រាជធានីភ្នំពេញ ៖ នារីម្នាក់ដែលទើបតែជាប់បាក់ឌុបត្រូវបានរថយន្តដឹកស៊ីម៉ងត៍មួយគ្រឿង ឡើងស្ពានមិនរួចក៏បានរអិលថយក្រោយកិនស្លាប់បែកក្បាលស្លាប់យ៉ាងអាណោចអាធម៌ ហើយស្ត្រីជាម្តាយបានរត់គេចខ្លួនផុត ។ ហេតុការណ៍គ្រោះថ្នាក់ដ៏រន្ធត់នេះបានកើតឡើងនៅវេលាម៉ោង២និង១០នាទីនៅលើស្ពានព្រែកព្នៅផ្នែកខាងកើត ក្នុងភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ ។
នារីរងគ្រោះខាងលើឈ្មោះ ស៊ុន តាំងហៀង អាយុ១៩ឆ្នាំ រស់នៅភូមិអន្លង់ស្លែង ឃុំសំបួរមាស ស្រុកមុខកំពូល ខេត្តកណ្តាល ត្រូវបានកិនចំក្បាលស្លាប់នៅកន្លែង ។ ចំណែកស្ត្រីម្តាយឈ្មោះ រី អាយុ៤២ឆ្នាំ បានគេចផុតពីគ្រោះថ្នាក់ ។
តាមនគរបាលឲ្យដឹងថា រថយន្តដែលបង្កគ្រោះថ្នាក់ម៉ាកហ៊ីយ៉ាន់ដាយ ពណ៌ស ពាក់ស្លាកលេខយ១៣២២ភព៣ ដឹកស៊ីម៉ងត៍ អ្នកបើកបរត្រូវបានឃាត់ខ្លួន ។
តាមសាក្សីបានឲ្យដឹងថា នៅមុនពេលកើតហេតុរថយន្តបានដឹកស៊ីម៉ងត៍ពេញធ្វើដំណើរឡើងស្ពានព្រែកព្នៅ ក្នុងទិសដៅពីកើតទៅលិច ។ នៅពេលធ្វើដំណើរបានបន្តិចក៏បានរអិលថយក្រោយ និងបានរលត់ម៉ាស៊ីន ហើយរេចុះឡើង ។ ដោយឃើញដូចនេះស្ត្រីជាម្តាយបានបើកម៉ូតូម៉ាកហុងដា សេរី២០១៧ ពាក់ស្លាកលេខ ភ្នំពេញ១DP-០៩៣៤ មកពីក្រោយក៏បានចុះបណ្តើររត់ ។
តាមព័ត៌មានឲ្យដឹងទៀតថា ខណៈនោះកូនស្រីបានជួយរុញម៉ូតូរត់គេចពីរថយន្តនោះ តែដោយរថយន្តរ៉េចុះឡើងក៏រអិលមកកិនចំនារីជាកូនបណ្តាលឲ្យស្លាប់នៅកន្លែង ហើយរថយន្តបានរអិលធ្លាក់ផ្លូវទៅឆ្វេងដៃ និងធ្លាក់ផ្នែកខាងក្រោយបះខាងមុខទៅលែងរួច ។ នៅក្នុងនោះ ស្ត្រីជាម្តាយបានរត់គេចផុត ។
តាមស្ត្រីជាម្តាយបានឲ្យដឹងថា កូនស្រីគាត់ទើបនឹងប្រឡងបាក់ឌុបថ្មីៗនេះ ។ នៅមុនពេលកើតហេតុគាត់បានជិះម៉ូតូឌុបកូនស្រីធ្វើដំណើរចេញពីផ្ទះគោលបំណងទៅលេងផ្ទះបងប្អូននៅសង្កាត់គីឡូម៉ែត្រលេខ៦ ខណៈមកដល់ចំណុចលើស្ពាន ស្រាប់តែរថយន្តឡើងស្ពានមិនរួចក៏បានរអិលថយក្រោយមកកិនកូនស្រីគាត់ស្លាប់តែម្តង ។ ចំណែករថយន្តអ្នកបើកបរត្រូវបាននាំយកទៅរក្សាទុកនៅការិយាល័យចរាចរផ្លូវគោក ដើម្បីចាត់ការតាមច្បាប់ ៕
ចែករំលែកព័តមាននេះ