រាជធានីភ្នំពេញ ៖ មានការចាប់អារម្មណ៍តាំងពីវគ្គដំបូងបំផុតថា សមត្ថភាពទេពកោសល្យរបស់កុមារា រ៉េត រ៉ែន មកពីខត្តត្បូងឃ្មុំ ដោយសារតែកុមារារូបនេះមានសំឡេងច្រៀង២បែប ហើយពីរោះកប់មិនទើសចិត្តអ្នកស្តាប់ឡើយ សំឡេងស្រីក៏ល្អ ប្រុសក៏ច្រៀងបានក្រលួច។
កុមារារូបនេះបានឆក់ចិត្តគណៈកម្មាការទាំង៣ឲ្យចុចប៊ូតុងដណ្តើមគ្នាយក ក្រោយពេលច្រៀងបទចម្រៀងសម័យដើម «នឹកភូមិភ្នំធំ» ធ្វើឲ្យគ្រូបង្វឹកហួសចិត្តនឹងសំឡេងស្រីដ៏មានទឹកដមពិបាករកណាស់។ ចាប់តាំងពីវគ្គទី១ផ្តើមចេញពីបទចម្រៀងសម័យដើមនោះមក រ៉េត រ៉ែន បានវិវត្តន៍ខ្លួន ហើយបានចាប់យក ឱក សុគន្ធកញ្ញា ជាគ្រូបង្វឹក។
ក្លាយជាសិស្សនៅត្រងត្រាប់ជាមួយគ្រូដ៏មានបទពិសោធន៍រ៉េត រ៉ែន ត្រូវបានឱក សុគន្ធកញ្ញា ដុះខាត់ដាក់ចម្រៀងលំបាកៗហើយឲ្យច្រៀងបទប្រុសពេញលេញ លក្ខណៈអារម្មណ៍មនោសញ្ចេតនាធ្វើឲ្យកុមារារូបនេះប្រឈម ហើយសំឡេងច្រៀងជាមនុស្សប្រុស រ៉ែនធ្លាប់ប្រើពាក្យដាក់គ្រូថា ទៅមិនរួច។
លុះមានការលើកទឹកចិត្តពីគ្រូ រ៉េត រ៉ែន បានកែប្រែសមត្ថភាពល្អឡើងនៅលើឆាកតាំងពីចូលវគ្គខ្វែងគ្នារហូតសុគន្ធកញ្ញា ជ្រើសរើសចូលទៅកាន់វគ្គផ្សាយបន្តផ្ទាល់។ ឆ្លងកាត់វគ្គផ្សាយបន្តផ្ទាល់៣សប្តាហ៍ មាន២សប្តាហ៍រ៉េត រ៉ែន មហាជនបោះឆ្នោតឲ្យជាប់នឹង១សប្តាហ៍ ហើយឱក សុគន្ធកញ្ញា Save យកបានន័យថា សុគន្ធកញ្ញាដូចជាដឹងថា រ៉ែន ជាក្មេងប្រុសមានសំឡេងពិបាករក។
យ៉ាងណាមិញយប់មិញជាវគ្គពាក់កណ្តាលផ្តាច់ព្រ័ត្រ រើសយកអ្នកពូកែ២នាក់ចូលទៅកាន់វគ្គចុងក្រោយជាវគ្គលើកពាននាអាទិត្យក្រោយ ថ្ងៃទី៩ វិច្ឆិកា ខាងមុខនេះ។ ក្នុងក្រុមកញ្ញា មាន៤រូបប្រកួតជម្រុះយក២ ក្នុងនោះរួមមានកុមារី រិទ្ធ សូនីតា កុមារាឆេង ប្រសិទ្ធ កុមារា ទេព ប្រសិទ្ធ និងរ៉េត រ៉ែន។
កាន់តែអស្ចារ្យ រ៉េត រ៉ែន បែរជាច្រៀងបទស្រីជាប្រភេទបទសម័យដើម គឺបទ «រលកដួងចិត្ត» ជាបទដ៏តឹងមានអឺនមិនងាយច្រៀងនោះទេ ជាពិសេសកន្លែងបន្ទរ ហើយកម្រមានតារាចម្រៀងស្រីអាជីពលើកមកច្រៀង។ ប៉ុន្តែ រ៉េត រ៉ែន បែរជាច្រៀងទៅយ៉ាងរលូន ឡើងព្រឺសម្បុរ ទះដៃដាច់ប្រាវពេញវេទិកា ហើយមើលទៅលោកព្រាប សុវត្ថិវិញ អង្គុយតែញញឹមហួសចិត្តនឹងសំឡេងច្រៀងបែបមនុស្សស្រីមិនដឹងមកពីណាពីរោះខ្លាំង។
នៅទីបំផុត រ៉េត រ៉ែន ដែលរៀនថ្នាក់ទី៩ ក៏ត្រូវទស្សនិកជនផ្ញើសាបោះឆ្នោតឲ្យជាប់ចូលដល់វគ្គផ្តាច់ព្រ័ត្រអរឡើងមិននឹកស្មាន។ លទ្ធផលនោះគេកាន់តែគិតថា តិចរដូលកាលទី២នេះ រ៉េត រ៉ែន លើកពានទៅបើសំឡេងច្រៀងត្រូវក្បួនស្រីក៏បាន ប្រុសក៏ល្អពិតជាកម្ររក។ ទាំងនេះជាការសន្និដ្ឋានយ៉ាងណាក៏ដោយ មានតែរង់ចាំតាមដាននៅអាទិត្យចុងក្រោយទាំងអស់គ្នាទើបដឹង។
តោះមកវិភាគ និងស្តាប់កម្សាន្តបទ «រលកដួងចិត្ត» ច្រៀងពេលប្រឡងរបស់ រ៉េត រ៉ែន មានភាពពិសេស និងពីរោះបែបណា ៖ (វីដេអូដកស្រង់ចេញពី ៖ Sivtai)
https://www.youtube.com/watch?v=IVrEZ-7v6nI&feature=share&fbclid=IwAR0aOqNkkC40Z_wttMsGdzIClp2ajpnwNvzTaA0krlHdR0BRpy_SyemMJNs
វីដេអូប្រកាសលទ្ធផលត្រៀមចូលវគ្គផ្តាច់ព្រ័ត្រលើកពានThe Voices kids រដូលកាលទី២ (ដកស្រង់ចេញពី ៖ MY Khmer)
https://www.youtube.com/watch?v=E7q5tl7jcwo&feature=share&fbclid=IwAR2E1S92vtSgYLCkV7wH5KWhKrjo630ogNrmsCNdErpvTiGVH8-AocVfdxQ
ចែករំលែកព័តមាននេះ