តាមប្រភពព័ត៌មាន The Sun បានឲ្យដឹងថា វីតាមីនសេ អាចជួយជាប្រយោជន៍ដល់សុខភាពរបស់យើងច្រើនយ៉ាងរាប់ចាប់ពីការពន្យារភាពចាស់ដល់ការពារពីជំងឺលើសសម្ពាធឈាម ជំងឺមហារីក ជំងឺបេះដូង ជំងឺភ្លេចភ្លាំង និងស្នាមជ្រីវជ្រួញ។
យើងគ្រប់គ្នាសុទ្ធតែដឹងថា ផ្លែឈើគឺល្អសម្រាប់សុខភាព។ តែផ្លែឈើដែលល្អបំផុតនោះ គឺជាប្រភេទជូរៗ ដែលរួមមាន ផ្លែក្រូច ផ្លែក្រូចឆ្មា និងផ្លែទំពាំងបាយជូរ។
តាមការលើកឡើងរបស់វេជ្ជបណ្ឌិតឯកទេសអាហាររូបត្ថម្ភ Sarah Brewer និង Juliette Kellow ផ្លែឈើប្រភេទនេះអាចជួយឲ្យយើងនៅតែក្មេង និងមានអាយុវែង។ នៅក្នុងសៀវភៅរបស់ពួកគេ ដែលមានចំណងជើងថា «ទទួលទានល្អ រស់បានយូរ ៖ គួរយល់ពីអ្វីដែលរាងកាយយើងត្រូវការដើម្បីឲ្យមានសុខភាពល្អ» ឬ «Eat Better, Live Longer: Understand What Your Body Needs to Stay Healthy» បានណែនាំឲ្យគ្រប់គ្នាគួរទទួលទានយ៉ាងហោចណាស់ ផ្លែក្រូចមួយផ្លែក្នុងមួយថ្ងៃ។
លោកវេជ្ជបណ្ឌិត Brewer ប្រាប់ព័ត៌មាន The Sun ថា៖ «ផ្លែក្រូចមានផ្ទុកនូវសារធាតុប្រឆាំងអុកស៊ីតកម្ម Polyphenols និងវីតាមីនសេ ដែលអាចជួយការពារកោសិកាពីការខូចខាតដោយសារតែរ៉ាឌីកាល់សេរី»។
លោកបានបន្តថា៖ «វីតាមីនសេ អាចជួយបន្ថយកូឡេស្តេរ៉ល ដោយបម្លែងវាឲ្យទៅជាទឹកប្រម៉ាត់។ សារធាតុប្រឆាំងអុកស៊ីតកម្មជាទូទៅអាចបន្ថយកូឡេស្តេរ៉ល ដោយការពារមិនឲ្យសារធាតុខ្លាញ់ LDL ធ្វើអុកស៊ីតកម្ម ដើម្បីឲ្យវាទៅក្នុងថ្លើមវិញ ហើយមិនអាចទៅក្នុងសរសៃឈាម»។
វេជ្ជបណ្ឌិត Sophie Bertrand លើកឡើងថា៖ «រាងកាយរបស់យើងមិនអាចបង្កើតវីតាមីនសេ ដោយខ្លួនឯងបានទេ ហើយក៏មិនអាចស្តុកទុកបានដែរ។ ដូចនេះវាពិតជាសំខាន់ សម្រាប់យើងក្នុងការបរិភោគអាហារ ដែលសម្បូរវីតាមីនមួយនេះ»។
តើអ្នកបានបរិភោគវាហើយឬនៅ ក្នុងថ្ងៃនេះ?
ចែករំលែកព័តមាននេះ