ខេត្តកំពង់ចាម ៖ ពិតជាគួរឲ្យរន្ធត់ណាស់ដោយមនុស្សម្នាក់បានស្លាប់ និង២នាក់ទៀតបានរងរបួស ដោយសារតែជិះម៉ូតូលឿនយកចង្កូតមិនទាន់ទៅបុករបងសាលាខេត្ត ស្ថិតនៅភូមិទី៧ សង្កាត់កំពង់ចាម ក្រុងកំពង់ចាម ។ ហេតុការណ៏នេះកើតឡើងនៅវេលាម៉ោង១២និង១០នាទីយប់ រំលងអធ្រាត្រឈានចូលព្រឹកថ្ងៃទី២៣ ខែតុលា ឆ្នាំ២០១៨ អ្នករងគ្រោះត្រូវបញ្ជូនមកសង្គ្រោះនៅមន្ទីរពេទ្យខេត្ត ។
លោកវរសេនីយ៏ត្រី ស៊ាម យូសេង អធិការរងនគរបាលក្រុងកំពង់ចាមទទួលផែនសណ្តាប់ធ្នាប់ប្រាប់ឲ្យដឹងថា អ្នកដែលស្លាប់នៅក្នុងហេតុការណ៏ខាងលើឈ្មោះ ហូ រ៉ូនី ភេទប្រុស អាយុ២៨ឆ្នាំ ខ្មែរអ៊ិស្លាមរស់នៅភូមិរកាលើ សង្កាត់សំបួរមាស ក្រុងកំពង់ចាម ជាអ្នកបើកបរម៉ូតូ និងអ្នករងរបួស២នាក់ទៀតមានគឺឈ្មោះ ស៊ឹម ភារិទ្ធ ភេទប្រុស អាយុ១៧ឆ្នាំ នៅភូមិមៀន ឃុំមៀន ស្រុកព្រៃឈរ របួសស្រាល និងទី២-ឈ្មោះ សីហា ភេទប្រុស អាយុ២០ឆ្នាំ នៅភូមិថ្មគោល ឃុំរអាង ស្រុកកំពង់សៀម របួសធ្ងន់ អ្នកអង្គុយនៅក្រោយគេក្នុងចំណោម៣នាក់ ។
លោកអធិការរងនគរបាលទទួលផែនសណ្តាប់ធ្នាប់ប្រាប់បន្តថា មុនពេលកើតហេតុក្រុមអ្នកជិះម៉ូតូខាងលើគេបានឃើញជិះកាត់តាមផ្លូវមួយចំនួនក្នុងក្រុងកំពង់ចាម ស្របពេលដែលជិះមកដល់ផ្លូវមុខសាលាខេត្តបានប្រើប្រាស់ល្បឿនលឿន ក្នុងស្ថានភាពស្រវឹងហើយយកចង្កូតមិនទាន់ជាហេតុបណ្តាលឲ្យឡើងចិញ្ចើមថ្នល់បុកសសរបេតុងដាក់រូបថត នៅចំហៀងច្រកចូលសាលាខេត្តពេញទំហឹងជាហេតុបណ្តាលឲ្យអ្នកបើកបរម៉ូតូស្លាប់មួយរំពេចតែម្តង ។ បន្ទាប់មកកម្លាំងចរាចរណ៏ក្រុងកំពង់ចាម បានចុះទៅដល់បានហៅរថយន្តសាមុយ មកដឹកយកទៅសង្គ្រោះនៅមន្ទីរពេទ្យខេត្ត ។
ក្រោយពីជំនាញបានធ្វើការវាស់វែងរួចរាល់បានប្រគល់សពឲ្យទៅសាច់ញាតិ ដើម្បីធ្វើបុណ្យតាមប្រពៃណីផងដែរ ។ ក្រុមអ្នកជិះម៉ូតូម៉ាកC 125 ទាំង៣នាក់នោះមិនបានពាក់មួកសុវត្ថិភាពនោះទេ ៕
ចែករំលែកព័តមាននេះ