អាមេរិក ៖ តាមការសិក្សាស្រាវជ្រាវរបស់ American Chemical Society បានរកឃើញភស្តុតាងបញ្ជាក់ថា ការប្រើប្រាស់បារីអេឡិចត្រូនិកនឹងធ្វើឲ្យកើនឡើងការខូចខាតលើ DNA នៅក្នុងមាត់។ ប្រសិនបើកោសិកាមិនអាចជួសជុលឡើងវិញបានទេ ក្រោយពីមានការខូចខាតលើ DNA បណ្តាលមកពីការជក់បារីអេឡិចត្រូនិកទេនោះ អត្រាប្រឈមនឹងជំងឺមហារីកកើនខ្ពស់ជាងធម្មតា។
អ្នកស្រាវជ្រាវទាំងនោះទទួលស្គាល់ថា ផលប៉ះពាល់ក្នុងរយៈពេលយូរមកពីការជក់បារីអេឡិចត្រូនិក នៅមិនទាន់ត្រូវបានដឹងនៅឡើយទេ។
លោកវេជ្ជបណ្ឌិត Romel Dator ដែលជាអ្នកស្រាវជ្រាវ បានមានប្រសាសន៍ថា៖ «ពួកយើងចង់កំណត់សម្គាល់សារធាតុគីមីរបស់បារីអេឡិចត្រូនិក និងការខូចខាត DNA ដែលពួកវាបង្ក»។
តាំងពីការដាក់ឲ្យប្រើប្រាស់ដំបូងរបស់បារីអេឡិចត្រូនិកនៅឆ្នាំ២០០៤ គ្រប់គ្នាចាត់ទុកវាជាជម្រើសផ្សេងពីការជក់បារីពិតប្រាកដ។ តែក្រុមសិក្សាស្រាវជ្រាវខាងលើ ក៏បានលើកឡើងថា សារធាតុនៅក្នុងបារីអេឡិចត្រូនិកអាចផ្លាស់ប្តូរសមាសធាតុនៃកោសិកានៅក្នុងមាត់។
ពួកគេធ្វើការពិនិត្យទៅលើទឹកមាត់ និងកោសិកាក្នុងមាត់ នៃអ្នកជក់បារីអេឡិចត្រូនិក៥នាក់ មុនពេលឲ្យជក់រយៈពេល១៥នាទី។ ក្រោយពីជក់រួច គេក៏ពិនិត្យម្តងទៀត ហើយក៏ឃើញមានការកើនឡើងនូវសារធាតុពុល Formaldehyde, Acrolein និង Methylglyoxal។ នេះបញ្ជាក់ឲ្យឃើញថា បើទោះបីជាបារីអេឡិចត្រូនិកមានផលប៉ះពាល់ដល់សុខភាពតិចជាងបារីធម្មតាក្តី ក៏វាមិនមានសុវត្ថិភាពសុទ្ធ១០០%ដែរ។
គួរបញ្ជាក់ផងដែរថា បារីអេឡិចត្រូនិកដំណើរការបានដោយសារ ការកម្តៅសារធាតុរាវ ដែលជានិច្ចជាកាលមានផ្ទុកសារធាតុនីកូទីន ឲ្យទៅជាផ្សេងសម្រាប់ឲ្យអ្នកជក់ស្រូប។ វាមានរសជាតិជាផ្លែឈើ ឬ សូកូឡា ឬ ស្ករកៅស៊ូ៕
ចែករំលែកព័តមាននេះ