ស្ងាត់ៗ បឺត ខាំ និងឡុង សុភី ក្លាយជាថៅកែមិនធម្មតា
- ភ្នំពេញ
រាជធានីភ្នំពេញ ៖ នៅលើទឹកដីខេត្តកំពង់ស្ពឺ ក្នុងតំបន់វត្តទួលសុភី គេសុទ្ធតែឃើញផ្លាកយីហោលក់ដីឡូត៍របស់កីឡាករពីររូប គឺបឺត ខាំ និងឡុង សុភី ដាក់ត្រដាងតាមផ្លូវ…
រាជធានីភ្នំពេញ ៖ នៅលើទឹកដីខេត្តកំពង់ស្ពឺ ក្នុងតំបន់វត្តទួលសុភី គេសុទ្ធតែឃើញផ្លាកយីហោលក់ដីឡូត៍របស់កីឡាករពីររូប គឺបឺត ខាំ និងឡុង សុភី ដាក់ត្រដាងតាមផ្លូវ…
រាជធានីភ្នំពេញ ៖ នៅលើទឹកដីខេត្តកំពង់ស្ពឺ ក្នុងតំបន់វត្តទួលសុភី គេសុទ្ធតែឃើញផ្លាកយីហោលក់ដីឡូត៍របស់កីឡាករពីររូប គឺបឺត ខាំ និងឡុង សុភី ដាក់ត្រដាងតាមផ្លូវ ដោយអ្នកទាំងពីរត្រូវគេដឹងថា គឺជាម្ចាស់ដីឡូត៍ដែលបានប្រកាសលក់ក្នុងមួយប្លង់ជាង២ពាន់ដុល្លារនោះផង បើទោះជាអ្នកទាំងពីរគ្រាន់តែមានចំណែកជាម្ចាស់ក្នុងភាគហ៊ុនមួយក្ដី។
អ៊ីចឹងហើយទើបបឺត ខាំ ប្រកាសទាំងស្រុងថាឈប់ប្រដាល់ដោយឈប់ទាំងទទួលបង្ហាត់ ខណៈដែលឡុង សុភី ក៏ត្រូវគេដឹងថា ស្ទើរតែលែងទទួលប្រដាល់ដោយសារតែលោករវល់ក្នុងការចុះឡើងមូលដ្ឋានលក់ដី ហើយគ្មានពេលហ្វឹកហាត់ ។ នេះគឺជាជំហានថ្មីមួយនៅក្នុងវិស័យប្រដាល់ដែលពេលកន្លងមកមានតែការលើកឡើងថា កីឡាករប្រដាល់មានជីវភាពខ្សត់ខ្សោយនោះ ប៉ុន្តែពេលនេះ គឺអ្នកទាំងពីរបានក្លាយជាអ្នកជំនួញដីធ្លីខុសពីកីឡាករផ្សេងៗ។
កីឡាករ បឺត ខាំ បានអះអាងថា លោកបានសម្រេចចិត្តបោះទុនក្នុងជំនួញដីធ្លីប្រមាណច្រើនខែមកហើយ បន្ទាប់ពីលោកសាកល្បងធ្វើជាភ្នាក់ងារលក់ដីឡូត៍ជាមួយបងធម៌មួយរយៈ ហើយត្រូវបងធម៌ផ្ដល់ឱកាសឱ្យចូលជាភាគហ៊ុន ដើម្បីទទួលបានផលចំណេញច្រើន ។
លោកថា ខ្លួនមានភាគហ៊ុនលើគម្រោងដីធ្លីដែលលោកបង្ហោះដាក់លក់រាល់ថ្ងៃ តែលោកបដិសេធមិនប្រាប់ទំហំដើមទុនដែលបានដាក់ចូលក្រុមហ៊ុននោះទេ ដោយគ្រាន់តែអះអាងថា មានចំនួនច្រើនដែរ ដែលថវិកាទាំងនោះ គឺបានពីការសន្សំ និងពីចំណែកដែលលោកទទួលបានពីការផ្ចុងផ្ដើមដោយក្រុមបងធម៌ដែលជាម្ចាស់ដីធ្លី ។
លោកថា រយៈពេល២ខែចុងក្រោយ លោកទទួលបានផលចំណេញគួរសម ទើបបណ្ដាលឱ្យលោកសម្រេចចិត្តបោះបង់ការបង្វឹកកូនសិស្សនូវផ្នែកប្រដាល់ ដើម្បីផ្ដាច់ខ្លួនមករកស៊ីដីធ្លីវិញម្ដងទុកជាបង្អែក ។ លោករៀបរាប់ពីបទពិសោធន៍នាំឱ្យក្លាយជាអ្នកជំនួញដីធ្លីនេះថា៖«ពីមុនខ្ញុំគ្រាន់តែរៀនជួយលក់ដីឡូត៍បងធម៌យកបទពិសោធន៍ អ៊ីចឹងខ្ញុំនៅតែឆ្លៀតបង្ហាត់សិស្សដដែល បើទោះជាខ្ញុំឈប់ប្រដាល់ ប៉ុន្តែខែចុងក្រោយ គឺខ្ញុំចូលហ៊ុនជាមួយបងធម៌តែម្ដង ទើបខ្ញុំបោះចោលទាំងស្រុងតែម្ដងសម្រាប់ការបង្វឹកសិស្សដែលធ្លាប់ធ្វើ!»។
អតីតកីឡាករជើងខ្លាំង បឺត ខាំ លោកប្រកាសលែងស្ដាយ និងឈប់ងាកក្រោយពាក់ព័ន្ធនឹងការប្រដាល់ទៀតហើយ បន្ទាប់ពីលោករកឃើញមុខរបរដីធ្លី ដែលលោកបានហៅជំនួញរបស់ខ្លួននេះថាធ្វើឱ្យលោកបានប្រាក់ចំណូលរឹងមា ។ លោកនិយាយថា៖«រាល់ថ្ងៃខ្ញុំមិនមែនភាគហ៊ុនធំទេ ប៉ុន្តែខ្ញុំមើលឃើញពីផលចំណេញខ្ពស់ អ៊ីចឹងហើយទើបខ្ញុំមានលទ្ធភាពជាងមុន គឺខុសគ្នាដាច់ឆ្ងាយពីកាលខ្ញុំនៅប្រដាល់ និងនៅបង្ហាត់សិស្ស»។
ក្រៅពីប្រកាសឱ្យដឹងពីមុខរបរជាអ្នកចូលហ៊ុនលក់ដីធ្លីជាមួយក្រុមហ៊ុនមួយ អតីតកីឡាករ បឺត ខាំ កាលពីពេលថ្មីៗក៏ត្រូវគេឃើញឡើងច្រៀងលើឆាកតន្ត្រីទូរទស្សន៍អាស៊ីអាគ្នេយ៍ អមដោយការប្រកាសថា លោកនឹងបន្តឡើងឆាកបែបនេះឱ្យបានញឹកញាប់ ។
បន្ថែមពីលើការប្រកាសលោកបានបញ្ជាក់ថា ខ្លួននឹងត្រៀមផលិតបទនិពន្ធថ្មីដើម្បីឡើងឆាកនោះផង ដែលការសម្រេចចិត្តនេះ គឺដោយសារតែលោកត្រូវប៉ាន់ក្រោយពីបោះជំហានធ្វើជំនួញដីធ្លីក្នុងនាមជាម្ចាស់ភាគហ៊ុនមួយនាពេលចុងក្រោយនោះឯង។
មិនខុសគ្នាដែរ កីឡាករ ឡុង សុភី បានអះអាងថា លោករាល់ថ្ងៃក៏ទទួលផលចំណេញពីការឈរលក់ដីឡូត៍ក្នុងនាមជាទីផ្សារផង និងក្នុងនាមជាម្ចាស់ភាគហ៊ុនផងដែរ ដោយតំបន់ដែលលោកចេញធ្វើជំនួញ មានសក្ដានុពលខ្លាំងក្នុងការប្រកបអាជីវកម្មផង ដោយសារតែក្នុងតំបន់នោះ ត្រូវបានគេបង្កើតជាខេត្តថ្មី ហើយជិតក្រុងឧដុង្គ ដែលមានការអភិវឌ្ឍខ្លាំង ។ លោកថាសប្បាយចិត្តយ៉ាងខ្លាំងដែលលោកមានឱកាសចាប់ដៃជាមួយបឺត ខាំ ហើយបើកជំនួញដីធ្លី ដោយមានបងធម៌ធ្វើជាបង្អែក ។
យ៉ាងណាមិញលោកថា ខ្លួននឹងនៅតែទទួលប្រដាល់ដោយគ្រាន់តែកាត់បន្ថយជាងមុន និងទទួលឡើងតែការប្រដាល់ណាដែលលោកគួរតែទទួលប៉ុណ្ណោះ ។ លោកថា ក្នុងមួយខែខ្លួនទទួលបានប្រាក់ចំណែកខ្ពស់ ហើយក្នុងពេលខាងមុខលោកនឹងលុកលុយក្នុងមុខជំនួញដីធ្លីនេះឱ្យកាន់តែខ្លាំង ស្របពេលដែលលោកក៏មានដើមទុនច្រើនក្នុងដៃខុសពីមុន ដែលអាចទៅរួចក្នុងពេលខាងមុខ។
ជាមួយនឹងការវិវត្តខ្លួនពីកីឡាករក្លាយជាថៅកែពុះដីឡូត៍លក់ទាំងពីរនាក់ព្រមគ្នាបែបនេះ ធ្វើឱ្យគេម្នាក់ៗកោតសរសើរចំពោះកីឡាករ បឺត ខាំ និងឡុង សុភី យ៉ាងខ្លាំង ដែលអាចបំលាស់ខ្លួនពីស្ថានភាពកីឡាករដែលគេយល់ថានៅតែក្រ នៅតែខ្សត់ក្រោយពេលទីផ្សារថយចុះ ក្លាយជាថៅកែមួយបាន បើទោះជាក្នុងពេលនេះ លោកគ្រាន់តែជាថៅកែដីឡូត៍ក្នុងចំណែកភាគហ៊ុនមួយនៅឡើយ ដោយមិនទាន់ក្លាយជាថៅកែផ្ដាច់មុខម្នាក់ឯង ។
កីឡាករបឺត ខាំ បញ្ជាក់ថា មិនយូរនោះទេ លោកនឹងធ្វើជាថៅកែដោយខ្លួនឯង ប៉ុន្តែបណ្ដាលមកពីក្នុងពេលនេះ លោកត្រូវការដៃគូរួមគ្នាឱ្យរឹងមាំសិន ទើបលោកត្រូវតែចាប់ដៃជាមួយអ្នកមានជំនាញគ្រប់គ្នាដើម្បីបែងចែកផលចំណេញឱ្យគ្នា ។
ឡុង សុភី ត្រូវគេឃើញលេចមុខតែក្នុងគម្រោងដីពុះឡូត៍នៅកំពង់ស្ពឺភាគច្រើន តែបើកីឡាករបឺត ខាំ ឃើញលេចមុខក្នុងគម្រោងនៅខេត្តត្បូងឃ្មុំ និងម្ដុំភ្នំបាសិត និងនៅតំបន់ផ្សេងៗទៀតនោះផង ខណៈដែលលោកក្រៅពីចុះមើលការដ្ឋានពុះដីឡូត៍លក់ ក៍ចុះទិញពីពលរដ្ឋមិនខុសពីថៅម្នាក់ជាមួយដៃគូភាគហ៊ុននោះទេ៕
ចែករំលែកព័តមាននេះ