ជាតិសរសៃច្រើនតែជាប់ទាក់ទងនឹងការបន្ទោបង់ច្រើន ប៉ុន្តែតើអ្នកជឿទេថា យើងត្រូវ ការជីវជាតិមួយនេះដើម្បីជួយសម្អាតប្រព័ន្ធរំលាយអាហារមនុស្សយើង ។ ប្រព័ន្ធរំលាយអាហារដែលស្អាតល្អពិតជាអាចជួយបន្ថយការប្រឈមនឹងភាពធាត់ជ្រុល បញ្ហាបេះដូង និងបញ្ហាសុខភាព ផ្សេងៗទៀតបាន ដោយសារយើងអាចបញ្ចេញកាកសំណល់កាន់តែច្រើនចេញពីក្នុងខ្លួនយ៉ាងមានប្រសិទ្ធភាព ។
បញ្ហាតែមួយគត់នោះគឺថា មនុស្សកាន់តែច្រើនមិនបានញ៉ាំអាហារមានជាតិសរសៃគ្រប់គ្រាន់ទេ ដូច្នេះពួកគេងាយនឹងមានជំងឺច្រើនណាស់ ។ ដើម្បីទទួលបានជាតិសរសៃគ្រប់គ្រាន់ យកល្អគួរតែជ្រើសរើសញ៉ាំអាហារ៣ប្រភេទនេះ ព្រោះវាត្រូវបានគេរកឃើញថា មានជាតិសរសៃខ្ពស់ និងគួរឲ្យភ្ញាក់ផ្អើល ។
១-ប្រូខូលី ៖ ប្រូខូលីផ្ទុកទៅដោយជាតិសរសៃរហូតដល់ ៥,១ក្រាម ក្នុងមួយកូនចានចង្កឹះ ។ អ្នកអាចស្ងោរវាក៏បាន ឬញ៉ាំឆៅក៏បានដែរ ។ មិនខ្វល់ថា អ្នករៀបចំវាញ៉ាំបែបណាទេ អ្នកនឹងទទួលបានជាតិសរសៃពីបន្លែនេះដើម្បីពង្រឹងដល់សុខភាពប្រព័ន្ធរំលាយអាហារ ។ បើសិនជាអ្នកចង់ញ៉ាំអាហារខាងក្រៅវិញ អ្នកអាចញ៉ាំប្រូខូលីជាមួយ ស៊ុត ខ្ទឹមបារាំង ខ្ទឹមស ផ្លែអាល់ម៉ុនបាន ។
២-ខ្ទឹមបារាំង ៖ តើអ្នកមានដឹងទេថា ខ្ទឹមបារាំងក៏មានជាតិសរសៃដែរ ។ ខ្ទឹមបារាំងទំហំមធ្យមមួយផ្ទុកទៅដោយជាតិសរសៃ២ក្រាម ។ វាមានចំនួនតិចមែន តែខ្ទឹមបារាំងមានសារធាតុ Inulin ដែលជាប្រភេទជាតិសរសៃរលាយក្នុងទឹក ហើយអាចបន្ថយចំនួនកូឡេស្តេរ៉ូលក្នុងឈាមបានថែមទៀតផង ។ បើសិនជាអ្នកចង់ញ៉ាំថ្នាំបំប៉នជាជាតិសរសៃនោះ យកល្អគួរតែញ៉ាំខ្ទឹមបារាំងវិញ ព្រោះវានឹងផ្តល់ចំនួនជាតិសរសៃដល់ក្នុងខ្លួនល្អជាង និងមានប្រសិទ្ធភាពជាង ។
៣-ផ្លែប៉ោម ៖ យើងពិតជាមិនបាច់មើលអ្វីឆ្ងាយឡើយនៅពេលនិយាយរឿងជាតិសរសៃ ព្រោះថាផ្លែប៉ោមពិតជាមានជាតិសរសៃច្រើនទៅហើយ ។
យោងទៅតាមអ្នកជំនាញខាងសុខភាពបានឲ្យដឹងថា អាហារទាំងឡាយណាដែលមានជាតិសរសៃ៣ក្រាមឡើងទៅ អាចត្រូវបានគេចាត់ទុកថា ជាប្រភពដ៏ល្អមួយ ហើយផ្លែប៉ោមពិតជាសក្តិសមណាស់ដែលអាចមានជាតិសរសៃរហូតដល់៤ក្រាមឯណោះ ។ ការញ៉ាំអាហារសម្រន់ប្រភេទនេះអាចបំបាត់ភាពឃ្លាន ខណៈពេលដែលពេលជាមួយគ្នា ក៏ជំរុញដល់ប្រព័ន្ធរំលាយអាហារធ្វើការកាន់តែល្អថែមទៀត (ប្រភពពី៖ Health.com.kh)៕
ចែករំលែកព័តមាននេះ