ខេត្តព្រះសីហនុ ៖ សេចក្តីរាយការណ៍បឋមឲ្យដឹងថា កាលពីថ្ងៃទី១១ តុលា ២០១៨ កម្លាំងសមត្ថកិច្ចជំនាញ នៃអធិការដ្ឋាននគរបាលក្រុងព្រះសីហនុ សហការជាមួយនគរបាលស្រុកព្រៃនប់ បានធ្វើការឃាត់…
ខេត្តព្រះសីហនុ ៖ សេចក្តីរាយការណ៍បឋមឲ្យដឹងថា កាលពីថ្ងៃទី១១ តុលា ២០១៨ កម្លាំងសមត្ថកិច្ចជំនាញ នៃអធិការដ្ឋាននគរបាលក្រុងព្រះសីហនុ សហការជាមួយនគរបាលស្រុកព្រៃនប់ បានធ្វើការឃាត់ ខ្លួនជនសង្ស័យម្នាក់ឈ្មោះ ចាន់ រដ្ឋា ហៅប៉ី ភេទប្រុស អាយុ៣១ឆ្នាំ មុខរបរមិន និងស្នាក់នៅមិនពិតប្រាកដ ពាក់ព័ន្ធពីបទកាន់កាប់រក្សាទុក និងប្រើប្រាស់អាវុធជាតិផ្ទុះដោយគ្មានច្បាប់អនុញ្ញាតិ និងពីបទប្រើប្រាស់ជួញដូរចែកចាយនូវសារធាតុញៀនដោយខុសច្បាប់ ។
តាមសមត្ថកិច្ចឲ្យដឹងថា ឈ្មោះ ចាន់ រដ្ឋា ហៅប៉ី គឺជាមុខសញ្ញាចាស់ ធ្លាប់ប្រព្រឹត្តិអំពើហិង្សាជាច្រើនលើកដូចជា ប្រើប្រាស់អាវុធកែច្នៃបាញ់គំរាមប្រពន្ធ ត្រូវក្រោមចុងដង្ហើមបណ្តាលឲ្យរងរបួសធ្ងន់ (តែប្រពន្ធមិនបានប្តឹងសមត្ថកិច្ចទេ) កាលពីវេលាម៉ោង២និង៣០នាទីរសៀលថ្ងៃទី១១ កុម្ភៈ ២០១៨ នៅក្នុងបន្ទប់ជួលក្រុមទី៤៦ ភូមិ៥ សង្កាត់លេខ៤ ក្រុងព្រះសីហនុ ហើយបានគេចខ្លួនបាត់មួយរយៈ ។
ក្រោយឃាត់ខ្លួនជនសង្ស័យបានឆ្លើយសារភាពប្រាប់សមត្តកិច្ចថា នៅពេលសមត្ថកិច្ចដេញតាមចាប់ ខ្លួនបានបោះអាវុធខ្លីម៉ាក K59 ចោលក្នុងព្រៃ ទើបកម្លាំងជំនាញយើងរុករកចាប់យកបាន រួចហើយឈានមកធ្វើការឆែកឆេរលំនៅដ្ឋានរបស់ជនសង្ស័យខ្លួនបន្តទៀត ។
ការចុះបង្ក្រាបករណីខាងលើនេះ ក្រោមការដឹកនាំដោយលោកឧត្តមសេនីយ៏ត្រី សួន សុផាត ស្នងការរងប្រឆាំងបទល្មើសគ្រឿងញៀន និង លោកវៈសេនីយ៍ទោ ភុល ភស្ដា អធិការក្រុងព្រះសីហនុ និង ការិយា
ល័យជំនាញពាក់ពន្ធ ដោយមានការចង្អុលបង្ហាញពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ។
ជាលទ្ធផលរកឃើញវត្ថុតាងមានដូចជា ៖ ១-អាវុធខ្លីម៉ាកK.59 លេខ៩០៩៩ ផលិតនៅប្រទេសសូវៀត
(បាញ់ថ្នាំពណ៌ស), បង់១ មាន៦គ្រាប់, ២-អាវុធបាញ់គ្រប់សំណរ១ដើម, ៣-អាវុធកែឆ្នៃបាញ់ខ្យល់ចំនួន២ដើម, ៤-ម្សៅក្រាមពណ៌ស សង្ស័យគ្រឿងញៀន១ថង់តូច, ថង់វិចខ្ចប់មួយចំនួន, ៥-វិទ្យុទាក់ទង១គ្រឿង ។
ជនសង្ស័យនិងវត្ថុតាង ត្រូវបានសមត្ថកិច្ចកំពុងកសាងសំណុំរឿងបញ្ជូនទៅសាលាដំបូងខេត្ត តាមនីតិវិធី ៕
ចែករំលែកព័តមាននេះ