ខណៈនេះលោកកាំង ហ្គិចអ៊ាង ហៅឌុចអតីតមេខ្មែក្រហមកំពុងសង្គ្រោះបន្ទាន់
- កណ្តាល
ខេត្តកណ្តាល ៖ លោក កាំង ហ្គិចអ៊ាង ហៅឌុច អតីតមេខ្មែក្រហម និងជាប្រធានគុកទួលស្លែងក្នុងរបបខ្មែរក្រហមមកដល់ល្ងាច ថ្ងៃទី២៥ ខែតុលា…
ខេត្តកណ្តាល ៖ លោក កាំង ហ្គិចអ៊ាង ហៅឌុច អតីតមេខ្មែក្រហម និងជាប្រធានគុកទួលស្លែងក្នុងរបបខ្មែរក្រហមមកដល់ល្ងាច ថ្ងៃទី២៥ ខែតុលា…
ខេត្តកណ្តាល ៖ លោក កាំង ហ្គិចអ៊ាង ហៅឌុច អតីតមេខ្មែក្រហម និងជាប្រធានគុកទួលស្លែងក្នុងរបបខ្មែរក្រហមមកដល់ល្ងាច ថ្ងៃទី២៥ ខែតុលា ឆ្នាំ២០១៨ កំពុងស្ថិតនៅក្នុងបន្ទប់សង្គ្រោះបន្ទាន់នៃមន្ទីរពេទ្យមិត្តភាពកម្ពុជាសូវៀត ហៅពេទ្យរុស្សី រាជធានីភ្នំពេញ ។
ក្រុមគ្រូពេទ្យកំពុងធ្វើការតាមដាន តែអ្នកជំងឺ(ឌុច) បានហាមដាច់ខាតមិនឲ្យផ្តល់ដំណឹងដល់ក្រុមគ្រួសាររបស់គាត់ឡើយ បើទោះបីមានការសម្របសម្រួលពីតំណាងអយ្យការសាលាដំបូងខេត្តកណ្តាលក៏ដោយ ។
ឪនេះបើតាមការបញ្ជាក់របស់លោកចាត ស៊ីនាង ប្រធានពន្ធនាគារខេត្តកណ្តាលឲ្យដឹងនៅល្ងាច ថ្ងៃទី២៥ ខែតុលា ឆ្នាំ២០១៨នេះ ។ លោកចាត ស៊ីនាង បញ្ជាក់ថា កាលពីថ្ងៃទី២០ ខែតុលានេះ លោកកាំង ហ្គិចអ៊ាង មានអាការៈហត់ (ថប់ដង្ហើម) ហើយពេទ្យរបស់គាត់(កាំងហ្គិចអ៊ាង) បានស្នើសុំបញ្ជូនទៅមន្ទីរពេទ្យជ័យជំនះ ។ ដោយនៅថ្ងៃទី២១ ខែតុលា រូបលោកចាត់ ស៊ីនាង) និងលោកឯក ស៊ុន រស្មី ព្រះរាជអាជ្ញារងអមសាលាដំបូងខេត្តកណ្តាល និងក្រុមគ្រូពេទ្យមន្ទីរពេទ្យជ័យជំនះ បានសម្រេចបញ្ជូនគាត់ទៅមន្ទីរពេទ្យរុស្ស៊ីរហូតមកដល់ថ្ងៃទី២៥ ខែតុលា គាត់កំពុងតែសម្រាកព្យាបាលនៅបន្ទប់សង្គ្រោះបន្ទាន់នៅមន្ទីរពេទ្យរុស្ស៊ី ហើយក្រុមគ្រូពេទ្យកំពុងតាមដាន ។
លោកបានបញ្ជាក់ថា ឥឡូវនេះបញ្ជូនដាក់នៅក្នុងបន្ទប់ដាក់អ៊ុកស៊ីហ្សែនដោយឡែកតែឯង ។ ប្រធានពន្ធនាគារខេត្តកណ្តាលបានបន្តថា ចំពោះបញ្ហាការពារសន្តិសុខ គឺលោកបានស្នើសុំទៅអគ្គនាយកដ្ឋានពន្ធនាគារ ដើម្បីចាត់ទាំងកម្លាំងនាយកដ្ឋានសន្តិសុខមកសហការជាមួយកម្លាំងពន្ធនាគារ ដើម្បីជួយការពារសន្តិសុខពីព្រោះ វាផុតពីសមត្ថកិច្ចរបស់ខាងខេត្ត ។ លោក កាំង ហ្គិចអ៊ាង ហៅឌុច បានផ្ទេរពីពន្ធនាគាររបស់សាលាក្តីខ្មែរក្រហម នៅថ្ងៃទី៦ ខែមិថុនា ឆ្នាំ២០១៣ ទៅកាន់ពន្ធនាគារខេត្តកណ្តាលក្រោយពីការប្រកាសសាលដីការបស់អង្គជំនុំជម្រះសាលាក្តីខ្មែរក្រហមនៅថ្ងៃទី០៣ ខែកុម្ភៈ ឆ្នាំ២០១២ ។
បើតាមអ្នកនាំពាក្យសាលាក្តីខ្មែរក្រហមបានប្រាប់ប្រព័ន្ធសារព័ត៌មានឲ្យដឹងថា លោកកាំង ហ្គិចអ៊ាង ហៅឌុច ត្រូវបានកាត់ទោសពីបទឧក្រិដ្ឋកម្មប្រឆាំង និងមនុស្សជាតិ និងឧក្រិដ្ឋកម្មសង្គ្រាមពាក់ព័ន្ធជាមួយ និងតួនាទីរបស់គាត់ជាប្រធានគុកទួលស្លែងដែលគុកទួលស្លែងនេះ គឺជាកន្លែងគុកសម្ងាត់ដែលស្និទ្ធទៅនឹងបក្សកុម្មុយនីស្តកម្ពុជា ហើយត្រូវបានគេដឹងថា មានមនុស្សយ៉ាងហោចណាស់១៥០០០នាក់ ដែលត្រូវបានចាប់ខ្លួនឃុំបញ្ជូនទៅមន្ទីរសន្តិសុខស-២១ ដើម្បីធ្វើការសួរចម្លើយ និងយកទៅសម្លាប់ចោលនៅក្នុងរបបខ្មែរក្រហមពីថ្ងៃទី១៧ មេសា ១៩៧៥ ដល់ថ្ងៃទី៦ មេសា ១៩៧៩ ។
តាមសាលដីការបស់អង្គជំនុំជម្រះតុលាការកំពូលដែលចេញនៅថ្ងៃទី០៣ ខែកុម្ភៈ ឆ្នាំ២០១២ គឺបានសម្រេចផ្តន្ទាទោសលោកកាំង ហ្គិចអ៊ាង ហៅឌុច ដាក់ពន្ធនាគារអស់មួយជីវិតពីបទឧក្រិដ្ឋកម្មប្រឆាំង និងមនុស្សជាតិ និងឧក្រិដ្ឋសង្គ្រាម ៕
ចែករំលែកព័តមាននេះ