ខេត្តកំពត ៖ លំនៅឋានប្រជាពលរដ្ឋនៅឃុំដងទង់ និងឃុំខ្ជាយខាងជើង ក្នុងស្រុកដងទង់ចំនួន៨៣ខ្នង បានត្រូវខ្យល់កន្រ្តាក់បោកបក់ខ្លះធ្លាក់ចេញពីជើងតាង ខ្លះប៉ើងដំបូលទាំងផ្ទាំង និងខ្លះទៀតដួលរលំបាក់ទាំងស្រុងតែម្តង ។ ហេតុការណ៍នេះបានកើតឡើង ខណៈមានភ្លៀងធ្លាក់ដូចគេហែកមេឃលាយឡំដោយរន្ទះនិងខ្យល់កន្ត្រាក់បោកបក់វាយប្រហារមកលើភូមិសាស្ត្រស្រុកដងទង់ដែលមានឃុំចំនួន២រងគ្រោះធ្ងន់ជាងបណ្តាឃុំនានា កាលពីវេលាម៉ោង៣និង៣០នាទីរសៀលថ្ងៃទី២៩ ឧសភា ។ ប៉ុន្តែអ្វីដែលគួរឱ្យកត់សម្គាល់នោះ គឺផ្ទះបុណ្យសពមួយខណៈកំពុងតែប្រារព្ធពិធីបុណ្យនោះ ស្រាប់តែខ្យល់កន្ត្រាក់បានបំប៉ើងកួចយកដំបូលផ្ទះទៅធ្លាក់រាយប៉ាយនៅលើដី និងបណ្តាលឱ្យមនុស្សរងរបួសធ្ងន់៣នាក់ និងទុកសពនៅកណ្តាលវាលល្ហល្ហេវ ។
តាមបុរសឈ្មោះ ណុប រ៉េត អាយុ៤៣ឆ្នាំ ត្រូវជាប្តីរបស់សពដែលកំពុងធ្វើបុណ្យនេះនៅភូមិខ្ជាយ ឃុំដងទង់បាននិយាយរៀបរាប់ថា នៅវេលាម៉ោងប្រហែលជាង៣រសៀលថ្ងៃទី២៩ ឧសភា នោះ ខណៈគាត់កំពុងធ្វើបុណ្យសពប្រពន្ធ ស្រាប់តែមានភ្លៀងខ្យល់និងរន្ទះធ្វើឱ្យរបើកប៉ើងដំបូលផ្ទះគាត់ទាំងផ្ទាំងទៅធ្លាក់នៅលើដីមុខផ្ទះវិញ ។ ពេលខ្យល់បោកបក់នោះ ប្រជាពលរដ្ឋនៅក្នុងភូមិបានរត់ចេញរៀងៗខ្លួន ចំណែកគាត់បានរត់ទៅឱបគ្របសពប្រពន្ធដែលនៅកណ្តាលវាល ព្រោះតែផ្ទះប៉ើងដំបូងទៅអស់ហើយ ។ ក្នុងខណៈនោះ អ្នកភូមិម្នាក់ឈ្មោះ នាង អ៊ូញ ភេទប្រុស អាយុ៥៤ឆ្នាំ ដែលរត់ចេញពីរោងបុណ្យទៅចាប់ឱបចៅស្រីអាយុ៣ឆ្នាំ ក៏ត្រូវដំបូលផ្ទះហើរទាំងផ្ទាំងមកគ្របពីលើគាត់ជាមួយចៅ បែកក្បាលរបួសធ្ងន់ រីឯចៅស្រីក៏របួសធ្ងន់ដែរ ។ ចំណែកអ្នកភូមិម្នាក់ទៀតឈ្មោះ ទន់ ឌឿន ភេទប្រុស អាយុ៤៨ឆ្នាំ រងរបួសបែកក្បាល ។ អ្នករងរបួសទាំងបីនាក់នេះត្រូវបានគេបញ្ជូនទៅកាន់មន្ទីរពេទ្យខេត្តតាកែវ ។
ទាក់ទងនឹងគ្រោះមហន្តរាយនេះ លោកវរសេនីយ៍ត្រី ទូច ឌន អធិការនគរបាលស្រុកដងទង់ បានប្រាប់កោះសន្តិភាពឱ្យដឹងថា ព្យុះភ្លៀងនៅស្រុកដងទង់នេះ បណ្តាលឱ្យខូចខាតផ្ទះប្រជាពលរដ្ឋអស់ចំនួន៨៣ខ្នង ក្នុងនោះ១៣ខ្នង ត្រូវបាក់រលំទាំងស្រុង និងក្រៅពីនោះគ្រាន់តែទ្រេតនិងខ្លះទៀតប៉ើងអស់ដំបូល ។ ក្នុងហេតុការណ៍គ្រោះធម្មជាតិនេះ មានមនុស្ស៣នាក់រងរបួស និងរន្ទះបាញ់ងាប់គោ៤ក្បាល ។ លោកអធិការប្រាប់ថា នៅព្រឹកថ្ងៃទី៣០ ឧសភា កម្លាំងនគរបាលស្រុកជាង៤០នាក់បានចុះជួយប្រក់ដំបូលផ្ទះពលរដ្ឋដែលរងគ្រោះដោយខ្យល់ព្យុះនេះ ។
រីឯនៅស្រុកបន្ទាយមាសវិញក៏មានសេចក្តីរាយការណ៍ថា មានខ្យល់ព្យុះដែរកាលពីរសៀលថ្ងៃទី២៩ ឧសភា នេះ ។ លោកវរសេនីយ៍ត្រី ស្រុ៊ន ឡាំ អធិការនគរបាលស្រុកបន្ទាយមាស បានប្រាប់ឱ្យដឹងថា ផ្ទះប្រជាពលរដ្ឋសរុបចំនួន១៣ខ្នង ដែលក្នុងនោះមាននៅឃុំត្នោតចុងស្រង់ និងឃុំផ្សេងទៀតបានរងការបំផ្លាញដោយខ្យល់កន្ត្រាក់ ។ ជាមួយនេះ ក្មេងប្រុសម្នាក់អាយុ៥ឆ្នាំ ត្រូវផ្ទះរលំសង្កត់ជាប់ទម្រាំយកចេញបានត្រូវចំណាយពេលជាច្រើនម៉ោង ហើយក៏បានស្លាប់ពេលបញ្ជូនទៅដល់មន្ទីរពេទ្យតាកែវ ។ ចំណែកគោ៤ក្បាលក៏បានងាប់ដោយរន្ទះបាញ់ដែរ ៕
ចែករំលែកព័តមាននេះ