ខេត្តស្ទឹងត្រែង ៖ រថយន្តដឹកឈើប្រណីតប្រភេទធ្នង់ចំនួន២គ្រឿងក្នុងចំណោមរថយន្ត៣គ្រឿងត្រូវកម្លាំងនគរបាលចរាចរណ៍ជើងគោកស្ទាក់ចាប់ខណៈកំពុងចរាចរលើកំណាត់ផ្លូវជាតិលេខ៩ កាលពីម៉ោង២០និង៤៥នាទីយប់ ថ្ងៃទី២៥ ខែតុលា ឆ្នាំ២០១៨ ត្រង់ចំណុចបារ៉ាស់ត្រួតពិនិត្យ ស្ថិតក្នុងភូមិស្រឡៅ ឃុំអន្លង់ជ្រៃ ស្រុកថាឡាបរិវ៉ាត់ ខេត្តស្ទឹងត្រែង។
ករណីស្ទាក់ចាប់រថយន្តខាងលើត្រូវសមត្ថកិច្ចប្រាប់អោយដឹងថារថយន្តផ្ទុកបទល្មើសជាក់ស្តែងចំនួន៣គ្រឿង ជាប្រភេទរថយន្តកាម៉ារីគូថប៉ោងចេញពីខេត្តព្រះវិហារ ឆ្ពោះមកកាន់ខេត្តស្ទឹងត្រែង និងអាចបន្តឆ្ពោះទៅប្រទេសវៀតណាមតែ លុះមកដល់ចំណុចបារ៉ាស់ត្រួតពិនិត្យក៏ត្រូវកម្លាំងប៉ូលិសចរាចរណ៍ឃាត់ចាប់ចំនួន២គ្រឿងភ្លាមៗនៅហ្នឹងកន្លែងឯមួយគ្រឿងទៀតបើករត់គេចខ្លួនបន្ទាប់ហេតុការណ៍កើតឡើង។
ក្រោយការឃាត់ចាប់រថយន្តទាំងខាងលើ ស្រាប់តែមានរឿងគួរអោយភ្ញាក់ផ្អើល ដោយសារស្ត្រីម្នាក់អះអាងថាជាម្ចាស់រថយន្តស្រក់ទឹកភ្នែកលើកដៃដើរសំពះអង្វរសមត្ថកិច្ចគ្រប់ផ្នែកនៅទីនោះសុំជួយដោះលែងពួកគាត់ ព្រោះបានបង់លុយរត់ការផ្លូវនៅកន្លែងបារ៉ាស់ត្រួតពិនិត្យនេះរួចរាល់អស់ហើយមុននឹងពួកគាត់ធ្វើដំណើរទៅដឹកឈើចេញពីខេត្តព្រះវិហារ។
ស្ត្រីខាងលើបានបន្តរៀបរាប់បន្តថា បើអាជ្ញាធរខេត្តដាក់កម្លាំងបិទឈើមិនអោយចេញ ចុះហេតុដូចម្តេចក៏កម្លាំងចម្រុះនៅទីនេះ មិនប្រាប់គាត់ បែជាយកលុយគាត់ហើយ ពេលដែលគាត់ដឹកឈើចេញស្រាប់តែចាប់គាត់ទៅវិញ?
ពាក់ព័ន្ធករណីខាងលើនគរបាលចរាចរនៅទីនោះបានបញ្ជាក់ថា លោកធ្វើតាមតួនាទីនិងបទបញ្ជារបស់លោក អូត ស៊ីវុត្ថា ស្នងការរងទទួលផែនចរាចរជើងគោកជំនួសលោកឌៀប ចាន់ធី ដោយមិនអោយប៉ះពាល់លុយកាក់ ស៊ីសំណូកសូកប៉ាន់និងធ្វើបាបកៀបសង្កត់ប្រជាពលរដ្ឋនោះទេ។ចំពោះរឿងនេះ ម្ចាស់ឈើគាត់បានបង់លុយអោយ សមត្ថកិច្ចរូបណាបុគ្គលសមត្ថកិច្ចរូបនោះគួរទទួលខុសត្រូវចុះ។
សូមបញ្ជាក់ថាកម្លាំងចម្រុះចាំត្រួតពិនិត្យបទល្មើសនៅទីនោះរួមមានមានកម្លាំងជំនាញរដ្ឋបាលព្រៃឈើជាប្រធាន កម្លាំងស្នងការនគរបាលខេត្ត កម្លាំងយោធា កម្លាំងអាវុធហត្ថនិង កម្លាំងនគរបាលចរាចរដែលសរុបប្រមាណជាជិត២០នាក់ ប៉ុន្តែមានតែបុគ្គល២ទៅ៣នាក់ប៉ុណ្ណោះដែលបានយកលុយពីប្រព្រឹត្តបទល្មើសលុះចេញដំណើរបែរឃាត់ចាប់ជាក្រោយ។
តាមបទបញ្ជារបស់ប្រធានគណបញ្ជាការឯកភាពខេត្តដែលមានលោក ម៉ុម សារឿន ជាប្រធានបានអនុ
ញ្ញាតអោយដាក់ប៉ុស្តិ៍ត្រួតពិនិត្យបទល្មើសផ្សេងៗ ជាពិសេសបទល្មើសព្រៃឈើ ចំនួនបីកន្លែងសំខាន់ៗទី១លើកំណាត់ផ្លូវជាតិលេខ៩ពីស្ទឹងត្រែងទៅខេត្តព្រះវិហារ ត្រង់ចំណុចអូរចង្ហារ ទី២លើផ្លូវជាតិលេខ៧៨ ពីស្ទឹងត្រែងទៅខេត្តរតនគិរី ត្រង់ ចំណុចក្បែស្ពានស្រែពក និងទី៣-លើផ្លូវជាតិលេខ៧ ពីស្ទឹងត្រែងទៅខេត្តក្រចេះត្រង់ភ្នំក្រហមលើផ្លូវអូរពងមាន់។
ជាការកត់សំគាល់ បន្ទាប់ពីការដាក់ប៉ុស្តិ៍ត្រួតពិនិត្យបទល្មើសមួយចំនួនជាពិសេសបទល្មើសព្រៃឈើមានការថយចុះគួរអោយកត់សំគាល់ បើទោះណាជានៅមានការឃុបឃិតលួចអោយចេញបែបណានីមួយៗនោះក៏ដោយ៕
ចែករំលែកព័តមាននេះ