រាជធានីភ្នំពេញ ៖ ជនសង្ស័យម្នាក់ក្នុងចំណោមបក្ខពួកពីរនាក់បានលេបថ្នាំញៀនមួយកញ្ចប់ចូលទៅក្នុង ពោះ បន្ទាប់ពីឃើញកម្លាំងមានសមត្ថកិច្ចខណ្ឌទួលគោក កំពុងដាក់គោលដៅត្រួតពិនិត្យអាវុធជាតិផ្ទុះ កាលពីវេលាម៉ោង៩ និង៣០នាទីយប់ ថ្ងៃទី២៩ ខែតុលា…
រាជធានីភ្នំពេញ ៖ ជនសង្ស័យម្នាក់ក្នុងចំណោមបក្ខពួកពីរនាក់បានលេបថ្នាំញៀនមួយកញ្ចប់ចូលទៅក្នុង ពោះ បន្ទាប់ពីឃើញកម្លាំងមានសមត្ថកិច្ចខណ្ឌទួលគោក កំពុងដាក់គោលដៅត្រួតពិនិត្យអាវុធជាតិផ្ទុះ កាលពីវេលាម៉ោង៩ និង៣០នាទីយប់ ថ្ងៃទី២៩ ខែតុលា ឆ្នាំ២០១៨ ត្រង់ចំណុចខាងមុខច្រកចូល ផ្ទះសំណាក់ឈូកទេព តាមបណ្ដោយផ្លូវមុន្នីរ៉េត ស្ថិតក្នុងសង្កាត់ផ្សារដើមគ ខណ្ឌទួលគោក។
ជនសង្ស័យទី១-ឈ្មោះ ប៊ុន សីហា អាយុ៣០ឆ្នាំ មុខរបរមិនពិតប្រាកដ ស្នាក់នៅផ្ទះជួល ក្នុងស្ទឹងមានជ័យទី១ ខណ្ឌមានជ័យ មានស្រុកកំណើតនៅខេត្តពោធិ៍សាត់។ ទី២-ឈ្មោះ ហ៊ុន សុភាព អាយុ២៧ឆ្នាំ មុខជាងធ្វើធ្មេញ ស្នាក់នៅផ្ទះជួលជាមួយគ្នា មានស្រុកកំណើតនៅខេត្តពោធិ៍សាត់។ តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុកម្លាំងពួកគាត់បានដាក់ គោលដៅ ត្រួតពិនិត្យអាវុធជាតិផ្ទុះនៅត្រង់ចំណុចកើតហេតុខាងលើ។
លុះដល់វេលាកើតហេតុ ក៏ស្រាប់តែលេចមុខជនសង្ស័យទាំងពីរនាក់ខាងលើបើកបរម៉ូតូមួយគ្រឿងម៉ាក ហុងដាឌ្រីម ស៊េរី០១១ ពណ៌ខ្មៅ ធ្វើដំណើរតាមបណ្តោយផ្លូវព្រះមុន្នីរ៉េត ក្នុងទិសដៅពីកើតទៅលិច។ លុះមកដល់ក្បែរនឹង គោលដៅត្រួតខាងលើ ពេលនោះជនសង្ស័យទាំងពីរខាងលើ ក៏បានឈប់ម៉ូតូ។ បន្ទាប់មកជនសង្ស័យឈ្មោះ ប៊ុន សីហា ដែលជាអ្នកអង្គុយខាងក្រោយបានយកថ្នាំញៀនមួយកញ្ចប់ ដាក់ចូលទៅក្នុងមាត់ ហើយក៏ត្រូវកម្លាំងសមត្ថកិច្ចឃើញ។
ភ្លាមនោះខណៈពេលដែលសមត្ថកិច្ច ដើរត្រួតពិនិត្យ បែរជាជនសង្ស័យរូបនោះបានលេបថ្នាំញៀនចូលទៅក្នុងពោះបាត់ហើយ រួចសមត្ថកិច្ចក៏បានធ្វើការឃាត់ខ្លួនតែម្តង។ ក្រោយពេលកើតហេតុជនសង្ស័យទាំងពីរនាក់រួមទាំងវត្ថុតាងត្រូវបានសមត្ថកិច្ចនាំខ្លួនយកទៅសាកសួរនាំ និងឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌទួលគោក រង់ចាំធ្វើការចាត់បន្តតាមនីតិវិធី៕
ចែករំលែកព័តមាននេះ