រាជធានីភ្នំពេញ ៖ ស្ត្រីមេមាយម្នាក់បានធ្វើដំណើរមកលោតទឹកសម្លាប់ខ្លួនពីលើស្ពានជ្រោយចង្វារ ហើយមិនទាន់បានលោតផងត្រូវប្រជាពលរដ្ឋធ្វើដំណើរនាំគ្នាជួយឃាត់ទាន់ ហេតុការណ៍ធ្វើអត្តឃាតនេះបង្កឱ្យមានការភ្ញាក់ផ្អើលកាលពីម៉ោង៤និង៣០នាទីរសៀល ថ្ងៃទី១៣ខែតុលា ឆ្នាំ២០១៨ នៅលើស្ពានជ្រោយចង្វារថ្មី ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ ។
បើតាមនគរបាលបានឱ្យដឹងថាស្ត្រីខាងលើឈ្មោះ យិម អឿន អាយុ៤២ឆ្នាំ មានលំនៅក្នុងសង្កាត់អូរឬស្សី១ ខណ្ឌ៧មករា ។
តាមសាក្សីឱ្យដឹងថា មុនពេលកើតហេតុ គេឃើញស្ត្រីរូបនោះធ្វើដំណើរតាមម៉ូតូឌុបឡើងស្ពានក្នុងទិសដៅពីលិចទៅកើត ហើយនៅពេលជិតដល់កណ្តាលស្ពាន ស្រាប់តែស្ត្រីរូបនោះតោងបង្កាន់ដៃស្ពានប្រុងលោតចុះទៅក្នុងទន្លេសម្លាប់ខ្លួន ។
តាមព័ត៌មានឱ្យដឹងទៀតថា ខណៈនោះជនជាតិកូរ៉េ រួមទាំងប្រជាពលរដ្ឋដែលធ្វើដំណើរឆ្លងកាត់លើស្ពានបានឃើញក៏នាំគ្នាជួយឃាត់ទាន់ រួចបញ្ជូនទៅកាន់ស្នាក់ការនគរបាលប៉ុស្តិ៍ជ្រោយចង្វារ ដើម្បីសាកសួរ ។
នៅចំពោះមុខនគរបាលស្ត្រីរូបនោះឱ្យដឹងថា មូលហេតុដែលធ្វើឱ្យខ្លួនគិតខ្លី ដោយសារតែមានជំងឺប្រចាំកាយ។ ស្ត្រីរូបនោះរៀបរាប់ទាំងទឹកភ្នែកថា នាងជាស្ត្រីមេម៉ាយ មានកូន៣នាក់ ក្នុងនោះស្រីម្នាក់ ហើយរយៈពេលប្រមាណ៤ទៅ៥ខែនេះ គាត់ធ្លាក់ខ្លួនឈឺ ដោយមានជំងឺបេះដូងរីក ហើយត្រូវបានក្រុមគ្រួសារ កូននាំទៅព្យាបាលមិនធូរស្រាលឡើយ ។ ដោយសារតែព្យាបាលអស់ប្រាក់នាំលំបាក់ដល់កូនក៏គិតខ្លី ដោយហៅឌុបជិះមកលោតទឹកសម្លាប់ខ្លួនតែម្តង។ បន្ទាប់ពីសាកសួររួច នគរបាលក៏បានអប់រំ និងទាក់ទងហៅកូនឱ្យមកនាំយកត្រឡប់ទៅផ្ទះវិញ ៕
ចែករំលែកព័តមាននេះ