ខេត្តសៀមរាប ៖ ផ្លូវជាតិមួយខ្សែដែលតភ្ជាប់ពីរង្វង់មូលព្រៃគុយ ស្ថិតនៅក្នុងភូមិសាស្ត្រ ឃុំអំពិល ស្រុកប្រាសាទបាគង ទៅកាន់ទីប្រជុំជន ឃុំព្រះដាក់ នៃស្រុកបន្ទាយស្រី បានរងការខូចខាតស្ទើរទាំងស្រុង…
ខេត្តសៀមរាប ៖ ផ្លូវជាតិមួយខ្សែដែលតភ្ជាប់ពីរង្វង់មូលព្រៃគុយ ស្ថិតនៅក្នុងភូមិសាស្ត្រ ឃុំអំពិល ស្រុកប្រាសាទបាគង ទៅកាន់ទីប្រជុំជន ឃុំព្រះដាក់ នៃស្រុកបន្ទាយស្រី បានរងការខូចខាតស្ទើរទាំងស្រុង ត្រូវបានប្រជាពលរដ្ឋក៏ដូចជាអ្នកធ្វើដំណើរឆ្លងកាត់រិះគន់ទៅលើអាជ្ញាធរអប្សរាគ្មានចេះសហការជាមួយមន្ត្រីស្ថាប័នពាក់ព័ន្ធ ឬសមត្ថកិច្ចណាម្នាក់ ដើម្បីចាត់វិធានការទៅលើរថយន្តធំៗដឹកដីនិងខ្សាច់ ខណៈរថយន្តទាំងអស់នេះកំពុងបំផ្លាញទាំងយប់ទាំងថ្ងៃ ។
តាមប្រភពពីប្រជាពលរដ្ឋដែលរស់នៅតាមដងផ្លូវក្នុងឃុំព្រះដាក់បានរៀបរាប់ប្រាប់ កោះសន្តិភាព នៅរសៀលថ្ងៃទី១៥ ខែតុលា ឆ្នាំ២០១៨ នេះថារថយន្តដឹងជញ្ជូនដី និងខ្សាច់នាំគ្នាកំពុងសម្រុកដឹកបំផ្លាញផ្លូវទាំងរដូវប្រាំងនិង រដូវវស្សា ស្ទើរខូចអស់ទាំងស្រុង ហើយសុទ្ធសឹងផ្ទុកលើសចំណុះ ណាមួយមិនដែលឃើញសមត្ថកិច្ច ឬអាជ្ញាធរណាម្នាក់ចេញមុខមកធ្វើការអប់រំឡើយ ។ ចំណែកកន្លែងដាក់ថ្លឹងជញ្ជីងផ្លូវទៅបន្ទាយស្រីមិនដែលឃើញឃើញឃាត់រថយន្តលើសចំណុះឡើយ ឃើញតែចូលថ្លឹងហើយបើកហួសទៅមកតែម្តង។
ប្រភពបានបញ្ជាក់ថា ផ្លូវ១ខ្សែនេះគឺជាផ្លូវរបស់អាជ្ញាធរជាតិអប្សរាជាអ្នកគ្រប់គ្រងទាំងអស់គ្មានខាងណាហ៊ានលូកដៃចូលរួមដេញថ្លៃឡើយ បើបងប្អូនសួរពួកគាត់ថ្ងៃណាក៏កំពុងរៀបចំជួសជុលឡើងវិញដែរ ។
អ្នកនាំពាក្យអាជ្ញាធរជាតិអប្សរាលោក ឡុង កុសល បានថ្លែងប្រាប់នៅថ្ងៃទី១៥ ខែតុលា ឆ្នាំ២០១៨ នេះថាចំពោះផ្លូវដែលខូចនេះគឺខាងអាជ្ញាធរជាតិអប្សរាមានគម្រោងជួសជុលឡើងវិញហើយអាចនឹងជួសជុលនៅឆ្នាំ២០១៩ខាងមុខ ។ លោកក៏សូមអំពាវនាវដល់ម្ចាស់អាជីវកម្មរកស៊ីដឹកជញ្ជូនដី និងខ្សាច់ ទាំងអស់មេត្តាសូមកុំផ្ទុកឱ្យលើសទម្ងន់ដែលជាហេតុនាំឱ្យផ្លូវឆាប់ខូច ៕
ចែករំលែកព័តមាននេះ