រាជធានីភ្នំពេញ ៖ ថ្លែងក្នុងវគ្គបណ្ដុះបណ្ដាលស្ដីពីហានិភ័យនៃការបើកបរដោយមិនពាក់មួកសុវត្ថិភាព និងការបើកបរក្រោមឥទ្ធិពលនៃជាតិស្រវឹងនៅសណ្ឋាគារភ្នំពេញ នាថ្ងៃទី៦ មិថុនានេះ លោកជំទាវ ពុំ ចន្ធីនី អគ្គលេខាធិការកាកបាទក្រហមកម្ពុជាមានប្រសាសន៍ថា តាមរយៈរបាយការណ៍បណ្ដោះអាសន្នពីប្រព័ន្ធព័ត៌មានជនរងគ្រោះ និងគ្រោះថ្នាក់ចរាចរណ៍ផ្លូវគោកកម្ពុជាបង្ហាញថា នៅឆ្នាំ២០១២កន្លងទៅចំនួនអ្នករងគ្រោះដោយគ្រោះថ្នាក់ចរាចរណ៍ក្នុងប្រទេសកម្ពុជាសរុបចំនួន១៥.៦៦០នាក់ ដែលក្នុងនោះអ្នកស្លាប់មានចំនួនរហូតដល់១.៩៦៦នាក់ កើនឡើងច្រើនជាងឆ្នាំ២០១១ ដែលមានអ្នកស្លាប់ចំនួន១.៩០៥នាក់ ។ តួលេខនេះច្រើនជាងចំនួនស្លាប់ដោយជំងឺអេដស៍ និងដោយសារគ្រាប់មីនក្រោយសង្គ្រាមទៅទៀត ។
លោកជំទាវបន្ដថា បើយើងពិនិត្យមើលតួលេខជាក់ស្ដែងក្នុងរយៈពេល៧ឆ្នាំកន្លងមកចំនួនអ្នកស្លាប់កើនឡើងស្ទើរទ្វេដង នៅពេលដែលចំនួនប្រជាពលរដ្ឋសរុបកើនឡើងត្រឹម១០%ប៉ុណ្ណោះ ។ លោកជំទាវបញ្ជាក់ថា ចាប់តាំងពីឆ្នាំ២០០៤ រហូតដល់បច្ចុប្បន្ន គ្រោះថ្នាក់ចរាចរណ៍ក្លាយជាវិញ្ញាសាដ៏សំខាន់មួយរបស់រាជរដ្ឋាភិបាល រហូតត្រូវបានរាជរដ្ឋាភិបាលចាត់ទុកគ្រោះថ្នាក់នេះថាជាមហន្ដរាយដ៏ចម្បងរបស់ប្រទេសកម្ពុជា ។ ជាក់ស្ដែងនៅឆ្នាំ២០១២កន្លងទៅ តាមរបាយការណ៍បណ្ដោះអាសន្នពីប្រព័ន្ធព័ត៌មានជនរងគ្រោះ និងគ្រោះថ្នាក់ចរាចរណ៍ បើគិតជាមធ្យមរាល់ថ្ងៃមានប្រជាពលរដ្ឋកម្ពុជាច្រើនជាង៥នាក់ស្លាប់ និងប្រមាណជា១៥នាក់រងរបួសធ្ងន់ និងពិការដែលតួលេខនេះស្ថិតក្នុងកម្រិតខ្ពស់គួរឱ្យព្រួយបារម្ភ ហើយយើងហៅថាជាគ្រោះមហន្ដរាយមួយរបស់ប្រទេសយើង ។
លោកជំទាវ ពុំ ចន្ធីនី បញ្ជាក់ថា ដោយមើលឃើញពីស្ថានភាពគ្រោះថ្នាក់ចរាចរណ៍ជារៀងរាល់ឆ្នាំ និងដើម្បីឆ្លើយតបនឹងស្ថានភាពគ្រោះថ្នាក់ចរាចរណ៍ ដែលនៅតែមានភាពប្រឈមធ្ងន់ធ្ងរ ព្រមទាំងជំរុញការផ្សព្វផ្សាយឱ្យកាន់តែទូលំទូលាយ ទៅដល់ថ្នាក់មូលដ្ឋានពាក់ព័ន្ធនឹងហានិភ័យនៃការបើកបរ ដោយមិនពាក់មួកសុវត្ថិភាព និងការបើកបរក្រោមឥទ្ធិពលនៃជាតិស្រវឹង តាមរយៈការគាំទ្រពីអង្គការសុវត្ថិភាពចរាចរណ៍ផ្លូវគោកសាកល កាកបាទក្រហមកម្ពុជាបានបង្កើតគម្រោងថ្មីមួយទៀត គឺបណ្ដុះបណ្ដាលគ្រូបង្គោលចាប់តាំងពីឆ្នាំ២០១២មកទល់បច្ចុប្បន្ននេះ ក្នុងគោលបំណងពង្រឹងសមត្ថភាពដល់មន្ដ្រី បុគ្គលិក ទីប្រឹក្សាយុវជន យុវជន និងអ្នកស្ម័គ្រចិត្ដកាកបាទក្រហមកម្ពុជា ដោយចូលរួមសហការជាមួយគណៈកម្មាធិការជាតិសុវត្ថិភាពចរាចរណ៍ផ្លូវគោកក្រសួងមហាផ្ទៃ និងដៃគូពាក់ព័ន្ធនានា ដែលគម្រោងនេះកាលពីឆ្នាំ២០១២ បានអនុវត្ដន៍នៅតាមសាខាកាកបាទក្រហមកម្ពុជាចំនួន៦ និងបានបន្ដពង្រីកបន្ថែមចំនួន៧សាខាផ្សេងទៀត សរុបរួមក្នុងឆ្នាំ២០១៣នេះ យើងនឹងអនុវត្ដន៍បានចំនួន១៣សាខា ៕
ចែករំលែកព័តមាននេះ