ខេត្តកំពង់ឆ្នាំង ៖ លោកឈួរ ច័ន្ទឌឿន អភិបាលខេត្តកំពង់ឆ្នាំង និងជាប្រធានអនុគណៈកម្មការសុវត្ថិភាពចរាចរណ៍ផ្លូវគោក ខេត្តកំពង់ឆ្នាំងមានប្រសាសន៍ថា«មួកសុវត្ថិភាពមួយអាចជួយសង្គ្រោះជីវិតយើងបាន ក្នុងពេលដែលយើងមានគ្រោះថ្នាក់ចរាចរណ៍ ដូច្នេះអ្នកបើកបរម៉ូតូគ្រប់ប្រភេទ សូមចូលរួមគោរពច្បាប់ចរាចរណ៍ឲ្យខ្ជាប់ខ្ជួន…
ខេត្តកំពង់ឆ្នាំង ៖ លោកឈួរ ច័ន្ទឌឿន អភិបាលខេត្តកំពង់ឆ្នាំង និងជាប្រធានអនុគណៈកម្មការសុវត្ថិភាពចរាចរណ៍ផ្លូវគោក ខេត្តកំពង់ឆ្នាំងមានប្រសាសន៍ថា«មួកសុវត្ថិភាពមួយអាចជួយសង្គ្រោះជីវិតយើងបាន ក្នុងពេលដែលយើងមានគ្រោះថ្នាក់ចរាចរណ៍ ដូច្នេះអ្នកបើកបរម៉ូតូគ្រប់ប្រភេទ សូមចូលរួមគោរពច្បាប់ចរាចរណ៍ឲ្យខ្ជាប់ខ្ជួន ដោយត្រូវតែពាក់មួកសុវត្ថិភាពឲ្យបានគ្រប់គ្នា ទោះទៅទីជិត ឬទីឆ្ងាយក៏ដោយ» ។
ថ្លែងបែបនេះទៅកាន់បងប្អូនប្រជាពលរដ្ឋក្នុងកម្មវិធីសំណួរ- ចម្លើយ ដើម្បីទទួលបានមួកសុវត្ថិភាពក្នុងកម្មវិធីពង្រឹងច្បាប់ចរាចរណ៍នៅចំណុចជិតស្ថានីយប្រេងឥន្ទនៈផ្សារលើ ក្នុងក្រុងកំពង់ឆ្នាំងព្រឹកថ្ងៃទី០៥ ខែតុលា ឆ្នាំ២០១៨ ។ លោកអភិបាលខេត្តបានសំណូមពរដល់ប្រជាពលរដ្ឋនៅក្នុងឱកាសបុណ្យកាន់បិណ្ឌ និងភ្ជុំបិណ្ឌនេះសូមបងប្អូនរួមគ្នាគោរពច្បាប់ចរាចរណ៍ឱ្យបានខ្ជាប់ខ្ជួនម៉ឺងម៉ាត់ ដូចជា កុំបើកបរហួសល្បឿនកំណត់កុំបើកបរក្នុងភាពស្រវឹង កុំបើកបររំលោភសិទ្ធអាទិភាព កុំវ៉ាជែង ក្នុងស្ថានភាពគ្រោះថ្នាក់ ត្រូវគោរពគោរពស្លាកសញ្ញាចរាចរណ៍ គំនូសញ្ញាចរាចរណ៍ កុំដឹកឥវ៉ាន់សំពីងសំពោង និងដឹកលើសចំណុះ កុំតទ្រុងខុសលក្ខណៈបច្ចេកទេស និងត្រូវមានសីលធម៌ក្នុងពេលបើកបរដោយត្រូវចេះយោគយល់អធ្យាស្រ័យឲ្យគ្នាទៅវិញទៅមក ទើបអាចទប់ស្កាត់ និងកាត់បន្តយបានគ្រោះថ្នាក់ចរាចរណ៍ នៅលើដងផ្លូវនៅក្នុងបុណ្យភ្ជុំបិណ្ឌនេះ ។
ជាមួយគ្នានេះលោក កែវ ពៅ ប្រធានលេខាធិការដ្ឋានសុវត្ថិភាពចរាចរណ៍ផ្លូវគោក ខេត្តកំពង់ឆ្នាំង និងជាប្រធានមន្ទីរសាធារណៈការខេត្តក៏បានថ្លែងឲ្យដឹងផងដែរថា នៅក្នុងថ្ងៃនេះអនុគណៈកម្មការសុវត្ថិភាពចរាចរណ៍ផ្លូវគោកខេត្តមានមួកសុវត្ថិភាពចំនួន៨១មួក ដើម្បីចែកជូនដល់បងប្អូនប្រជាពលរដ្ឋដែល គ្មានមួក តែត្រូវឆ្លើយនឹងសំណួរនៃច្បាប់ចរាចរណ៍ចំនួន៣សំនួរត្រឹមត្រូវទើបទទួលបានមួកសុវត្ថិភាពមួយ ។
ដោយឡែកអ្នកឆ្លើយសំណួរមិនត្រូវ គឺត្រូវផ្តល់ឲ្យតែខិតប័ណ្ណរបស់ច្បាប់ចរាចរណ៍យកទៅរៀនសូត្រតែប៉ុណ្ណោះ ។
លោកបានបញ្ជាក់ទៀតថា ក្នុងឆ្នាំ២០១៨នេះ មន្ទីរសាធារណៈការខេត្តក៏ដូចជា គណៈកម្មការសុវត្ថិភាពចរាចរណ៍ផ្លូវគោកខេត្តបានយកចិត្តទុកដាក់ចុះពង្រឹងការអប់រំច្បាប់ចរាចរណ៍ និងចែកមួកសុវត្ថិភាពដល់ប្រជាពលរដ្ឋនៅគ្រប់ស្រុកក្រុងទាំង៨ បានចំនួន១៥លើក ដោយបានចែកមួកសុវត្ថិភាពបានជាង១ពាន់មួកដល់ប្រជាពលរដ្ឋយើងដែលពួកគាត់បានឆ្លើយត្រូវនឹងសំនួរនៃច្បាប់ចរាចរណ៍ផងដែរ ។
ជាទិសដៅបន្តគណៈកម្មការសុវត្ថិភាពចរាចរណ៍ខេត្តនឹងនៅតែបន្តការពង្រឹងច្បាប់ចរាចរណ៍ផ្លូវគោកបន្ថែមទៀត ព្រោះបច្ចុប្បន្នគ្រោះថ្នាក់ចរាចរណ៍ក្នុងខេត្តកំពង់ឆ្នាំងនៅតែបន្តកើនឡើងជាក់ស្តែង៩ខែដើម ឆ្នាំ២០១៨ គ្រោះថ្នាក់ចរាចរណ៍បានកើនឡើងជាងឆ្នាំចាស់៥៦ករណី ៕
ចែករំលែកព័តមាននេះ