ខេត្តព្រះសីហនុ ៖ ដោយសារតែឆ្នេរសមុទ្រខ្មែរមានទេសភាពដ៏ស្រស់ត្រកាលគួរឱ្យចង់គយគន់នោះ វាបានក្លាយជាមន្តស្នេហ៍ក្នុងការទាក់ទាញភ្ញៀវអន្តរជាតិឱ្យមកទស្សនាយ៉ាងច្រើនបំផុតនៅប្រទេសកម្ពុជា ។ ជាក់ស្តែងកាលពីព្រឹកថ្ងៃទី៣១ ឧសភា កន្លងមកថ្មីៗនេះ នាវាទេសចរណ៍ឈ្មោះ DAWN PRINCESS សញ្ជាតិ BERMUDA ដែលដឹកភ្ញៀវចំនួន១.៩៦០នាក់ មាន១៩សញ្ជាតិ
ខេត្តព្រះសីហនុ ៖ ដោយសារតែឆ្នេរសមុទ្រខ្មែរមានទេសភាពដ៏ស្រស់ត្រកាលគួរឱ្យចង់គយគន់នោះ វាបានក្លាយជាមន្តស្នេហ៍ក្នុងការទាក់ទាញភ្ញៀវអន្តរជាតិឱ្យមកទស្សនាយ៉ាងច្រើនបំផុតនៅប្រទេសកម្ពុជា ។ ជាក់ស្តែងកាលពីព្រឹកថ្ងៃទី៣១ ឧសភា កន្លងមកថ្មីៗនេះ នាវាទេសចរណ៍ឈ្មោះ DAWN PRINCESS សញ្ជាតិ BERMUDA ដែលដឹកភ្ញៀវចំនួន១.៩៦០នាក់ មាន១៩សញ្ជាតិផ្សេងៗគ្នា បានចូលមកចតរយៈពេល១ថ្ងៃ ដើម្បីឱ្យភ្ញៀវទេសចរបានដើរកម្សាន្តនៅតាមរមណីយដ្ឋាននានា និងតាមតំបន់ឆ្នេរសមុទ្រក្នុងខេត្តព្រះសីហនុ ដើម្បីឈ្វេងយល់អំពីសក្តានុពលដ៏ស្រស់ត្រកាលពីធម្មជាតិពិតៗ ជាពិសេស ឆ្នេរសមុទ្រដ៏ស្រស់ស្អាតនៃទឹកដីខេត្តព្រះសីហនុ ក៏ដូចជាឆ្នេរសមុទ្ររបស់ព្រះរាជាណាចក្រកម្ពុជា ដែលត្រូវបានប្រកាសទទួលស្គាល់ និងដាក់បញ្ចូលជាសមាជិកក្លិបឆ្នេរដ៏ស្រស់ស្អាតជាងគេនៅលើពិភពលោក និងត្រូវបានប្រសិទ្ធនាមថា «តារារះនាទិសនិរតី»។
ជាមួយនឹងការអភិវឌ្ឍលើវិស័យេហដ្ឋារចនាសម្ព័ន្ធនានានៅក្នុងខេត្តព្រះសីហនុដែលអាជ្ញាធរបានរៀបចំឡើងឱ្យមានការរីកចម្រើនលើគ្រប់វិស័យ ជាពិសេស គឺការប្រឡងប្រណាំងទីក្រុងស្អាត ។ កត្តាទាំងនេះហើយដែលអាចទាក់ទាញភ្ញៀវទេសចរឱ្យចូលមកកម្សាន្តកាន់តែមានចំនួនកើនឡើងពីមួយឆ្នាំទៅមួយឆ្នាំជាបន្តបន្ទាប់ ។
លោកវរសេនីយ៍ទោ ស៊ាង ឡេង នាយនគរបាលអន្តោប្រវេសន៍ច្រកទ្វារកំពង់ផែអន្តរជាតិខេត្តព្រះសីហនុបានឱ្យដឹងថា បើតួលេខភ្ញៀវទេសចរចូលមកតាមនាវាដែលបានបំពេញបែបបទឯកសារឆ្លងដែន (VISA) គិតពីខែមករា ដល់ខែឧសភា ឆ្នាំ២០១៣ ភ្ញៀវទេសចរមានចំនួន ១០.២០០នាក់។ លោកបានបន្តទៀតថា ដោយទទួលបានការណែនាំ ក៏ដូចជាការអនុវត្តទៅតាមបទបញ្ជារបស់លោកនាយឧត្តមសេនីយ៍អគ្គស្នងការនគរបាលជាតិក្នុងការបំពេញកាតព្វកិច្ចជានគរបាលអន្តោប្រវេសន៍ គឺត្រូវខិតខំត្រួតពិនិត្យ និងសម្រួលទៅលើលិខិតបទដ្ឋាននានាដែលទាក់ទងនឹងការធ្វើដំណើររបស់ភ្ញៀវទេសចរអន្តរជាតិ ដោយធ្វើយ៉ាងណាជួយសម្រួលឱ្យបានទាន់ពេលវេលា មិនឱ្យភ្ញៀវទេសចរកកស្ទះ ឬមានការធុញទ្រាន់មកលើស្ថាប័នជំនាញ និងបង្កលក្ខណៈងាយស្រួលធ្វើឱ្យភ្ញៀវទេសចរដែលបានមកកម្សាន្តម្តងហើយ ចង់មកម្តងទៀត ស្របទៅតាមយុទ្ធសាស្ត្រចតុកោណរបស់រាជរដ្ឋាភិបាលក្នុងការទំនាក់ទំនងបង្កើនសេដ្ឋកិច្ចជាតិតាមបែបយុទ្ធសាស្រ្តបើកចំហជើងមេឃ ដែលជាការរួមចំណែកលើកស្ទួយជីវភាពរស់នៅរបស់ប្រជាពលរដ្ឋឱ្យកាន់តែបានល្អប្រសើរ ឡើង ។លោកបានបញ្ជាក់ទៀតថា នាវាខាងលើនេះ នឹងមានគម្រោងចូលចតកំពង់ផែខេត្តព្រះសីហនុនៅខែសីហា ឆ្នាំ២០១៣ ខាងមុខនេះបន្តទៀត៕
ចែករំលែកព័តមាននេះ