ធនាគារសមស្រប ត្រូវបានកំណត់សម្រាប់ កាំង ហ្កេកអា៊វ នៅក្នុងប្រព័ន្ធពន្ធនាគារជាតិ ។ អ.វ.ត.ក គឺជាតុលាការជាតិ ដែលស្ថិតនៅក្នុងប្រព័ន្ធច្បាប់របស់ប្រទេសកម្ពុជា ហើយអាជ្ញាធរកម្ពុជា គឺជាអ្នកទទួលខុសត្រូវចុងក្រោយសម្រាប់ការដាក់ពន្ធនាគាររាល់បុគ្គលទាំងអស់ដែលត្រូវបានផ្តន្ទាទោស និងបានប្រកាសទោសនៅ អ.វ.ត.ក ចំពោះទោសត្រូវជាប់ពន្ធនាគារ។
សេចក្តីប្រកាសព័ត៌មានបានបន្តថា លោកអគ្គនាយកពន្ធនាគារនៃក្រសួងមហាផ្ទៃនៃរាជរដ្ឋាភិបាលកម្ពុជា បានផ្តល់ជំនួយគ្រប់បែបយ៉ាងដល់សហព្រះរាជអាជ្ញា ។ ទីកន្លែងសមស្របដែលអាចឱ្យ កាំង ហ្កេកអ៊ាវ នៅបាន គឺពន្ធនាគារខេត្តកណ្តាល ។ បុគ្គលិកដែលជាសមាជិករបស់ការិយាល័យសហព្រះរាជអាជ្ញាបានទៅធ្វើទស្សនកិច្ចនៅពន្ធនាគារខេត្តកណ្តាល កាលពីខែមិថុនា ឆ្នាំ២០១២ និងខែឧសភា ឆ្នាំ២០១៣ ហើយបានធ្វើការត្រួតពិនិត្យទីកន្លែងដែលគេបានដាក់សម្រាប់ដាក់កាំង ហ្កេកអ៊ាវ ។ ខណៈដែលបានទទួលស្គាល់អំពីការកម្រិតផ្សេងៗ នៅក្នុងការប្រតិបត្តិលក្ខខណ្ឌនៃពន្ធនាគារក្នុងស្រុក សហព្រះរាជអាជ្ញា ដោយមានមូលដ្ឋាននៅលើការអង្កេតសាកសួររបស់ខ្លួនបានធ្វើការសន្និដ្ឋានចុងក្រោយថា ទីកន្លែងពន្ធនាគារដែលគេបានស្នើសម្រាប់ដាក់ កាំង ហ្កេកអា៊វ នោះ គឺជាពន្ធនាគារមួយ ដែលនឹងការពារផលប្រយោជន៍របស់គាត់បានល្អប្រសើរបំផុត ។
កាលពីថ្ងៃទី២១ ខែឧសភា ឆ្នាំ២០១៣ សហព្រះរាជអាជ្ញាបានធ្វើសំណើទៅអគ្គនាយកដ្ឋានពន្ធនាគារនៃក្រសួងមហាផ្ទៃ ដើម្បីសុំផ្ទេរ កាំង ហ្កេកអា៊វ ហៅ ឌុច ទៅដាក់នៅពន្ធនាគារខេត្តកណ្តាល ។ នៅពេលទន្ទឹមគ្នានេះ សហព្រះរាជអាជ្ញាក៏បានសម្របសម្រួលផងដែរ ជាមួយអគ្គនាយកដ្ឋានពន្ធនាគារថា ទីកន្លែង និងស្ថានភាពនៃការឃុំខ្លួន កាំង ហ្កេកអា៊វ ហៅឌុច នឹងមិនត្រូវប្រែប្រួលដែលនាំឱ្យប៉ះពាល់ដល់ទណ្ឌិតរូបនេះ នៅក្នុងរយៈពេលនៃការជាប់ពន្ធនាគាររបស់គាត់ឡើយ ។ សហព្រះរាជអាជ្ញាក៏បានគិតទុកផងដែរ អំពីការដែលគណៈកម្មាធិការកាកបាទក្រហមអន្តរជាតិ អាចចុះទៅធ្វើការត្រួតពិនិត្យពន្ធនាគារនានា ជាទៀងទាត់នៅក្នុងទូទាំងប្រទេសកម្ពុជា ដែលក្នុងនោះរួមមានពន្ធនាគារខេត្តកណ្តាលផងដែរ ។
យោងចំណារចុះថ្ងៃទី២៨ ខែឧសភា ឆ្នាំ២០១៣ របស់លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ យល់ព្រមក្នុងការសម្របសម្រួលបញ្ជូន កាំង ហ្កេកអា៊វ ហៅឌុច ពីមន្ទីរឃុំឃាំង អ.វ.ត.ក ទៅកាន់ពន្ធនាគារខេត្តកណ្តាល ។ នៅថ្ងៃទី៦ មិថុនា ឆ្នាំ២០១៣ កាំង ហ្កេកអា៊វ ហៅឌុច ត្រូវបានបញ្ជូនទៅកាន់ពន្ធនាគារខេត្តកណ្តាល ដើម្បីអនុវត្តទោសជាប់ពន្ធនាគារដែលនៅសល់របស់គាត់ពីថ្ងៃនេះតទៅ គឺទោសអស់មួយជីវិត ៕
ចែករំលែកព័តមាននេះ