រាជធានីភ្នំពេញ ៖ ប្រវែងផ្លូវប្រមាណជាង២០ម៉ែត្រជាប់នឹងអតីតទីលានចាក់សំរាមចាស់ ស្ថិតក្នុងភូមិព្រែកទាល់ សង្កាត់ស្ទឹងមានជ័យទី២ ខណ្ឌមានជ័យ ដែលបច្ចុប្បន្នប្រវែងផ្លូវជាង២០ម៉ែត្រកំពុងប្រែក្លាយជាកន្លែងប្រមូលផ្តុំសំរាមពាសពេញនៅលើដងផ្លូវប៉េតុង បង្កឲ្យប៉ះពាល់ធ្ងន់ធ្ងរដល់បរិស្ថានអនាម័យ ។
ពិសេសប៉ះពាល់ការធ្វើដំណើរទៅមករបស់បងប្អូនប្រជាអ្នកដំណើរ ព្រោះសំរាមនៅទីតាំងខាងលើ គឺច្រើនរហូតគរមកលើចំណែកផ្លូវប៉េតុងស្ទើរតែ១០០ភាគរយ នៃចំណែកផ្លូវទាំងស្រុងទៅហើយ ។
ប្រជាពលរដ្ឋដែលតែងជិះធ្វើដំណើរឆ្លងកាត់ផ្លូវខាងលើញឹកញ៉ាប់បាននាំគ្នាសម្តែងនូវអារម្មណ៍មិនពេញចិត្ត និងរិះគន់ធ្ងន់ៗទៅកាន់អាជ្ញាធរមូលដ្ឋានអំពីការមិនយកចិត្តទុកដាក់លើបញ្ហានេះ ដោយបណ្តែតបណ្តោយឲ្យសំរាមចេះតែមានចំនួនកើនឡើងច្រើន ជាបន្តបន្ទាប់ពាសពេញលើដងផ្លូវប៉េតុងរហូតកកណែនណាន់តាន់តាប់ស្ទើររកផ្លូវជិះធ្វើដំណើរទៅមកលែងបានទៅហើយ ។ ម្យ៉ាងវិញប្រសិនបើសំរាមនៅបន្តគរច្រើនបែបនេះ គឺមានផលប្រឈមខ្ពស់ណាស់ដល់បរិស្ថាន អនាម័យក្នុងសង្គម ។
ជុំវិញបាតុភាពខាងលើនេះដែរ លោកសេង ស៊ីវ៉ាន់ថា ចៅសង្កាត់រងទី១ នៃសង្កាត់ស្ទឹងមានជ័យទី២ បានថ្លែងប្រាប់ភ្នាក់ងារ កោះសន្តិភាពតាមទូរស័ព្ទនាល្ងាចថ្ងៃទី០២ ខែតុលា ឆ្នាំ២០១៨នេះឲ្យដឹងថា បញ្ហាខាងលើនេះក្នុងនាមលោកជាមន្ត្រីមូលដ្ឋានសង្កាត់ លោកបានធ្វើរបាយការណ៍រាយការណ៍ទៅកាន់ថ្នាក់លើរួចហើយ ហើយថ្នាក់ខណ្ឌក៏បានធ្វើលិខិតសំណើរទៅកាន់ក្រុមហ៊ុនស៊ិនទ្រី ដើម្បីឲ្យចុះមកកាយប្រមូលសំរាមផងដែរ ដោយក្នុងលិខិតនោះ គឺមានលោកឡុង ង៉ែត អភិបាលរងខណ្ឌ ជាអ្នកចុះហត្ថលេខាស្នើរសុំទៀតផង ប៉ុន្តែប្រមាណ១០ថ្ងៃមកនេះពោលតាំងពីថ្ងៃទៅ២១ ខែកញ្ញា ឆ្នាំ២០១៨ គឺក្រុមហ៊ុនស៊ិនទ្រីមិនបានចុះមកកាយ និងប្រមូលសំរាមចេញម្តងណាឡើយ ដោយពួកគេបានត្រឹមចុះមកពិនិត្យមើល ហើយប្រាប់យ៉ាងខ្លីថា ចាំឆ្លងយោបល់មេកើយសិន ។
លោកចៅសង្កាត់រងបន្តថា លោក និងមន្ត្រីការិយាល័យបរិស្ថានខណ្ឌបានព្យាយាមទំនាក់ទំនងទៅខាងក្រុមហ៊ុនស៊ិនទ្រីរហូត ក្នុងគោលបំណងឲ្យពួកគេចុះមកកាយប្រមូល ប៉ុន្តែពួកគេត្រឹមឆ្លើយថា ទទួលបានរហូត តែមិនដែលឃើញមានកម្លាំងចុះមកប្រមូលទាល់តែសោះ ។
លោកសេង ស៊ីវ៉ាន់ថា បញ្ជាក់ថា សំរាមទាំងអស់ដែលមាននៅចំណុចខាងលើនេះ គឺមិនមែនពលរដ្ឋក្បែរខាងលើយកមកបោះចោលឡើយ គឺអ្នកពីចម្ងាយពោល គឺនៅមិនឆ្ងាយពីតំបន់នោះប៉ុន្មានដែរ ដែលពួកគេតែងវេចខ្ចប់ទាំងបាវៗធំៗ ដឹកតាមម៉ូតូរ៉ឺម៉កយកមកចោលជាបន្តបន្ទាប់ ទើបកកកើតឲ្យមានសំរាមបែបនេះតែម្តងទៅ ។ លោកថា កាលពីពេលកន្លងទៅ លោកធ្លាប់ដាក់កម្លាំងឲ្យចាប់ក្រុមអ្នកដែលដឹកសំរាមយកទៅចោលដែរ តែពេលលោកដាក់កម្លាំងចាំចាប់ពួកគេ គឺពួកគេមិនចោលឡើយ គ្រាន់តែដឹកជិះកាត់ លុះពេលមិនមានកម្លាំងឈរឃ្លាំមើលពួកគេក៏បន្តបោះចោលយ៉ាងអាណាធិបតេយ្យបន្តទៀត នេះហើយ គឺជាចំណុចពិបាកសម្រាប់អាជ្ញាធរណាស់ ។
យ៉ាងណាមិញ ជុំវិញបាតុភាពនេះមជ្ឈដ្ឋានទូទៅស្នើរមន្ត្រីជំនាញពាក់ព័ន្ធមេត្តាដោះស្រាយបញ្ហាខាងលើនេះឲ្យបានឆាប់រហ័សផង ដើម្បីធានាបានបរិស្ថានអនាម័យស្អាត ពិសេសសោភ័ណ្ឌលើដងផ្លូវសាធារណៈ ដងផ្លូវពុំមែនជាកន្លែងសម្រាប់ចោលសំរាមឡើយ គឺជាផ្លូវសម្រាប់ធ្វើដំណើរឆ្លងកាត់ទៅមកប៉ុណ្ណោះ ។ ទន្ទឹមនឹងនោះ អាជ្ញាធរមូលដ្ឋានក៏ធ្វើការសំណូមពរខ្ពស់ដល់ពលរដ្ឋទាំងដែលធ្លាប់យកសំរាមមកចោល មេត្តាបញ្ឈប់សកម្មភាពនេះបន្តទៀតទៅ គួរណាស់បងប្អូនត្រូវប្រមូលវេចខ្ចប់ទុកនៅខាងមុខរបស់ខ្លួនឯងនីមួយៗ ដើម្បីអាចឲ្យក្រុមរថយន្តស៊ិនទ្រីបានទៅដឹកជញ្ចូន ជៀសវៀងការយកសំរាមទៅចោលនៅលើដីឡូតិ៍ដែលគេទុកចោល យ៉ាងអាណាធិបតេយ្យរហូតច្រើនហៀរទៅលើដងផ្លូវ ប៉ះពាល់ធ្ងន់ធ្ងរដល់បរិស្ថានអនាម័យ និងសណ្តាប់ធ្នាប់លើដងផ្លូវសាធារណៈផងដែរ ៕
ចែករំលែកព័តមាននេះ