ខេត្តព្រះសីហនុ ៖ ពិតជាប្លែកទៀតហើយសម្រាប់ខេត្តមាត់សមុទ្រ ក្រៅពីលំហូរចូលនៃជនជាតិចិនរាប់ម៉ឺននាក់តាមរូបភាពវិនិយោគនានា ។ រឿងរ៉ាវថ្មីមួយទៀតនេះ ពិតជាស្មានមិនដល់នោះទេ ដែលឆ្នេរសមុទ្រដ៏ស្រស់ស្អាតកណ្តាលរាត្រីធ្លាប់តែស្ងាត់ជ្រងំ បានក្លាយទៅជាតំបន់ភ្លើងពណ៌មិនចាញ់ក្នុងរង្គសាល ឬក្លិបរាត្រីនោះឡើយ ។
អ្វីខ្លះដែលបានធ្វើឲ្យមានការចាប់អារម្មណ៍នោះ គឺនៅឆ្នេរសមុទ្រអូរឈើទាល ដែលមានភោជនីយដ្ឋានចិនបានលេបត្របាក់ ស្ទើរតែអស់ទៅហើយនោះ គេបានយកសម្រស់ស្រីក្មេងសាច់.សខ្ចីដែលស្លៀកពាក់តែ
«ម៉ៃយ៉ូ» ឈររាំកាច់ចង្កេះយ៉ាងស្រើបស្រាលលើពីសតូចមួយ ដែលនៅជុំវិញពីសនោះ គឺក្រុមបុរសចិនអង្គុយផឹកស៊ីបណ្តើរគយគន់មើលក្បាច់រាំកាច់ចង្កេះរបស់នាងៗបណ្តើរ ក្លែមមិនដកក្រសែភ្នែកឡើយ គឺពិតជារ៉ូម៉ាទិចមែន ។
អ្នករាយការណ៍ព័ត៌មានបានឲ្យដឹងថា ការរាំបែបនោះទើបតែកើតមាន២ទៅ៣យប់កន្លងមកនេះតែប៉ុណ្ណោះ ហើយពួកនាងៗ ដែលត្រូវឡើងពីសរាំនេះ គឺចាប់ពីពាក់កណ្តាលអធ្រាត្រទៅ ។ និយាយពិតត្រង់ទៅ វាមិនដល់ថ្នាក់ថា មិនអាចរាំបាននោះទេ តែទិដ្ឋភាពបែបនោះ គួរតែនៅក្នុងក្លិបរាត្រី ឬរង្គសាល មិនមែននៅតាមឆ្នេរសមុទ្របែបនេះទេ ព្រោះទិដ្ឋភាពរបៀបពាលាអាវ៉ាសែនេះ បានធ្វើឲ្យប៉ះពាល់ដល់ប្រពៃណី និងទំនៀមទំលាប់ខ្មែរយើងយ៉ាងពិតប្រាកដ ។
មហាជនបានទាមទារឲ្យពួកចិនទាំងនេះ ត្រូវតែបញ្ឈប់ការរំលោភបំពានបែបនេះ និងបានសុំឲ្យអាជ្ញាធរនិងសមត្ថកិច្ចត្រូវតែបញ្ចប់ការជួលស្រីរាំស្លៀកពាក់ស្ទើរតែស្រាតបញ្ចេញសាច់សខ្ចីដូចបណ្តូលចេក ដែលអាចនាំទៅដល់ការធ្វើអ្វីៗលើសពីនេះ និងផ្តល់ឈ្មោះអសោធដល់មាត់សមុទ្រខ្មែរយើងទៀតផង ។
តាមរយៈការផ្សាយតាមហ្វេសប៊ុកមានគណនីឈ្មោះ Yay Nak Love បានសរសេរថា «ប្រហែលជិតក្លាយជាម៉ាកាវមែនហើយមើលទៅ»?
ការសរសេរនេះ គឺបានយោងទៅលើពាក្យនិយាយតៗគ្នាថា ក្រុងព្រះសីហនុ ឬកំពង់សោម និងត្រូវក្លាយជាម៉ាកាវទី២ ដោយសារការរីកស្គុះស្គាយនូវកាស៊ីណូគ្រប់ទីកន្លែង ដែលនេះជាសក្តានុពលនៃការវិនិយោគនៅខេត្តមាត់សមុទ្រ ព្រោះតាមសណ្ឋាគារ ផ្ទះសំណាក់ធំៗគេទិញធ្វើកាស៊ីណូ និងការសាងសង់អគារខ្ពស់ៗស្កឹមស្កៃកំពុងដំណើរការ ។
មិនដឹងថា ការមកដល់នៃជនជាតិចិនប្រមាណ៥ម៉ឺននាក់បន្ថែមទៀត នៅចុងឆ្នាំនេះ និងមានរឿងឈឺក្បាលអ្វីទៀតកើតមាននោះទេ ៕
ចែករំលែកព័តមាននេះ