ខេត្តព្រះវិហារ ៖ តាមសេចក្តីរាយការណ៍បឋមឲ្យដឹងថា កាលពីវេលាម៉ោង១រសៀល ថ្ងៃទី០២ តុលា នេះ កម្លាំងសមត្ថកិច្ចនាយកដ្ឋានប្រឆាំងភាវរកម្ម និងឧក្រិដ្ឋកម្មឆ្លងដែន បានតាមប្រមាញ់ចាប់ខ្លួនមេខ្លោងម្នាក់ ពាក់ព័ន្ធទៅនឹងមនុស្សប្រុសស្រី៨នាក់ ដែលមានអតីតភិក្ខុសង្ឃ១អង្គផងនោះ ត្រូវបានចាប់ខ្លួននៅខេត្តព្រះវិហារ។ សេចក្តីរាយការណ៍បន្តថា ជនសង្ស័យរូបនោះគេហៅក្រូច ដែលការចាប់ខ្លួនឈ្មោះនេះ សមត្ថកិច្ចបានដកហូតអាវុធ មានវែង មានខ្លី និងមានគ្រឿងរំសេវ ជាឧបករណ៍ដាក់បំផ្ទុះទៀតផង។ ជនសង្ស័យកំពុងត្រូវបានសាកសួរនៅ ស្នងការនគរបាលខេត្តព្រះវិហារ ហើយបើតាមព័ត៌ថា យប់នេះសមត្ថកិច្ច និងនាំមកកាន់នាយកដ្ឋាននគរបាល ប្រឆាំងភារកម្ម និងឧក្រិដ្ឋកម្មឆ្លងដែនក្រសួងមហាផ្ទៃ ដើម្បីបន្តនីតិវិធី។
សូមបញ្ជាក់ថា មនុស្សប្រុសស្រីចំនួន៨ នាក់ ក្នុងនោះមានម្នាក់អតីតជាសង្ឃ រួមទាំងអាវុធ២៨ដើម កាលពីព្រឹកថ្ងៃទី៣០ កញ្ញា ត្រូវបានកម្លាំងសមតត្ថកិច្ច នាយកដ្ឋាននគរបាលប្រឆាំងភាវរកម្ម និងឧក្រិដ្ឋកម្មឆ្លងដែន នាំខ្លួនទៅកាន់សាលាដំបូងរាជធានីភ្នំពេញ ដើម្បីធ្វើការសាកសួរ និងចោទប្រកាន់ជាផ្លូវការ។ ទាក់ទិននឹងការបញ្ជូនខ្លួនមនុស្ស៨នាក់ ទៅកាន់សាលាដំបូង រាជធានីភ្នំពេញនោះ ដំបូងឡើយពុំមានប្រភពព័ត៌មានពីស្ថាប័នណាបញ្ជាក់លម្អិតឲ្យបានច្បាស់លាស់ថា ជាករណីអ្វីនោះទេ សូម្បីមន្ត្រីសមត្ថកិច្ច នៃនាយកដ្ឋាននគរបាលប្រឆាំងភាវរកម្ម និងឧក្រិដ្ឋកម្ម ដែលចាប់មនុស្សទាំង៨នាក់ និងកាំភ្លើង២៨ដើមក៏ស្ងាត់ឈឹងដែរ គ្មានហ៊ាននិយាយសូម្បីតែមួយម៉ាត់។ ទោះជាយ៉ាងណាក្តីសំណុំរឿងមនុស្ស៨នាក់នោះ បានស្ថិតនៅដៃលោក អ៊ុំ សុភក្តិ ព្រះរាជអាជ្ញារង នៃ អយ្យការអមសាលាដំបូងរាជធានីភ្នំពេញធ្វើការសាកសួរ។
លោកព្រះរាជអាជ្ញារងកាន់សំណុំរឿងនេះ បានបង្ហើបឲ្យភ្នាក់កោះសន្តិភាពដឹងយ៉ាងខ្លីថា លោកកំពុងតែសួរ (រឿងភាវរកម្ម)។ ការឃាត់មនុស្ស៨ នាក់នេះពិតជាពាក់ព័ន្ធករណីប៉ុនប៉ងធ្វើភាវរកម្មមែន ព្រោះពេលនោះសមត្ថកិច្ចបានបញ្ជូនជនសង្ស័យ ទៅកាន់សាលាដំបូងរាជធានីភ្នំពេញ ដោយសង្កេតឃើញថា បានប្រើប្រាស់រថយន្ត២គ្រឿង សុទ្ធតែពណ៌ខ្មៅ រថយន្ត១គ្រឿងឃ្លុបជិត បំពាក់ដោយសារ៉ែន និង១គ្រឿងប្រភេទ២បាំង សម្រាប់ដឹកសម្ភារ ឬវត្ថុតាង។ បានសង្កេតឃើញទៀតថា រថយន្តឃ្លុប១គ្រឿងនោះ គឺដឹកជនសង្ស័យទាំង៨នាក់ និងរថយន្ត២បាំង១គ្រឿង កន្ទុយខាងក្រោយដាក់អាវុធ២៨ដើម ដែលជាវត្ថុតាងរឹបអូសពីជនសង្ស័យ៨នាក់នោះ។ រថយន្តទាំង២គ្រឿង បានបើកចូលទៅក្នុងបរិវេណសាលាដំបូង ដោយមានការប្រុងប្រយ័ត្នខ្ពស់ ពីសំណាក់មន្ត្រីនគរបាល នាយកដ្ឋានប្រឆាំងភាវរកម្ម និងឧក្រិដ្ឋកម្មឆ្លងដែន។
នៅពេលរថយន្តទាំង២គ្រឿងចូលដល់ក្នុងអគារសាលាដំបូង ទ្វាររបងក៏ត្រូវបានបិទជិត ដោយឆ្មាំការពារតុលាការ។ ប្រភពព័ត៌មានក្រៅផ្លូវការណ៍បានបង្ហើបឲ្យដឹងថា ២-៣ថ្ងៃមុននេះកម្លាំងសមត្ថកិច្ច នៃនាយកដ្ឋាននគរបាលប្រឆាំងភាវរកម្ម និងឧក្រិដ្ឋកម្មឆ្លងដែន បានបើកយុទ្ធនាការយ៉ាងសម្ងាត់មួយបង្ក្រាបករណីក្រុមភាវរករ មានគោលដៅប៉ុនប៉ងធ្វើភាវរកម្ម មកលើរាជរដ្ឋាភិបាលស្របច្បាប់អាណត្តិថ្មីនេះ។ ការបង្ក្រាបនោះគឺដំបូងមានការចាប់ខ្លួនភិក្ខុសង្ឃ១អង្គ គង់នៅវត្តពោធិ សង្កាត់ស្នោ ខណ្ឌពោធិសែនជ័យ រាជធានីភ្នំពេញ ដែលភក្ខុសង្ឃនោះ មានសាច់ញាតិនៅក្រៅប្រទេស ហើយសុទ្ធតែជាសមាសភាពបម្រើឲ្យគោលនយោបាយបក្សប្រឆាំង។ បន្ទាប់ពីសមត្ថកិច្ចចាប់ឃាត់ខ្លួនសង្ឃអង្គនោះ បានសាកសួរយកចម្លើយគ្រប់គ្រាន់ហើយ ទើបដឹងមានការលាក់ទុកអាវុធជាច្រើនដើមទៀត ហើយសមត្ថកិច្ចក៏បាននាំខ្លួនភិក្ខុសង្ឃនោះទៅដកហូតកាំភ្លើង វែងចំនួន២៨ដើម ដែលលាក់ទុកនៅអាស្រមមួយ ក្នុងភូមិព្រៃស្នួល សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ។
ប្រភពព័ត៌មានមិនទាន់ជាផ្លូវបានឲ្យដឹងទៀតថា ក្រោយពីឃាត់ខ្លួនភិក្ខុសង្ឃ១អង្គ ហើយដោយរកឃើញថា ករណីខាងលើនេះជាការរៀបចំប៉ុនប៉ងធ្វើភាវរកម្មផ្តួលរដ្ឋាភិបាល សមត្ថកិច្ចបានបន្តនីតិវិធីផ្សឹកភិក្ខុសង្ឃនោះ និង តាមចាប់ខ្លួនបក្ខពួករួមទាំងបន្តទៀត រហូតដល់ខេត្តសៀមរាប សរុបមនុស្សប្រុស៧នាក់ និងស្ត្រីម្នាក់ផងដែរ។ ប្រភពព័ត៌មានពីមនុស្សដែលជិតស្និទ្ធនឹងអតីតភិក្ខុសង្ឃវត្តពោធិអង្គនោះ បានបង្ហើបឲ្យដឹងថា រឿងមនុស្សទាំង៨ នាក់ពាក់ព័ន្ធលាក់ទុកអាវុធជាង២០ដើមនេះទំនងសុទ្ធតែត្រូវចាញ់បោកគេ នេះបើតាមការពិនិត្យមើលសមត្ថភាព ពួកគេមិនអាចធ្វើអ្វីទៅបានដោយគ្មានខ្សែរយៈ គ្មានការរៀបចំ គ្មានការចាត់តាំង ឬ ផ្តល់លុយកាក់មធ្យោយ ដល់ពួកគេនោះទេ។ ប៉ុន្តែយ៉ាងណាក្តីសំណុំរឿងនេះ បានស្ថិតនៅដៃសមត្ថកិច្ចជាផ្លូវការអស់ហើយ គ្រាន់គ្មានការអនុញ្ញាតឲ្យទម្លាយជាសាធារណៈ។ ការសាកសួរជនសង្ស័យនាក់ បានធ្វើឡើងពេញ១ថ្ងៃទី៣០ កញ្ញា រហូតដល់វេលាម៉ោង៦ល្ងាច ទើបលោក អ៊ឹម វណ្ណៈ ចៅក្រមស៊ើបសួរសម្រេចឃុំខ្លួនពួកគេដាក់ពន្ធនាគារព្រៃស ជាបណ្តោះអាសន្ន៕
ចែករំលែកព័តមាននេះ