រាជធានីភ្នំពេញ ៖ បុរសកម្មករសំណង់ម្នាក់ជិះបុកម៉ូតូស្ត្រី២នាក់ បណ្តាលឲ្យរងរបួសធ្ងន់ម្នាក់ និងស្រាលម្នាក់ ហើយមិនព្រមដោះស្រាយ បែរជាហៅបក្សពួកមកវាយគំរាមយកម៉ូតូចេញពីកន្លែងកើតហេតុ ហេតុការណ៍នេះបង្កឱ្យមានការភ្ញាក់ផ្អើលកាលពីម៉ោង៧និង៣០នាទីយប់ថ្ងៃទី២៤ ខែតុលា ឆ្នាំ២០១៨ នៅតាមបណ្ដោយផ្លូវបេតុង ស្ថិតក្នុងភូមិប្រាសាទ សង្កាត់ស្នោរ ខណ្ឌពោធិ៍សែនជ័យ ។
ជនរងគ្រោះខាងលើមានគ្នា២នាក់ជាម្តាយ និងកូនស្រី ជិះម៉ូតូម៉ាកគប់៧០ ពណ៌ខៀវខ្ចី ចេញពីមន្ទីរពេទ្យឆ្ពោះទៅផ្ទះក្នុងទិសដៅពីជើងទៅត្បូង ហើយបត់ឆ្វេង ចំណែកជនបង្កជិះម៉ូតូម៉ាកហុងដាឌ្រីម ស៊េរី២០១៨ ពណ៌ខ្មៅ មិនចាំស្លាកលេខ ដោយជិះម្នាក់ឯងរត់បាត់ ។
តាមប្រភពពីស្ត្រីជាម្តាយរងរបួសស្រាលនិយាយប្រាប់ថា នៅមុនកើតហេតុ រូបគាត់ឌុបកូនស្រីរបស់គាត់ចេញពីមន្ទីរពេទ្យឯកជនពីភូមិស្រែតេជះមកផ្ទះវិញក្នុងទិសដៅពីជើងទៅត្បូង ចំណែកម៉ូតូជនបង្កជិះស្របគ្នា។ ខណៈនោះម៉ូតូគាត់បានស៊ីញ៉ូបត់ឆ្វេង ស្រាប់តែម៉ូតូជនបង្កមកបុកពីក្រោយ បណ្តាលឱ្យកូនស្រីរបស់គាត់របួសធ្ងន់ និងរូបគាត់ជាម្តាយរបួសស្រាល ។
ប្រភពព័ត៌មានបន្តទៀតថា ខណៈពេលគ្រោះថ្នាក់ភ្លាមៗ ភាគីរងគ្រោះ និងប្រជាពលរដ្ឋបានឃាត់ម៉ូតូជនបង្កខាងលើដើម្បីដោះស្រាយ បន្ទាប់មកភាគីបង្កនោះបានទៅហៅបក្សពួកជាកម្មករដូចគ្នាប្រមាណជិត១០នាក់មកគំរាម និងយកដុំថ្មគប់ភាគីរងគ្រោះ និងប្រជាពលរដ្ឋឱ្យរងរបួស២នាក់ទៀត ហើយយកម៉ូតូចេញពីកន្លែងកើតទៅបាត់ ។
ប្រជាពលរដ្ឋនៅកន្លែងកើតហេតុបញ្ជាក់ទៀតថា ជនបង្កខាងលើនោះ គ្រាន់តែដឹងថា ពួកគេស្នាក់នៅក្នុងការដ្ឋានសំណង់ជិតកន្លែងកើតហេតុផងដែរ បន្ទាប់មកភាគីរងគ្រោះទៅប្តឹងសមត្ថកិច្ចភ្លាមៗ ពេលដឹងដល់លោកអធិការខណ្ឌពោធិ៍សែនជ័យបានបញ្ជាកម្លាំង ព្រមទាំងកម្លាំងអន្តរាគមន៍ពិសេសចុះទៅទីតាំងកើតហេតុសហការជាមួយមេភូមិឃាត់ជនបង្កម្នាក់ដែលពួនសំងំក្នុងការដ្ឋានសំណង់ខាងលើ មានកាំបិតនៅខាងក្រោមខ្លួនទៀតផង ចំណែកបក្សពួកផ្សេងទៀតរត់គេចខ្លួនអស់។
ក្រោយពេលកើតហេតុ ជនបង្កខាងលើត្រូវបានកំលាំងអន្តរាគមន៍ខណ្ឌពោធិ៍សែនជ័យឃាត់យកទៅសាកសួរនៅប៉ុស្តិ៍នគរបាលសង្កាត់ស្នោរ ដើម្បីចាត់ការតាមនីតិវិធី ៕
ចែករំលែកព័តមាននេះ