រាជធានីភ្នំពេញ ៖ មន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងនៅថ្ងៃទី១ ខែតុលា ឆ្នាំ២០១៨នេះថា គ.ជ.ប បានដាក់ផែនការចុះទៅចុះឈ្មោះបោះឆ្នោត ដល់ខ្នងផ្ទះរបស់ប្រជាពលរដ្ឋដែលមានអាយុចាប់ពី១៨ឆ្នាំឡើងទៅ…
រាជធានីភ្នំពេញ ៖ មន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងនៅថ្ងៃទី១ ខែតុលា ឆ្នាំ២០១៨នេះថា គ.ជ.ប បានដាក់ផែនការចុះទៅចុះឈ្មោះបោះឆ្នោត ដល់ខ្នងផ្ទះរបស់ប្រជាពលរដ្ឋដែលមានអាយុចាប់ពី១៨ឆ្នាំឡើងទៅ ដោយអនុវត្តចាប់ពីខែតុលានេះតទៅដើម្បីបង្កើនប្រសិទ្ធភាពចុះឈ្មោះប្រជាពលរដ្ឋឱ្យបានគ្រប់ៗគ្នា ។
លោក នុត សុខុម អនុប្រធាន គ.ជ.ប បានថ្លែងក្នុងកិច្ចប្រជុំជាមួយភាគីពាក់ព័ន្ធជុំវិញ ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១៨ ស្តីការ គ.ជ.ប នៅព្រឹកថ្ងៃទី០១ ខែតុលា នេះថា ការចុះដល់ខ្នងផ្ទះរបស់ប្រជាពលរដ្ឋ ដើម្បីចុះឈ្មោះបោះឆ្នោតនេះ ធ្វើឡើងក្នុងរយៈពេល១៨ថ្ងៃ ដោយបានកំណត់យក៥ថ្ងៃដំបូង ធ្វើការចុះឈ្មោះអ្នកបោះឆ្នោតនៅតាមសាលាឃុំសង្កាត់ ហើយ៩ថ្ងៃបន្ទាប់ចុះទៅតាមបណ្តាភូមិ និងសល់៤ថ្ងៃទៀត ត្រឡប់មកធ្វើការចុះឈ្មោះនៅសាលាឃុំសង្កាត់វិញ ។
លោកអនុប្រធាន គ.ជ.ប បានបន្តថា«ដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១៨ ចាប់ផ្តើមពីថ្ងៃទី១ ដល់ថ្ងៃទី១៨ ខែតុលានេះ ដើម្បីធានាថា ប្រជាពលរដ្ឋខ្មែរដែលមានសិទ្ធិបោះឆ្នោតគ្រប់រូប ហើយមិនទាន់បានចុះឈ្មោះបោះឆ្នោតពីមុនមក និងប្រជាពលរដ្ឋខ្មែរទើបគ្រប់អាយុ១៨ឆ្នាំបានចុះឈ្មោះក្នុងបញ្ជីបោះឆ្នោតគ្រប់ៗគ្នា ។
តែយោងតាមអ្នកស្រី អ៊ូច អរុណវដ្តី ប្រធានសមាគមអរុណរះដែលតែងចូលរួមឃ្លាំមើលរាល់ដំណើរការបោះឆ្នោតនៅកម្ពុជាបានគាំទ្រចំពោះនីតិវិធីថ្មីនេះ ដោយបានអំពាវដល់ប្រជាពលរដ្ឋខ្មែរមិនទាន់បានចុះឈ្មោះបោះឆ្នោតពីមុនមក រួសរាន់ទៅចុះឈ្មោះនៅតាមសាលាឃុំសង្កាត់ ឬក្នុងការិយាល័យណាមួយក្នុងភូមិឱ្យបានគ្រប់ៗគ្នា ដើម្បីចៀសវាងការបាត់សិទ្ធិបោះឆ្នោតសម្រាប់អាណត្តិៗទៀត ។
សូមបញ្ជាក់ថា ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១៨នេះ គឺសំដៅលើអ្នកផ្លាស់ប្តូរលំនៅឋាន ការកែតម្រូវឈ្មោះ ឬទិន្នន័យអ្នកបោះឆ្នោតអ្នកទើបគ្រប់អាយុ១៨ឆ្នាំ គិតត្រឹមថ្ងៃទី៣១ ខែធ្នូ ឆ្នាំ២០១៨ អ្នកមិនទាន់បានចុះឈ្មោះបោះឆ្នោតពីមុនមក ការស្រង់ និងលុបឈ្មោះចំពោះអ្នកមរណភាព និងអ្នកត្រូវបានដកសិទ្ធិបោះឆ្នោតបណ្តោះអាសន្ន ។
យោងតាមការប៉ាន់ស្មានរបស់ គ.ជ.ប បានបង្ហាញថា ចំនួនអ្នកចុះឈ្មោះបោះឆ្នោតថ្មីនៅក្នុងឆ្នាំ២០១៨នេះមានប្រហែលជាង៤៨ម៉ឺន៩ពាន់នាក់ ។ ជាមួយគ្នានេះក៏លុបឈ្មោះអ្នកបោះឆ្នោតចេញពីបញ្ជីជាង៩ម៉ឺននាក់ផងដែរ ៕
ចែករំលែកព័តមាននេះ