រាជធានីភ្នំពេញ ៖ នារីម្នាក់បើករថយន្តបុករះផ្ទះប្រជាពលរដ្ឋចំនួន៣ល្វែងធ្វើឲ្យខូចខាតរថយន្ត និងសម្ភារយ៉ាងធ្ងន់ធ្ងរអ្នកបើកបររថយន្តរងរបួសធ្ងន់ បង្កអោយមានការភ្ញាក់ផ្អើលកាលពីវេលាម៉ោង៨និង៣០នាទីយប់ ថ្ងៃទី២១ ខែតុលា ឆ្នាំ២០១៨ នៅតាមបណ្ដោយផ្លូវបេតុង ចំណុចផ្ទះឧត្ដម2ធ្វើស៊ុមរូបថត ដែលស្ថិតនៅភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ ។
រថយន្តបង្កម៉ាកឡង់គ្រីស័រ ពណ៌ស បើកបរដោយនារីម្នាក់ ក្នុងទិសដៅពីកើតទៅលិច រងរបួសធ្ងន់ធ្ងរ សម្ភារខូចខាតរួមមាន ផ្ទះទី១-ផ្ទះលក់ទិញម៉ូតូ ខូចខាតម៉ូតូ ចំនួនមួយគ្រឿងម៉ាកវ៉េវ ពណ៌ខ្មៅ ពាក់ផ្លាកលេខ ភ្នំពេញ 1EX-6744, ផ្ទះទី២-យីហោ ឧត្ដម2 ធ្វើស៊ុមរូបថត ខូចខាតទ្វារចំនួនមួយផ្ទាំង រថយន្តម៉ាកតូយ៉ូតាព្រូសមួយគ្រឿង និងសម្ភារមួយចំនួន និងផ្ទះទី៣-គ្លីនិកឯកជន បែកទូថ្នាំពេទ្យចំនួន១ ។
តាមប្រភពព័ត៌មានពីអ៊ុំប្រុសម្នាក់លក់ទិញម៉ូតូបានអោយដឹងថា នៅមុនពេលកើតហេតុរូបគាត់បានចតម៉ូតូម៉ាកវ៉េវនៅខាងមុខផ្ទះគាត់ហើយកំពុងបិទទ្វារផ្ទះបានពាក់កណ្ដាល ស្រាប់តែឃើញរថយន្តខាងលើបើកក្នុងល្បឿនយ៉ាងលឿនក្នុងទិសដៅពីកើតទៅលិចហើយបានរ៉េចង្កូតមកផ្នែកខាងឆ្វេងសំដៅម៉ូតូរបស់គាត់បុកចំផ្នែកពីក្រោយបណ្តាលឱ្យប៉ើងចូលផ្ទះរងការខូចខាតផ្នែកខាងក្រោយទាំងស្រុង និងបុករះចូលផ្ទះយីហោ ឧត្ដម2ធ្វើស៊ុមរូបថត បណ្តាលឲ្យដាច់ទ្វារ និងបុករថយន្តម៉ាកព្រូសមួយគ្រឿងដែលចតក្នុងផ្ទះរងការខូចខាតយ៉ាងធ្ងន់ធ្ងរ ។
បន្ទាប់មករថយន្តជ្រុលទៅបុកជញ្ជាំងផ្ទះបណ្តាលឲ្យធ្លុះធ្លាយជញ្ជាំងខ្ទាតទៅបុកទូរកញ្ចក់ថ្នាំពេទ្យខូចខាត ចំណែកឯរថយន្តបង្ករងការខូចខាតយ៉ាងធ្ងន់ធ្ងរ ហើយនារីជាអ្នកបើកបររថយន្តបង្កក៏រងរបួសធ្ងន់ធ្ងរដែរ ។
ប្រភពព័ត៌មានបានបន្តទៀតថា ខណៈគ្រោះថ្នាក់ភ្លាមៗស្រាប់តែមានរថយន្តមួយគ្រឿងបើកស្របទិសគ្នាបាននាំនារីរងគ្រោះដែលជាអ្នកបើកបររថយន្តបង្កខាងលើដឹកយកទៅ
សង្គ្រោះនៅមន្ទីរពេទ្យកាល់ម៉ែត្រភ្លាមៗផងដែរ ។
ក្រោយពេលកើតហេតុជំនាញខណ្ឌពោធិ៍សែនជ័យបានសហការជាមួយកម្លាំងជំនាញការិយាល័យចរាចរណ៍ផ្លូវគោករាជធានីភ្នំពេញដើម្បីវាស់វែង និងយករថយន្តបង្កខាងលើយកទៅរក្សាទុក តែម្ចាស់ផ្ទះរងគ្រោះខាងលើមិនសហការជាមួយកម្លាំងសមត្ថកិច្ចផ្នែកជំនាញចរាចរណ៍នោះឡើយដោយរង់ចាំដោះស្រាយដោយខ្លួនឯង ៕
ចែករំលែកព័តមាននេះ